MATTHIEU 26

Ee nú mɛ ba Jesu

(Zɔk Mk 14.1-2; Lk 22.1-2; Jn 11.45-53)

1Jesu usa mɔ‘i lɛŋ ha̧ o bíí kaɗi, ɓɛɛ a̧ tɔ̧ ha̧ o ŋgaiwi kɔ̧-a̧: «Ɛ́nɛ́ iŋa oi-aa ɓɔna nɛ́ zɛ yiitoo ɓɛɛ gbaŋa Paska dea. 2Ŋgimbi'i wa tɛ ha̧ Bem ko bíí wen ha̧ wa mɛ mgboi a̧ zu te-diŋa.»#Gboa-a 12.1-27

3Nɛ́ mɔ'ɔ nɛ̀ o gasa wan-ɗafi-sɔ̧ in o gasawi ko o Juif mɔi̧a kpa ŋmaa kɔ̧́ tua ko gasa wan-ɗafi-sɔ̧ Kaif. 4Wa ee nú de nɛ̀ gɔn-ta mɛ ba Jesu mɛ gbɛ a̧ yinɛ, 5ɓɛɛ wa tɔ̧: «K’ɛ́ɛ́ ba a̧ wese gbaŋa na, wen ká foomɔ tɛɛ de mgbara bíí.»

Tɛna nɔ̧́-nyama a zu Jesu

(Zɔk Mk 14.3-9; Jn 12.1-8)

6Jesu duka kɔ̧́ tua ko Simɔŋ, ŋma wi-doko sɛn Betanii; 7ɓɛɛ nɛ́ mɔ'ɔ nɛ̀ ŋma okoo ɗɔŋa pii katɛ a̧ nɛ̀ ŋma dak nɔ̧́-nyama nɛ̀ gɛnɛ-a ɔ ŋgaya, ɓɛɛ tɛn a zu a̧ ŋgimbi n'aa nyɔŋ nɛ̀ mɔ.#Lk 7.37-38 8See o ŋgaiwi ko Jesu ɗaŋa tɛ mɔ nɛ kóò‘i dea'i, ɓɛɛ wa tɔ̧: «Ɛ̧ɛ̧ nɛ́ ge ɗaŋa mɔ ge? 9De nɔ̧́-nyama hegɔ'ɛ, wi tɛ̀ɛ́ ɗɔr so ba nɛ̀ dɔka kɔya-sede mɛ ha̧ ha̧ o wisan ɛ̧!» 10Jesu kɔɓa wen kɔ-wa'i, ɓɛɛ tɔ̧ ha̧ wa: «Ɛ̧ɛ̧ nɛ́ ge wen ge n’ɛnɛ tɔ̧ ha̧ kóò'ɛ ge? Nɛ́ demɔ á̧ a̧ dee ha̧‘m. 11K’ɛ́nɛ́, o wisan a̧a̧ in'nɛ̀ɛ́ ɓɔnsɛnɛ, ɓɛɛ kɔ‘m, mi beka duk in'nɛ̀ɛ́ ɓɔnsɛnɛ na.#Wee-ɗoŋ-he 15.11 12Nɔ̧́-nyama nɛ̀ kóò'ɛ aa zu'm’ɛ duk nɛ́ wen guna'm. 13Nɛ́ kpasawen a̧‘m tɔ̧ h’ɛ́nɛ́; fara lɛŋ zaŋnu nɛ̀ bíí tɛ tɔ̧ De Mbe Wen sɛnɛ, wa tɛ we ɗoŋ mɔ nɛ̀ kóò'ɛ dee ha̧‘m kinii’ɛ ha̧ tɛ bíí mɛ mbaŋ ɗoŋ mɔ n'aa dea’ɛ.»

Judas ee ɗɔra tɛ Jesu

(Zɔk Mk 14.10-11; Lk 22.3-6)

14Nɛ́ mɔ'ɔ nɛ̀ Judas, kpɔk mgbara o ŋgaiwi ko Jesu ɓu-zua-yiitoo, nɛ̀ɛ́ tɛ o gasa wan-ɗafi-sɔ̧, 15ɓɛɛ tɔ̧ ha̧ wa: «Ɛ́nɛ́ tɛ ha̧ nɛ́ ge ha̧‘m mɛ e Jesu er'nɛ́ ge?» Ɓɛɛ o gasa wan-ɗafi-sɔ̧ ha̧ kɔya-sede ɓu-taar ha̧ a̧.#Zak 11.12 16Ɓɛɛ ɗoŋ mɔ‘i Judas kíí war mɛ e Jesu er wa.

