MATTHIEU 27

Wa mgbɔɔ Jesu sitɛ Pilat

(Zɔk Mk 15.1; Lk 23.1-2; Jn 18.28-32)

1Nɛ̀ mɔ sa̧a̧ kaɗi, ɓɛɛ o gasa wan-ɗafi-sɔ̧ lɛŋ in o gasawi ko o Juif e nú ba nɛ̀ keta ha̧ Jesu mɛ fe. 2Wa hɛra a̧, ɓɛɛ mgbɔ a̧ yaknɛ sitɛ wannu Pilat.

Fio ko Judas

(Zɔk Tom 1.18-19)

3Ɓɛɛ nɛ̀ Judas, wi-e-ɗɔra tɛ Jesu, zɔka'e, wa gɔna kita-fio zu Jesu kaɗi, a̧ taa mɔ nyɛmna, ɓɛɛ kai kɔya-sede nɔ‘i ɓu-taar'i sinɛ ɗoŋ ha̧ o gasa wan-ɗafi-sɔ̧ in o gasawi, ɓɛɛ tɔ̧:#Tom 1.18-19 4«Mi dee ɗaŋmɔ wen n'am ee wi nɛ̀ de ŋma ɗaŋmɔ na er'nɛ́.» Ɓɛɛ wa kifi nú ha̧ a̧: «Ŋma wen k’ɛɛ so sɛnɛ? I̧i̧ nɛ́ wen kɔ-mɛ!» 5Nɛ́ mɔ'ɔ nɛ̀ Judas aa sede'i nù kɔ̧́ Tua ko Sɔ̧, ɓɛɛ yak nɛ́ɛ̀ ga̧i̧ tɛ̀ nɛ̀ nyak.

6O wan-ɗafi-sɔ̧ dɔra sede'i, ɓɛɛ tɔ̧: «Heembea k’ɛɛ e ha̧ pɛrti sede hegɔ'ɛ mɛ ye mgbara sede ko Sɔ̧ na, wen nɛ́ sede-tɔk.» 7Wa baa keta in o ŋmaa, ɓɛɛ wa ba sede'i hi̧fi nɛ̀ fɔ ko wi-ɓu-kpánà wen guna o gɛnɛ sɛnɛ. 8Mɛ̀ nɛ́ wen hegɔ, hɔ sɔsɔɔ‘i wa sa fara'i nɛ́ «Fɔ-tɔk». 9Hegɔ wen nɛ̀ wi-tɔ̧-wen oi nú Sɔ̧ Jeremii bàá tɔ̧ so hɔɔ gba̧a̧; a̧ tɔ̧ɔ̧ so'e:

«Nɛ́ mɔ'ɔ nɛ̀ wa kaia kɔya-sede ɓu-taar,

gɛnɛ-a nɛ̀ wa gɔna'i nɛ́ mɔ‘i,

gɛnɛ-a nɛ̀ o be Israɛl gɔna nɛ́ mɔ‘i,#Zak 11.12-13

10ɓɛɛ wa hi̧fi nɛ̀ fɔ ko wi-ɓu-kpánà,

hee mɔ'ɔ nɛ̀ Gasa Wan bàá tɔ̧ so ha̧‘m nɛti ga.»

Pilat aka Jesu

(Zɔk Mk 15.2-5; Lk 23.3-5; Jn 18.33-38)

11Nɛ́ mɔ'ɔ nɛ̀ wa mgbɔɔ Jesu nɛnɛ ti Pilat, ɓɛɛ Pilat ak a̧: «Mɛ́ nɛ́ wannu ko o Juif nde?» Ɓɛɛ Jesu kifi nú: «Nɛ́ mɛ́ a̧ tɔ̧́.» 12O gasa wan-ɗafi-sɔ̧ in o gasawi dika wen a zu a̧, ɓɛɛ a̧ kifi nú na. 13Ɓɛɛ Pilat ak a̧: «Mɛ zii wen nɛ̀ o wi nɔ'ɔ tɔ̧ zu mɛ'ɛ na nde?» 14Jesu hu̧i̧ nú kóó tikiɗi na, ɓɛɛ mɔ‘i gɔna ɗɛɗɛ Pilat nyɛmna.

Wa gboo Barabas

(Zɔk Mk 15.6-15; Lk 23.13-25; Jn 18.39—19.16)

15Ɓɔnsɛnɛ kà gbaŋa Paska de, ɓɛɛ wannu gboo ŋma wi-zɔɓɔ nɛ̀ giiwi kɔ̧a̧ pi̧ nù. 16Ŋgimbi'i ŋma bíí nɛ̀ o bíí lɛŋ iŋa duka so kɔ̧́ zɔɓɔ, nin-a nɛ́ Barabas. 17Nɛ́ mɔ'ɔ nɛ̀ Pilat aka o giiwi nɛ̀ mɔi̧a: «Mgbara o Barabas in Jesu nɛ̀‘i sa'e Mɛsii, ɛ́nɛ́ kɔ̧ɔ̧ a̧‘m gbó nɛ́ o h’ɛ́nɛ́ o?» 18Wen Pilat iŋa'e, nɛ́ tɛ̀ aa-see-mɔ a̧ wa ee nɛ̀ Jesu er a̧.

