MATTHIEU 25

Lizaŋ ko o be-zɔŋa ɓu

1«Hegɔ Wan mɛ yiwese tɛ hɔ ŋmaa in o ŋma be-zɔŋa ɓu nɛ̀ baa so lamba kɔ-wa ɓɛɛ nɛ́ mɛ we ti wi-ba-kóò.#Lk 12.35 2Mɔɔrɔ nɛ́ o mgbelewi, ɓɛɛ mɔɔrɔ nɛ́ o wi-iŋ-mgbara-mɔ. 3O mgbélé zɔŋa ba ŋma be yì lamba e ká̧ lamba kɔ-wa na. 4O haya zɔŋa baa lamba kɔ-wa ɓɛɛ ba be dak yí-a e ká̧ a̧ mbɛt. 5Hee mɔ'ɔ nɛ̀ wi-ba-kóò tɛ hɔ na ga, yá dee yí-wa, ɓɛɛ wa lɛŋ tir yá.

6«Mɛ́ ɗuka zɛ wa zia gayamɔ: ‹Wi-ba-kóò hɔɔ kaɗi wó! Ɛ̀nɛ̀ gbó ɛ̀nɛ̀ wé ti a̧.› 7Nɛ́ mɔ'ɔ nɛ̀ o be-zɔŋa tuna lɛŋ, kóó o ndé ɗafi nɛ́ mɔ mɛ e wee tɛ lamba kɔ‘i. 8Ɓɛɛ o mgbélé zɔŋa tɔ̧ ha̧ o haya-a: ‹Ɛ̀nɛ̀ há̧ ŋma be yì-lamba k’ɛ́nɛ́ h’ɛ́ɛ́ a kɔ̧̀ k’ɛɛ nɛ̀ ku̧u̧ naŋ bia-a’ɛ na nde?› 9Ɓɛɛ o haya-a kifi nú ha̧ wa: ‹Weyaa! Ɛ̧ɛ̧ er yɛ'ɛ beka nyɛm ɛɛ in'nɛ̀ɛ́ na! Ɛ̀nɛ̀ nɛ́ɛ̀ hi̧fi nɛ́ k’ɛ́nɛ́ er o wi-ɗɔra-a ɛ̧!› 10Ŋgimbi nɛ̀ o mgbélé zɔŋa yaka mɛ hi̧fi yì-lamba, wi-ba-kóò hɔa, ɓɛɛ o haya zɔŋa nɛ̀ ɗafa so kɔ‘i mɔ kaɗi’ɛ ye tua-gbaŋa-báá-kóò in a̧, ɓɛɛ wa kpe nú tua. 11Dekpaa, o mgbélé zɔŋa hɔɔ kɔ‘i, ɓɛɛ sa mɔ: ‹Nyaa, Nyaa wa, ɛ̀nɛ̀ hú̧í̧ nú tua h’ɛ́ɛ́ wó!›#Lk 13.25 12Ɓɛɛ a̧ kifi nú ha̧ wa: ‹Nɛ́ kpasawen a̧‘m tɔ̧ h’ɛ́nɛ́: mi iŋ‘nɛ́ na!›

13«Hegɔ ɛ̀nɛ̀ pɛ́m mɔ, wen ɛ́nɛ́ iŋ wese kóó ŋgimbi nɛ̀ Bem ko bíí tɛ pii nɛ̀ ɗoŋ na.»

Lizaŋ ko wan-tom nɛ̀ ee sede er o wi-de-tom taar

(Zɔk Lk 19.11-27)