Nyɔŋmɔ Paska

(Zɔk Mk 14.12-21; Lk 22.7-14,21-23; Jn 13.21-30)

17Kuti wese nyɔŋa brɛt nɛ̀ hao bo sɛnɛ na, o ŋgaiwi ko Jesu tɛ̀ɛ̀ tɛ a̧ ɓɛɛ ak a̧: «Ɛ́nɛ́ kɔ̧ɔ̧ h’ɛ́ɛ́ mɛ nɛ̀ɛ́ ɗafi nyɔŋmɔ Paska h’ɛ́nɛ́ sɛn de?» 18Ɓɛɛ Jesu kifi nú ha̧ wa: «Ɛ̀nɛ̀ nɛ́ saaye tɛ̀ ko ŋma bíí, ɛ̀nɛ̀ tɔ̧́ ha̧ a̧‘e, Wan-usi-mɔ tɔ̧a̧‘e ŋgimbi kɔ‘i hɔɔ kaɗi; wi tɛ de gbaŋa Paska in o ŋgaiwi kɔ‘i tɛ̀ k’ɛ́nɛ́ wo.» 19Ɓɛɛ o ŋgaiwi ko Jesu de hee mɔ'ɔ n'aa tɔ̧ɔ̧ ga, ɓɛɛ wa nɛ́ɛ̀ ɗafi nyɔŋmɔ Paska.

20Mɛ́ ga̧a̧mɔ, Jesu nyɔŋa mɔ in o ŋgaiwi kɔ‘i ɓu-zua-yiitoo, 21ɓɛɛ nɛ̀ wa ɓɔna fara nyɔŋa mɔ, Jesu tɔ̧ɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, ŋma bíí kpɔk mgbara'nɛ́ tɛ e ɗɔra tɛ‘m.» 22See-wa ɗaŋa nyɛmna, ɓɛɛ wa kpɔk kpɔk ku̧ naŋ aka a̧: «Gasa Wan, nɛ́ mi nde?» 23Jesu kifa nú ha̧ wa: «Wi nɛ̀ pi̧i̧ er kɔ̧́ tasi in am kpɔk'i, wi-e-ɗɔra tɛ‘m a̧‘i.#Gima 41.10 24Bem ko bíí tɛ nɛ̀ kànà hee mɔ'ɔ nɛ̀ bàá yɔr so wen-aa ga; ɓɛɛ bɔnɛ a̧a̧ zu wi nɛ̀ e ɗɔra tɛ Bem ko bíí. Gana so ká‘i ko so wi’ɛi na.» 25Judas wi-e-ɗɔra tɛ-a'i aka a̧ mbɛt: «Nɛ́ mi nde, Wan-usi-mɔ?» Ɓɛɛ Jesu kifi nú ha̧ a̧: «Mɛ tɔ̧ɔ̧ kaɗi.»

Nyɔŋmɔ kɛndao

(Zɔk Mk 14.22-26; Lk 22.15-20; 1 Kɔr 11.23-25)

26Ŋgimbi nɛ̀ wa nyɔŋ nɛ́ mɔ, Jesu baa brɛt, de osoko ha̧ Sɔ̧, kɛ̧ ha̧ o ŋgaiwi kɔ‘i, ɓɛɛ tɔ̧ ha̧ wa: «Ɛ̀nɛ̀ bá ɛ̀nɛ̀ nyɔ́ŋ, mɔ'ɔ nɛ́ kiitɛ‘m.» 27Nɛ́ mɔ'ɔ n'aa baa be-ɗele, de osoko ha̧ Sɔ̧, ha̧ ha̧ o ŋgaiwi kɔ̧-a̧, ɓɛɛ tɔ̧: «Ɛ̀nɛ̀ nɔ́ dam'nɛ́ lɛŋ, 28mɔ'ɔ nɛ́ tɔk-tɛ‘m wan mɛ nɔɔ-tɔk wen o bíí nɛ̀ dɔka-a wen kpaa ea-ɗaŋmɔ. Tɔk’ɛ nɛ́ nɔɔ-tɔk ko Sɔ̧ in bíí.#Gboa-a 24.8; Jer 31.31-34 29Mi tɔ̧ h’ɛ́nɛ́, mi beka nɔ yì waya-nyak-dɔ̧ɔ̧'ɛ ɓɔna hɔ wese n'am tɛ nɔ mbe-a in'nɛ̀ɛ́ tɛ Wan ko Dáà kɔ‘m yiwese mɛ.»