19Pilat biti fara-kita, ɓɛɛ kóò kɔ̧-a̧ tom nɛnɛ ha̧ a̧‘e, ká a̧ pi̧ nú tɛ wen ko wi-de-mɔ nɛ̀ yuwar-a'i na, wen mɛ zɛ'ɛ wi ɔɔ ɗaŋ zu nyɛmna wen zu wi’ɛi.

20Nɛ́ mɔ'ɔ nɛ̀ o gasa wan-ɗafi-sɔ̧ in o gasawi aa wen ha̧ giiwi mɛ tɔ̧ ha̧ Pilat'e, a̧ a̧ gbó nɛ́ Barabas, ɓɛɛ nɛ̀ ko Jesu, a̧ a̧ gbɛ́ a̧. 21Pilat aka mɔ woyo: «Mgbara o wi nɔ'ɔ yiitoo’ɛ, ɛ́nɛ́ kɔ̧ɔ̧ a̧‘m gbó nɛ́ o?» Wa kifa nú: «Ɛ̀nɛ̀ gbó nɛ́ Barabas!» 22Ɓɛɛ Pilat ak wa: «Ɓɛɛ ko Jesu nɛ̀‘i sa'e Mɛsii’ɛ, a̧‘m dé bɔɔ nɛ́ ge in a̧ ge?» Wa lɛŋ kifa nú‘e: «A'i mgbóí a̧ zu te-diŋa!» 23Ɓɛɛ sa Pilat ak wa: «Nɛ́ ge ɗaŋmɔ ge á̧ a̧ dee ge?» Ɓɛɛ wa gai mɔ nɛ̀ ŋgaya-a gan kuti-a tɔ̧ nɛnɛ‘e: «A'i mgbóí a̧ zu te-diŋa!» 24Ɓɛɛ nɛ̀ Pilat zɔka mɔ ŋgai ŋgai siti, a̧ baa yì tai nɛ̀ er ti giiwi, ɓɛɛ tɔ̧ ha̧ wa: «Tɔk-tɛ wi’ɛ bo zu'm na. Nɛ́ wen k’ɛ́nɛ́ ɛ̧!»#Wee-ɗoŋ-he 21.6-9 25Ɓɛɛ giiwi kifi nú: «Simbo kɔ̧-a̧ a̧ tík zu yɛ in o bem k’ɛɛ!» 26Nɛ́ mɔ'ɔ nɛ̀ Pilat gboo Barabas, ba Jesu gusi, ɓɛɛ e a̧ er o bíí ha̧ wa mɛ nɛ̀ɛ́ mgboi a̧ zu te-diŋa.

Wa kara tɛnmɔ gu zu Jesu

(Zɔk Mk 15.16-20; Jn 19.2-3)

27Nɛ́ mɔ'ɔ nɛ̀ o wi-biro ko Pilat mgbɔɔ Jesu si kɔ̧́ ŋma bɛr-tua, ɓɛɛ wa mɔi̧ oi o dɔka wi-biro lɛŋ pii tɛ a̧. 28Wa kpɔ̧i̧a̧ laa tɛ-a yinɛ pi̧ nɛ́ gbɛ̧ laa ha̧ a̧. 29Wa kara tɛnmɔ gu zu-a, ba tòrò e er-a mɛ wiiko; ɓɛɛ wa gbɛ zugur nù ti a̧ zɛkɛɗi nɛ̀ a̧ tɔ̧ nɛnɛ‘e: «Ɛ̀nɛ̀ wór mɔ wa! Wannu ko o Juif!» 30Wa aa sap yí-a ɓɛɛ wa zuɗi tòrò er-a, gusi nɛ̀ zu-a. 31Wa zɛkɛɗa a̧ hegɔ kaɗi, ɓɛɛ wa kpɔ̧i̧ gbɛ̧ laa yinɛ pi̧ nɛ́ laa kɔ̧-a̧ tɛ-a woyo; nɛ́ mɔ'ɔ nɛ̀ wa mgbɔɔ a̧ yaknɛ mɛ nɛ̀ɛ́ mgboi a̧ zu te-diŋa.

