HINWƆ HI MITS YOHANA 14

1Mi wɛɛ mi see mi gbɛn Tamwaa bɔ gi erk a Siyona gol ha. Dood duk tɛmɛrɛ daa dumbili nasɔ hi duk nasɔ (144.000), hi gi hi giya, hi gin nuŋgɔ hi Baatɔ nuŋgɔ bi̧i̧k a hi ti̧i̧l du.

2Mi wɛɛ mi lag ya̧a̧ za booyz bɛtha an zɛɛ gbɔɔl mɛm gi tuuk namsɔ, wɛɛ an bɛlya̧a̧sɛɛk gbɔɔlɛ. Hinyɔ mi lagɔ riitin an ɗɛŋɗɛŋnɔɔyɔ gɔ hi ɓaako. 3Dood kit wɔ hi erk a waar ums ɗɔɔtillɛl bɔ gi muutdu a hinza̧a̧til nas wɔ hi muutdu hi a ɗɛntɛ wɔ hi muutdu, hi hin-ɛɛn seg ɛɛko; doo za ɗɛ̄ɛ̄ an gi gok hin-ɛɛnɔ gɛ, gɛ dood duk tɛmɛrɛ hi dumbili nasɔ daa nas (144. 000) wɔ hi da hi tuus nɛ zulya̧ aakil du a hɛbtdi, hii ɗɛɛ ɛɛkɔ kpɔd.

4Dood wɔrɔ hi mɛ̄ɛ̄ mansdɔgl gɛ, muulya̧ gaaga. Hi fɔk Tamwaa bɔ a lɛlyɔ gi rek ge sɛw. Hi za̧a̧s nɛ hii gi dor a dood zaadɛ teesdu hi gààhi a Bɛt ge biitiri hi a Tamwaa bɔ ge. 5Hi kɛ̧hi ya̧a̧gɔ̧ɔ̧n za book ɔ̧tza gɛ. Hi taan hin-a̧a̧bi.

6Mi wɛɛ mi gbɛn Bɛtwalsɛr za gi riŋk bɛtha hɛmltɔnɔ, gin Dɔgl Rɔb yɔ gɔ gi waa faa an gi dɔks dood wɔ hi waak hɛbtdi, a waal wɔ hi gi sɛw gedu, a dood dɔ̧ɔ̧t teesdu sɛw, a dood ya̧a̧boon du sɛw, hi dood hɛbtyaadɛ sɛw. 7Gi dɔk hi ya̧a̧ɓooti:

a hoobha̧a̧nɛg Bɛto, baaninɛge! Ya̧a̧nɛ, ɔ̧tyɔ gɔ gi gbaas dood dɔgl du tuurɔ. Ɗɔbsin za̧a̧nyɔ kim bɛtha hi hɛbtdi, hi mɛmbal gbɔɔlɛ, hi mɛmzɛɛl wɛ!

8Bɛtwalsɛr za eesim bɔ wɛɛ fɔbz Bɛtwalsɛr biitir bɔ gi dɔko:

a waal gbɔɔl bɔ Baabila ɛ̧ɛ̧bɔ, ɛ̧ɛ̧bɔ! Gii yɔ̧n nɛ waal wɔ hɛbtdi sɛw zɛlkɔ ha̧a̧l bɔ bumɔ hob bɔ.

9Bɛtwalsɛr za taasim bɔ fɔbz zaadɛ eerɛ wɔ ɓooya̧a̧:

a za̧a̧nyɔ ɗɔbs nambhɛtum bɔ hi riitinsɔ bɔ hi wɔ̄mɔ̄, gi dag gbɛɛtɔ gi ti̧i̧l du, zaabe a gi naan muul hɛw, 10gi yɔ̧ Bɛt nɔɔtigɔ ha̧a̧l bumɔ hob bɔ hi wɔ̄ɔ̄n mɛm gɛ, hi kpel a nɔɔtigɔ dakwaa bɔ gedu. Gi ha̧a̧ya̧a̧r a laazɛŋk du hi laa-uus ha̧a̧l du a Bɛt walɛsɛrɛ gaatɛ wɔ hi muutdu hi a Tamwaa bɔ gi muutdu.