Jesu tɔ̧a̧‘e Pierre tɛ kafi wi

(Zɔk Mk 14.27-31; Lk 22.31-34; Jn 13.36-38)

30Ɗoŋ nɛ̀ wa bia gima kaɗi, wa gboo yak si zu Kaya Te-nɔ̧́. 31Ɓɛɛ Jesu tɔ̧ ha̧ wa: «Mɛ́ zɛ hɛ̧ɛ̧ ɛ́nɛ́ tɛ pɛsi e'm duk, wen wa bàá yɔr so hegɔ: ‹Mi tɛ gusi Wi-dai-sami, ɓɛɛ o sami tɛ pɛsi.›#Zak 13.7 32Kà‘m kur ŋgɔn tɛ fio kaɗi, ɓɛɛ mi yaka ti h’ɛ́nɛ́ si Galilee.»#Mt 28.16 33Ɓɛɛ Pierre tɔ̧ ha̧ a̧: «Kóó bíí lɛŋ ee'nɛ́ duk, kɔ‘m mi beka e'nɛ́ duk na ndó-ndó-ndó.» 34Ɓɛɛ Jesu kifi nú ha̧ a̧: «Nɛ́ kpasawen a̧‘m tɔ̧ ha̧ mɛ, mɛ tɛ kaf'am mɛ zɛ hɛ̧ɛ̧ war taar nɛti sɛka kɔra hèé mɔ.» 35Pierre tɔ̧ɔ̧ ha̧ a̧ woyo: «Kóó wa tɛ gbɛ‘m in'nɛ̀ɛ́, mi beka kafi'nɛ́ na.» Ɓɛɛ o ŋgaiwi ko Jesu lɛŋ tɔ̧ kpɔk mɔ‘i.

Kɔfa-sɔ̧ sɛn Getsemane

(Zɔk Mk 14.32-42; Lk 22.39-46)

36Nɛ́ mɔ'ɔ nɛ̀ Jesu nɛ̀ɛ in o ŋgaiwi kɔ‘i hɔ fara nɛ̀ wa sa'e Gɛtsemane, ɓɛɛ a̧ tɔ̧ ha̧ wa: «Ɛ̀nɛ̀ yá hɛ̧ɛ̧ ha̧‘m nɛ́ benaŋ si mɛ‘i a̧‘m kɔ́fí Sɔ̧ sɛ.» 37A̧ mgbɔɔ Pierre in o bem ko Zebedee yiitoo nɛnɛ in a̧; ɓɛɛ a̧ ku̧ naŋ kpaa ɗaŋsee in dita-see nyɛmna. 38A̧ tɔ̧ɔ̧ ha̧ wa: «See-am ɔ dita hee mi tɛ fe fee ga. Ɛ̀nɛ̀ yá hɛ̧ɛ̧, ɛ̀nɛ̀ pɛ́m mɔ in am.» 39Nɛ́ mɔ'ɔ n'aa nɛɛ siti tikiɗi, ɓɛɛ a̧ hɔ̧fi̧ tik nù, ba sɔnti gu nù, ɓɛɛ kɔfi Sɔ̧ hee mɔ'ɔ ga: «Dáà kɔ‘m, kà ŋma yuwar nɛ́ boa, ɓɛɛ ɛ̀nɛ̀ bá be-ɗele-bɔnɛ'ɛ yinɛ zu'm. Ɓɛɛ bó hee mɔ'ɔ n'am kɔ̧a̧ ga na, ɓɛɛ nɛ́ hee ɛ́nɛ́ kɔ̧a̧ ga.»