14«Wan mɛ yiwese hɔɔ ŋmaa in ŋma bíí nɛ̀ nɛ̀ɛ́ gɛnɛ; nɛ́ mɔ'ɔ n'aa saa o wi-de-tom kɔ̧-a̧, ɓɛɛ e mbɔi kɔ̧-a̧ er wa.#Lk 19.11-27 15A̧ ee miliɔŋ mɔɔrɔ er kuti bíí, ko yiitoo bíí a̧ ee nɛ́ miliɔŋ yiitoo, ɓɛɛ a̧ e miliɔŋ kpɔk er taar bíí, kóó o ndé nyɛm nɛ̀ ɗoŋ ŋgai-tom kɔ‘i, ɓɛɛ wi’ɛi yak kɔ‘i. 16Kuti bíí baa miliɔŋ mɔɔrɔ nɛ́ɛ̀ de nɛ̀ tom, ɓɛɛ kpa mbe-a mɔɔrɔ e zu-a. 17Wi-ba-miliɔŋ yiitoo nɛ̀ɛ̀ de kɔ‘i nɛ̀ tom mbɛt, ɓɛɛ kpa mbe-a miliɔŋ yiitoo e zu-a. 18Ɓɛɛ wi nɛ̀ baa so kɔ‘i nɛ́ miliɔŋ kpɔk'i nɛ̀ɛ̀ za̧ kɔ̧, ɓɛɛ hu̧si sede ko wan kɔ‘i sɛnɛ.

19«Duka hegɔɔ zɛ dɔk, ɓɛɛ wi’ɛi pii ɗoŋ, ɓɛɛ ak mɔ nɛ̀ wa dee nɛ̀ sede kɔ‘i. 20Wi-ba-miliɔŋ mɔɔrɔ ɗɔŋa piiti, ɓɛɛ ba mbe miliɔŋ mɔɔrɔ n'aa kpaa zu sede'i tɛnɛ ha̧ wan kɔ̧-a̧, ɓɛɛ tɔ̧: ‹Nyaa, ɛ́nɛ́ bàá e so nɛ́ miliɔŋ mɔɔrɔ er am; ɛ̀nɛ̀ zɔ́k mbe-a mɔɔrɔ n'am kpaa e zu-a’ɛ.› 21Ɓɛɛ wan kɔ̧-a̧ tɔ̧ ha̧ a̧: ‹Ɔ dee, mɛ́ nɛ́ de wi-de-tom nɛ̀ a̧a̧ nɛ̀ mboozu! Mɛ mboo zu tɛ mɔ tikiɗi, ɓɛɛ kinii mi tɛ e mɛ zu dɔka mɔ; mɛ̀ tɛ́, mɛ̀ yé zaŋ tortɛ ko wan kɔ-mɛ.› 22Hɔ-ɗoŋ-aa, wi-ba-miliɔŋ yiitoo ɗɔŋa piiti, ɓɛɛ tɔ̧: ‹Nyaa, ɛ́nɛ́ bàá e so nɛ́ miliɔŋ yiitoo er am; ɛ̀nɛ̀ zɔk mbe-a n'am kpaa e zu-a’ɛ.› 23Ɓɛɛ wan kɔ̧-a̧ tɔ̧ ha̧ a̧: ‹Mɛ́ nɛ́ de wi-de-tom nɛ̀ a̧a̧ nɛ̀ mboozu! Mɛ mboo zu tɛ mɔ tikiɗi, ɓɛɛ kinii mi tɛ e mɛ zu dɔka mɔ; mɛ̀ tɛ́, mɛ̀ yé zaŋ tortɛ ko wan kɔ-mɛ.› 24Sɔŋkur-aa, wi nɛ̀ baa so kɔ‘i nɛ́ miliɔŋ kpɔk'i hɔa, ɓɛɛ tɔ̧ ha̧ wan kɔ‘i: ‹Nyaa, mi iŋa so'e ndé, ɛ́nɛ́ nɛ́ ŋga-yí-bíí. Ɛ́nɛ́ mɔi̧ mɔ fara n’ɛnɛ gun mɔ na, ɛ́nɛ́ mɔi̧ mɔ fara n’ɛnɛ pɛ mɔ na mbɛt. 25Hegɔ, kíì dea'm ɓɛɛ mi ba sede k’ɛ́nɛ́ nɛ́ɛ̀ hu̧si ɗɔɔ nù. Ɛ̀nɛ̀ zɔ́k sede k’ɛ́nɛ́ hɛ̧ɛ̧.› 26Ɓɛɛ wan kɔ̧-a̧ kifi nú ha̧ a̧: ‹Mɛ́, ɗaŋ wi-de-tom! Wi tɛɛri! Mɛ́ iŋa so'e ndé mi mɔi̧ mɔ fara n'am gun mɔ na; mi mɔi̧ mɔ fara n'am pɛ mɔ na mbɛt; 27mɛ́ tɛ̀ɛ́ e so sede kɔ‘m fara-e-sede, ɓɛɛ tɛ pia-a kɔ‘m, mi tɛ̀ɛ́ kpa so mbe sede zu-a tikiɗi woyo. 28Ɛ̀nɛ̀ bá miliɔŋ‘i er-a yinɛ, ɛ̀nɛ̀ há̧ ha̧ wi nɛ̀ a̧a̧ nɛ̀ miliɔŋ ɓu, 29wen ko o ndé lɛŋ nɛ̀ a̧a̧ nɛ̀ mɔ, a'i tɛ ha̧ mbe-a e zu-a ha̧ a̧, ha̧ mɔ kɔ̧-a̧ mɛ dɔk siti, ɓɛɛ wi nɛ̀ bó nɛ̀ mɔ na, kóó be mɔ n'aa a̧a̧ nɛnɛ, wi tɛ ba er-a yinɛ.#Mt 13.12; Mk 4.25; Lk 8.18 30Wi’ɛ bó nɛ́ kpasa wi-de-tom na! Ɛ̀nɛ̀ bá a̧ pi̧ zan ti tum; fara'i nɛ́ fara-hi̧i̧-kɔ̧a̧ in fara-gɔfi-mɔ!›#Mt 8.12; 22.13; Lk 13.28