11Ya̧a̧rhantya̧ bɔ uusɔ gi waa uuk a bɛtha wɛlɛ hi wɛlɛ. Za̧a̧nyɔ ɗɔbs nambhɛtum bɔ hi muulɔ bɔ hi wɔ̧mɔ, zaabe gi dag gbɛɛtɔ, taa holk nɛ zaŋ, gid yɛmsɛ, gid lurko, taa holko.

12Yɔ anbɔ, Bɛt doodɔ wɔ hi fɔk hinyɔ gisihi raako hi waak Yeesu ɗɔbsig hi rɔbo, mɔhi hinɛ.

13Mi wɛɛ mi lag ya̧a̧ za raazim bɛtha:

a bi̧i̧mɔ: a hat gis a dood wɔ hi wɔrk a Bɛtwoos du, gi yɛɛl ɓɔryɔ!

Bɛt Mɔkilɔ ta̧a̧:

a Hɔɔ! Anbɔ. Hi ɗɛɛ an hi hol woosya̧ ɓaatil bɔ hi wɛɛ hi dag hato; ya̧a̧nɛ, hinrɔb yɔ hi woo gihi fɔk kuudu.

14Kuudu mi wɛɛ mi see lɔlɛ mi gbɛn kuus buu, za̧a̧nza yɔ Bɛt kimɔ riitin an doo ɗɔɔt a kuus buu bɔ hage, heg waar ums kalyɔ hi gɔn hɛɛlmɔt a zulha, gi wa̧a̧k rɔŋs lɔmnt naan du. 15Bɛtwalsɛr za tuuz a Bɛtluk du ɓooya̧a̧ raa Za̧a̧n bɔ gi ɗɔɔtig a kuus buu bɔ hage:

a loom rɔŋs mɔ, kpaanum lees wɔ hɛbtdi, hi ram da̧a̧da̧, ha̧sigya̧ riiri.

16Hɔnɛ Za̧a̧n bɔ ɗɔ̄ɔ̄t a kuus ha sinz rɔŋsɔ bɔ hɛbtdi kpaan lees wɔ, ha̧s lees wɔ hɛbtdi. 17Bɛtwalsɛr za tuuz a Bɛtluk du a bɛtha; gii be gin rɔŋs lɔmnt naan du be. 18Bɛtwalsɛr za yɔ gin tɛŋk an gi tuus laa, fu̧u̧z a Bɛtmaaksɛŋk bɔ ge ɓoos zaa bɔ gin rɔŋs lɔmnt naan du ya̧a̧:

a loom rɔŋks mɔ, mɔ kpaan tɛ̧ɛ̧ huml ribl wɔ hi gi hɛbtdi a bak wɔ hi du, inaboohi wɔ hi ra̧a̧mɔ!

19Bɛtwalsɛr bɔ sinz rɔŋsɔ bɔ hɛbtdi hablin tɛ̧ɛ̧huml ribl wɔ yaa a hinɓɔ̧ɔ̧nikya gbɔɔl bɔ gi Bɛt nɔɔtigɔ gedu. 20Rek ɓɔ̧ɔ̧l tɛ̧ɛ̧huml wɔ a waalgbɔɔl bɔ gi saŋgbati. Ga̧a̧m tuu gbɔɔltɔnɔ an mɛm gi tuuk a zɛɛ du a hinɓɔ̧ɔ̧nikya bɔ gedu. Ga̧a̧m zɔbɔ hɛml an kilomɛɛtre taarɛ, dukɔ gi a doo erkil du.

Currently Selected:

HINWƆ HI MITS YOHANA 14: NTD

Highlight

Copy

Compare