40Nɛ́ mɔ'ɔ n'aa pia ɗoŋ, ɓɛɛ a̧ kpa o ŋgaiwi kɔ̧-a̧ fara ɔ yá, ɓɛɛ a̧ tɔ̧ ha̧ Pierre: «Ɛ́nɛ́ nyɛm mɛ́ nyaŋ yá tɛ ŋgimbi tikiɗi pɛm nɛ̀ mɔ in am na nde? 41Ɛ̀nɛ̀ pɛ́m mɔ, ɛ̀nɛ̀ kɔ́fí Sɔ̧ wen ká weamɔ tɛɛ gan'nɛ. Taamɔ ko bíí kɔ̧ɔ̧ mɛ de mɔ, ɓɛɛ kiitɛ-wi kpa ŋgai na.»

42Ɓɛɛ a̧ si ɗoŋ woyo mɛ́ kɔfi Sɔ̧; war yiitoo-aa nɛ́ mɔ‘i. A̧ tɔ̧a̧: «Dáà kɔ‘m, kà be-ɗele’ɛ nɛ́ nyɛma mɛ yu zu'm ká‘m tɛɛ nɔ na, ɓɛɛ nɛ̀ mɔ n’ɛnɛ kɔ̧a̧ a̧ dé.»

43Nɛ́ mɔ'ɔ n'aa pia ɗoŋ kpa wa fara ɔ yá woyo wen yá dita yí-wa, 44ɓɛɛ a̧ e wa duk yak nɛ́ɛ̀ kɔfi Sɔ̧ woyo, war taar-a nɛ́ mɔ‘i, ɓɛɛ a̧ tɔ̧ kànà nɛ́ kpɔk wen n'aa tɔ̧ɔ̧ so nɛti'i. 45Nɛ́ mɔ'ɔ n'aa sii ɗoŋ sitɛ o ŋgaiwi kɔ̧-a̧, ɓɛɛ tɔ̧ ha̧ wa: «Ɛ́nɛ́ ɓɔna ɔɔ yá, ɔm nɛ̀ tɛ‘nɛ́ nde? Ŋgimbi ha̧ Bem ko bíí mɛ ye er o ɗaŋwi hɛɗa kaɗi. 46Ɛ̀nɛ̀ kúr, ɛ̀ɛ̀ yak! Wi-e-ɗɔra tɛ‘m hɔɔ kaɗi!»

Wa baa Jesu

(Zɔk Mk 14.43-50; Lk 22.47-53; Jn 18.3-12)

47Nú Jesu tɛ zɔm tɛ wen'i hɔ̧ɔ̧ na, ɓɛɛ Judas, ŋma bíí mgbara o ŋgaiwi ko Jesu ɓu-zua-yiitoo hɔ, in o bíí nɛ̀ o gasa wan-ɗafi-sɔ̧ in o gasawi ko o Juif toma nɛ̀ gba-paa in o ɓira-te er wa. 48Wi nɛ̀ ee ɗɔra tɛ Jesu tɔ̧ɔ̧ so ha̧ wa nɛti'e, wi nɛ̀‘i tɛ dui nú-a'i, wi’ɛi a̧‘i, wa a̧ bá a̧! 49Nɛ́ mɔ'ɔ nɛ̀ Judas ɗɔŋa si katɛ Jesu nɛ̀ haya-a, ɓɛɛ tɔ̧ ha̧ a̧: «Ɛ̀nɛ̀ wór mɔ, Wan-usi-mɔ!» Ɓɛɛ dui nú-a. 50Jesu tɔ̧ɔ̧ ha̧ a̧: «Sɛm kɔ‘m, mɔ nɛ̀ mɛ tɛ̀ɛ̀ mɛ de'i, mɛ̀ dé nɛ́ dea-a.» Ɓɛɛ wa si zu a̧, ba a̧. 51Ɓɛɛ ŋma bíí kpɔk mgbara o wi nɛ̀ yaa in Jesu dak gba-paa kɔ‘i gɔm nɛ̀ wi-de-tom ko gasa wan-ɗafi-sɔ̧, ɓɛɛ ɓir zer-aa pi̧ nù. 52Ɓɛɛ Jesu tɔ̧ ha̧ a̧: «Mɛ̀ pí̧ gba-paa kɔ-mɛ kɔ̧́ koɓo-a; wen kóó o ndé nɛ̀ dak gba-paa tɛ fe nɛ́ fio gba-paa. 53Mɛ́ íŋ‘e kà‘m kɔ̧ so gáà, bó nɛ́ mi nyɛma so mɛ tɔ̧ ha̧ Dáà kɔ‘m mɛ tom o betom nɛ yiwese, dùk-aa ɓu-zua-yiitoo tɛnɛ ha̧‘m na nde? 54Ɓɛɛ kà‘m de so hegɔ, Yɔramɔ tɛ̀ɛ́ hɔ gba̧a̧ hee ge? Wen Yɔramɔ tɔ̧a̧‘e, mɔ tɛ de kànà hegɔ.»