Wa mgboia Jesu zu te-diŋa

(Zɔk Mk 15.21-32; Lk 23.26-43; Jn 19.17-27)

32Tɛ gboa-a, wa kpaa ŋma wi Sirɛn, nin-a nɛ́ Simɔŋ, ɓɛɛ wa ba a̧ nɛ̀ ŋgai ha̧ a̧ mɛ tui te-diŋa ko Jesu. 33Ŋgimbi nɛ̀ wa hɔɔ Gɔlgɔta mɛ kaɗi, mɛ̀ nɛ́ wen nɛ̀ tɔ̧ «Fara Koŋgoi-zu», 34wa ha̧a̧ dɔ̧ɔ̧ nɛ̀‘i zaŋa nɛ̀ ŋma kpɔra-mɔ ha̧ Jesu mɛ nɔ. A̧ wea ɓɛɛ a̧ e duk.#Gima 69.22

35Ɗoŋ nɛ̀ wa mgboia a̧ zu te-diŋa kaɗi, wa baa laa kɔ̧-a̧ bi nɛ̀ mbaɗi,#Gima 22.19 36ɓɛɛ wa ya hi̧i̧ pɛm nɛ̀ a̧. 37Wa yɔra mɔ nɛ̀ dea ha̧ a̧ mɛ fe wen-aa'i e zu-a hee mɔ'ɔ ga: «Wi’ɛ nɛ́ Jesu, wannu ko o Juif.» 38Wa hɛra o ŋma kpɔ̧i̧-gba̧a̧-nin yiitoo, kpɔk nɛ̀ war wii-er-a, ɓii-aa nɛ̀ war gale, kóó o ndé zu te-diŋa kɔ‘i.

39O wi nɛ̀ ɓir yak fara'i mia zu ɓɛɛ zɛkɛɗi a̧,#Gima 22.8; 109.25 40tɔ̧ nɛnɛ‘e: «Mɛ́ yàá-gbin Tua ko Sɔ̧ a nù ɓɛɛ ɗoŋ zɛ yiitoo, taar-a mɛ mboo lɛŋ woyo’ɛ, mɛ̀ kpásí tɛ-mɛ nɛ̀ tɛ-mɛ gɔ! Mɛ́ nɛ́ bòò nɛ́ Bem ko Sɔ̧, mɛ̀ zír zu te-diŋa’ɛ, h’ɛ́ɛ́ zɔk.»#Mt 26.61; Jn 2.19 41O gasa wan-ɗafi-sɔ̧ in o wi-usi-heembea ká bá nɛ̀ o gasawi zɛkɛɗa a̧ mbɛt, ɓɛɛ tɔ̧: 42«A̧ kpasa so o ŋma bíí, ɓɛɛ a̧ nyɛm mɛ kpasi tɛ-a nɛ̀ tɛ-a na. A̧ nɛ́ wannu ko Israɛl gɔ. A̧ a̧ zír zu te-diŋa’ɛ kinii, h’ɛ́ɛ́ kɔ̧ ɗɔaa ha̧ a̧! 43A̧ baa e ta nɛ̀ Sɔ̧; kà Sɔ̧ nɛ́ kɔ̧ɔ̧ a̧, ɓɛɛ a̧ a̧ kpás'a kinii, wen a̧ bàá tɔ̧ so'e, wi nɛ́ Bem ko Sɔ̧.»#Gima 22.9 44O kpɔ̧i̧-gba̧a̧-nin nɛ̀ wa hɛra zu te-diŋa katɛ a̧ da̧a̧ a̧ tɔ̧ nɛnɛ hegɔ mbɛt.

Fio ko Jesu

(Zɔk Mk 15.33-41; Lk 23.44-49; Jn 19.23-30)

45Ŋgimbi nɛ̀ wese hɔɔ see zu, tum baa nù fara lɛŋ hɔ gira-wese. 46Mɛ gira-wese Jesu hiɗa mɔ nɛ̀ ŋgaya-a ɓɛɛ tɔ̧: «Sɔ̧ kɔ‘m, Sɔ̧ kɔ‘m! Wen ge s’ɛnɛ ea'm duk ge nde?»#Gima 22.2 47O ŋma bíí nɛ̀ yaa fara'i zia hiɗimɔ‘i, ɓɛɛ tɔ̧: «A̧ sa nɛ́ Elii.» 48Nɛ́ mɔ'ɔ nɛ̀ ŋma bíí mgbara wa maa yì pi̧ saala ɗɔɔ kpa̧i̧a̧-mɔ, ɓɛɛ sɔk nú tòrò nyɛi̧ e nú Jesu ha̧ a̧ mɛ zɔɓi.#Gima 69.22 49Ɓɛɛ oi dɔka bíí tɔ̧ ha̧ wi’ɛi: «Mɛ̀ é kaŋ; ɛ̀ɛ̀ zɔ́k kà Elii nɛ́ tɛ̀ɛ́ tɛ̀ mɛ́ kpas'a.» 50Jesu hiɗa mɔ nɛ ŋgaya-a woyo, ɓɛɛ ɔmi yak.