Sɔŋkur kita

31«Ŋgimbi nɛ̀ Bem ko bíí tɛ pii ɗoŋ tɛ gasamɔ kɔ‘i in o betom mɛ yiwese lɛŋ, a̧ tɛ duk zu damti-gasamɔ kɔ̧-a̧.#Mt 16.27; 19.28 32O tugun bíí lɛŋ tɛ mɔi̧ ŋmaa sɛn ti a̧, ɓɛɛ a̧ tɛ kɛ̧ mgbara bíí hee mɔ'ɔ nɛ̀ wi-dai-sami kɛ̧ nɛ̀ mgbara o sami in o gbadua’ɛ ga. 33A̧ tɛ a o sami nɛ̀ war wii-er, ɓɛɛ a̧ aa o gbadua nɛ̀ war gale. 34Ɓɛɛ wannu tɛ tɔ̧ ha̧ o bíí mɛ́ war wii-er-a: ‹Ɛ̀nɛ̀ tɛ́, ɛ́nɛ́ nɛ̀ Dáà kɔ‘m toka de yoŋgo zu'nɛ́, ɛ̀nɛ̀ yé tɛ Wan n'aa ɗafa so e h’ɛ́nɛ́ tɛ ku̧u̧naŋ nù mɛ nɛ̀ mɔɔ-oi. 35Wen wɔ gbɛɛ so'm, ɓɛɛ ɛ́nɛ́ ha̧ nyɔŋmɔ ha̧‘m nyɔŋ; wɔ-yì gbɛɛ so'm, ɓɛɛ ɛ́nɛ́ ha̧ yì ha̧‘m nɔ; mi so nɛ́ gɛnɛ, ɓɛɛ ɛ́nɛ́ kpɛk am; 36mi duka so nɛ̀ mgbìí, ɓɛɛ ɛ́nɛ́ pi̧ laa tɛ‘m; mi ɔɔ so zɛɛ, ɓɛɛ ɛ́nɛ́ zɔk am; mi yee so zɔɓɔ, ɓɛɛ ɛ́nɛ́ nɛ́ɛ̀ zɔk am mbɛt.› 37Ɓɛɛ o wi-de-mɔ nɛ̀ yuwar-a tɛ kifi nú: ‹Gasa Wan, mɛ́ gese ge ɛ́ɛ́ zɔka so ɛ́nɛ́ nɛ̀ wɔ, ɓɛɛ ɛ́ɛ́ ha̧ nyɔŋmɔ h’ɛ́nɛ́ ge? Kóó wɔ-yì gbɛɛ‘nɛ́, ɓɛɛ ɛ́ɛ́ ha̧ yì h’ɛ́nɛ́ ge? 38Mɛ́ gese ge ɛ́ɛ́ zɔka'nɛ́ fara tɛ gɛnɛ, ɓɛɛ ɛ́ɛ́ kpɛk'nɛ́ ge, kóó duka-a nɛ̀ mgbìí, ɓɛɛ ɛ́ɛ́ pi̧ laa tɛ‘nɛ́ ge? 39Mɛ́ gese ge ɛ́nɛ́ ɔɔ so zɛɛ, kóó ɛ́nɛ́ yee so zɔɓɔ, ɓɛɛ ɛ́ɛ́ nɛ́ɛ̀ zɔk'nɛ́ ge?› 40Ɓɛɛ wannu tɛ kifi nú ha̧ wa: ‹Nɛ́ kpasawen a̧‘m tɔ̧ h’ɛ́nɛ́; war ɓɛɓɛt n’ɛnɛ dee so pɛrti demɔ hegɔ ha̧ ŋma kpɔk mgbara o geɗek nya'm nɔ'ɔ, mɔ‘i, ɛ́nɛ́ dee so ha̧‘m.›