55Ɓɛɛ Jesu tɔ̧ ha̧ o bíí nɛ̀ tɛ̀ɛ̀ mɛ ba a̧: «Mi nɛ́ kpɔ̧i̧-gba̧a̧-nin s’ɛnɛ tɛ mɛ ba'm nɛ̀ gba-paa in o ɓira-te nde? Wese lɛŋ mi duka kɔ̧́ Tua ko Sɔ̧ usi nɛ̀ mɔ, ɓɛɛ ɛ́nɛ́ ba'm na.#Lk 19.47; 21.37 56Ɓɛɛ mɔ‘i lɛŋ dee ha̧ mɔ nɛ̀ wi-tɔ̧-wen oi nú Sɔ̧ bàá yɔr so mɛ hɔ gba̧a̧.» Ɓɛɛ o ŋgaiwi ko Jesu lɛŋ pɛsi yak e a̧ duk.

Gɔna-kita zu Jesu

(Zɔk Mk 14.53-65; Lk 22.54-55,63-71; Jn 18.13-14,19-24)

57Nɛ́ mɔ'ɔ nɛ̀ o wi-ba Jesu mgbɔɔ a̧ nɛnɛ tɛ ko Kaif, gasa wan-ɗafi-sɔ̧, wi nɛ̀ o wi-usi-heembea in o kuti-wi mɔi̧a so tɛ̀ kɔ̧-a̧. 58Pierre yora nɛ̀ nyɛi̧a-a ndak nɛ̀ ɗoŋ wa nɛnɛ hɔ tɛ̀ ko gasa wan-ɗafi-sɔ̧. Nɛ́ mɔ'ɔ n'aa yee bee-gara, ɓɛɛ duk nù mgbara o wi-de-tom ha̧ a̧ mɛ zɔk sɔŋkur mɔ nɛ̀ tɛ de.

59O gasa wan-ɗafi-sɔ̧ in gasa gɔna-kita nɛ̀ oi-aa lɛŋ kia mɛ de ndela ɓir nɛ̀ wen e nú Jesu ha̧ wa mɛ gɔn kita-fio zu a̧, 60ɓɛɛ wa kpa yuwar-a na; o bíí nɛ̀ dɔka-a ɓira wen e nú-a mbɛt takaɗi, ɓɛɛ sɔŋkur-aa o ŋma wi-sedaako-ndela yiitoo tɛa, ɓɛɛ tɔ̧: 61«Wi’ɛ bàá tɔ̧ so'e, wi nyɛma mɛ gbin Tua ko Sɔ̧ a nù, ɓɛɛ zaŋ zɛ taar wi mboo lɛŋ woyo.»#Jn 2.19 62Nɛ́ mɔ'ɔ nɛ̀ gasa wan-ɗafi-sɔ̧ kura, ɓɛɛ ak Jesu: «Mɛ́ kífí nú-mɛ na nde? Mɛ́ zíí wen nɛ̀ o wi nɔ'ɔ tɔ̧ zu mɛ'ɛ na nde?» 63Ɓɛɛ Jesu tɔ̧ wen na. Ɓɛɛ gasa wan-ɗafi-sɔ̧ tɔ̧ ha̧ a̧: «Mi ak mɛ́ nɛ̀ nin Sɔ̧ nɛ̀ duk kpasa, kà mɛ́ nɛ́ bòó nɛ́ Mɛsii, Bem ko Sɔ̧, ɓɛɛ mɛ̀ tɔ̧́ h’ɛ́ɛ́.» 64Jesu kifa nú ha̧ a̧: «Mɛ́ tɔ̧ɔ̧ kaɗi. Nɛ́ kpasawen a̧‘m tɔ̧ h’ɛ́nɛ́, ŋma wese ɛ́nɛ́ tɛ zɔk Bem ko bíí fara duka-a nɛ̀ war wii-er Wan nɛ̀ a̧a̧ nɛ̀ ŋgayamɔ lɛŋ in fara tɛa-a tɛ bu-zan yiwese mɛ mbɛt.»#Dan 7.13 65Ɓɛɛ gasa wan-ɗafi-sɔ̧ a̧k laa tɛ̀ á nù ɓɛɛ tɔ̧: «Ei! A̧ ɗaŋa nin Sɔ̧! Ɛ́nɛ́ zia ɗaŋ wen n'aa tɔ̧ɔ̧ ha̧ Sɔ̧‘i? Ɛ̀ɛ̀ kíí bɔɔ mbe wi-sedaako si déè ɓɔ ge nde?#Lev 24.16 66Ɛ́nɛ́ ta boo k’ɛ́nɛ́ hee ge?» Ɓɛɛ wa kifi nú: «A̧ nyɛ̀mà mɛ́ fè!»#26.66c A̧ nyɛ̀má mɛ́ fè: zɔk Lev 24.16.