51Tɛ́ ŋgimbi'i, babir-laa kɔ̧́ Tua ko Sɔ̧ mbaŋa nɛ̀ ŋgɔn hɔ ɗɔɔ; nɛ́ mɔ'ɔ nɛ̀ nù naka, o gasa ta mbaŋa;#Gboa-a 26.31-33 52o pɛsi-fio hu̧i̧a̧, ɓɛɛ o bíí ko Sɔ̧ nɛ̀ dɔka-a nɛ̀ fee so kur ŋgɔn, 53gbo zan, ɓɛɛ ɗoŋ kura-ŋgɔn ko Jesu wa yee saaye Jerusalɛm, ɓɛɛ bíí nɛ̀ dɔka-a zɔk wa.

54Wi-duk-zu o wi-biro gɔmŋmaa in o wi nɛ̀ yaa in a̧ pɛm nɛ̀ Jesu zɔka naka-nù in mɔ nɛ̀ yaka lɛŋ; bele zara wa, ɓɛɛ wa tɔ̧: «Wi’ɛ duka nɛ́ Bem ko Sɔ̧ nɛ̀ mbetɛ!» 55O gii okoo nɛ̀ tɛɛ so in Jesu nɛ̀ Galilee mɛ gbak a̧ yaa so nɛ̀ nyɛi̧a-a zɔk nɛ̀ mɔ.#Lk 8.2-3 56Marii Magdala, in Marii nàà ko Jak in Jozɛf, ká bá nɛ̀ nàà ko Jean in Jak a̧a̧ mgbara wa mbɛt.

Guna Jesu

(Zɔk Mk 15.42-47; Lk 23.50-56; Jn 19.38-42)

57Mɛ́ ga̧a̧mɔ ŋma wanmbɔi hɔa; a̧ nɛ́ be saaye Arimatee; wi’ɛi so nɛ́ ŋma ŋgaiwi ko Jesu mbɛt, nin-a nɛ́ Jozɛf. 58A̧ nɛ̀ɛ̀ tɛ Pilat mɛ ak wɔr Jesu, ɓɛɛ Pilat tɔ̧ ha̧ wa mɛ ha̧ ha̧ a̧. 59Nɛ́ mɔ'ɔ nɛ̀ Jozɛf baa wɔr Jesu, ye nɛ̀ bu ndɔmbɔ, 60ɓɛɛ bá nɛ́ɛ̀ gun sɛn kɔ̧-fio n'aa za̧a̧ so kɔ̧́ ta nɛ̀ mbe-a wen a̧ nɛ̀ tɛ-a. Nɛ́ mɔ'ɔ n'aa kina gasa ta kpe nɛ̀ nú kɔ̧‘i, ɓɛɛ a̧ yak. 61Marii Magdala in ɓii Marii yaa nù ká̧ fara'i zɔk nɛ̀ mɔ si nú pɛsi-fio.

62Nɛ̀ mɔ sa̧a̧ kaɗi, mɛ̀ nɛ́ wen mɛ tɔ̧ wese-ɔm-tɛ, o gasa wan-ɗafi-sɔ̧ in o Fariziɛn nɛ̀ɛ̀ kpa Pilat, 63ɓɛɛ tɔ̧: «Nyaa, tɛ-ɛɛ mbaŋa ɗoŋ ŋma wen nɛ̀ wi-ɔr-wi’ɛ tɔ̧ɔ̧ so ká a̧ tɛ fe na'e, ɗoŋ zɛ yiitoo, taar-a ɓɛɛ wi kura ŋgɔn;#Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33 64hegɔ, ɛ̀nɛ̀ tɔ̧́ ha̧ o bíí mɛ pɛm pɛsi sɛn tɛ zɛ taar, wen ká o ŋgaiwi kɔ̧-a̧ nɛ́ɛ̀ zu̧ wɔr-aa yaknɛ, ɓɛɛ ká wa tɔ̧ ha̧ o bíí‘e, a̧ kura ŋgɔn tɛ fio. Wen ká sɔŋkur ɔramɔ‘i tɛ gan wan mɛ ti.» 65Ɓɛɛ Pilat kifi nú ha̧ wa: «O wi-biro nɛ́ mɔɔ nɔ'ɔ, ɛ̀nɛ̀ pɛ́m pɛsi hee mɔ'ɔ n’ɛnɛ kɔ̧a̧ ga.» 66Nɛ́ mɔ'ɔ nɛ̀ wa nɛ̀ɛ̀ e tumbal ɗoŋ ta-kpe-nú kɔ̧-fio, ɓɛɛ wa a o wi-biro mɛ pɛm mɔ.

Currently Selected:

MATTHIEU 27: GB11DC

Highlight

Copy

Compare