41«Hɔ-ɗoŋ-aa a̧ tɛ tɔ̧ ha̧ o bíí mɛ́ gale'e: ‹Ɛ̀nɛ̀ yák síɓí nɛ̀ nyɛi̧a-a, ɛ́nɛ́ nɛ̀ fom baa'nɛ́; ɛ̀nɛ̀ nɛ́ si kɔ̧́ wee nɛ̀ beka bi na kpoo nɛ kpoo nɛ̀‘i yee wen Wan-ɗaŋmɔ in o betom kɔ‘i; 42wen wɔ gbɛɛ so'm, ɓɛɛ ɛ́nɛ́ há̧ nyɔŋmɔ ha̧‘m na; wɔ-yì gbɛɛ so'm, ɓɛɛ ɛ́nɛ́ ha̧ yì ha̧‘m nɔ na. 43Mi so nɛ́ gɛnɛ, ɓɛɛ ɛ́nɛ́ kpɛk am na. Mi duka so nɛ̀ mgbìí, ɓɛɛ ɛ́nɛ́ pi̧ laa tɛ‘m na. Mi ɔɔ so zɛɛ, mi yee so zɔɓɔ mbɛt, ɓɛɛ ɛ́nɛ́ nɛ́ɛ̀ zɔk am na.› 44Ɓɛɛ wa mbɛt tɛ kifi nú ha̧ a̧: ‹Gasa Wan, mɛ́ gese ge ɛ́ɛ́ zɔka'nɛ́ nɛ̀ wɔ in nɛ̀ wɔ-yì, kóó ɛ́nɛ́ nɛ́ gɛnɛ, kóó ɛ́nɛ́ duka nɛ̀ mgbìí, kóó nɛ̀ zɛɛ, kóó n’ɛnɛ yee so zɔɓɔ mbɛt, ɓɛɛ ɛ́ɛ́ nɛ́ɛ̀ gbak'nɛ́ na ge?› 45Ɓɛɛ a̧ tɛ kifi nú ha̧ wa: ‹Nɛ́ kpasawen a̧‘m tɔ̧ h’ɛ́nɛ́; war ɓɛɓɛt n’ɛnɛ de pɛrti demɔ‘i ha̧ ŋma kpɔk mgbara o geɗek nya'm nɔ'ɔ na, ɛ́nɛ́ de mɔ‘i ha̧‘m na.› 46O wi nɔ‘i tɛ yak kɔ‘i si fara-bɔnɛ nɛ̀ kaɗi na ɓɔnsɛnɛ, ɓɛɛ o wi-de-mɔ nɛ̀ yuwar-a tɛ yak kɔ‘i mɛ duk kpasa kpoo nɛ kpoo.»#Dan 12.2

Currently Selected:

MATTHIEU 25: GB11DC

Highlight

Copy

Compare