67Nɛ́ mɔ'ɔ nɛ̀ wa aa sap yí-a, ɓɛɛ wa sɔm a̧; o ŋma mbɛra yí-a,#Es 50.6 68ɓɛɛ tɔ̧ ha̧ a̧: «Mɛsii, mɛ yàá-tɔ̧-wen oi nú Sɔ̧'ɛ, mɛ̀ sá nin wi nɛ̀ mbɛra mɛ!»

Pierre kafa Jesu

(Zɔk Mk 14.66-72; Lk 22.56-62; Jn 18.15-18,25-27)

69Pierre duka so kɔ‘i nù nɛ̀ zan bee-gara mɛ, ɓɛɛ nɛ́ mɔ'ɔ nɛ̀ ŋma kó-de-tom nɛ̀ɛ̀ sitɛ a̧ ɓɛɛ tɔ̧ ha̧ a̧. «Mɛ mbɛt, mɛ duka so in Jesu be Galilee’ɛ.» 70Ɓɛɛ Pierre kafi a̧ ti o bíí lɛŋ‘e: «Weyaa, i̧i̧ wen'i nɛ̀ mɛ tɔ̧‘i yeka nɛ̀‘m.» 71Pierre kura yak si nú garo, ɓɛɛ nɛ́ mɔ'ɔ nɛ̀ ŋma kó-de-tom zɔka a̧ woyo, ɓɛɛ tɔ̧ ha̧ o wi nɛ ya hi̧i̧‘e: «Wi’ɛ duka so in Jesu be Nazarɛt’ɛ.» 72Ɓɛɛ Pierre kafi woyo, kan mɔ, ɓɛɛ tɔ̧: «Mi iŋ kɔ‘m wi’ɛi na!» 73Ɗoŋ-aa tɛ nyɛi̧ na, ɓɛɛ o wi nɛ̀ ya hi̧i̧ nɛ́ si katɛ a̧ ɓɛɛ tɔ̧: «Kpasawen, mɛ́ mbɛt nɛ́ ŋma bíí mgbara wa, wen tɔ̧ɔ̧-wen kɔ-mɛ usi hegɔ.» 74Nɛ́ mɔ'ɔ nɛ̀ Pierre kàná mɔ, ɓɛɛ bé mɔ á tɛ‘e: «Mi iŋ kɔ‘m wi’ɛi na!» Ɓɛɛ soɓee, ká gata-kɔra hèé mɔ. 75Tɛ̀ Pierre mbaŋa ɗoŋ wen nɛ̀ Jesu tɔ̧ɔ̧ so ha̧ a̧‘e: «Mɛ tɛ kaf'am war taar nɛti sɛka gata-kɔra hèé mɔ.» Nɛ́ mɔ'ɔ nɛ̀ Pierre gboo zan, ɓɛɛ hi̧i̧ kɔ̧a̧ nɛ̀ dita-see.

Currently Selected:

MATTHIEU 26: GB11DC

Highlight

Copy

Compare