Baroma 1

1Ndimi Paulo, nlanda wa Kirisiti Jesu ndakadang'wa kube ntumwa ndikashaluligwa ndebo mbuya ye Ndzimu, 2yawakagadzabgwe ntolo nge balebesambeli ne mu hwalo dzakayengemala, 3ili ndebo mbuya ngekwe Nkololo wawo, wakazwagwa ali tjizekugwana tja Dafite. 4Wakalakidziwa kuti nkololo we Ndzimu nge Meya yakayengemala ha emusiwa nge simba mu bafi, iye Jesu Kirisiti She wedu, 5watakaamutjila ngoni ne butumwa ndiye, kuti ndizo Bezwitjaba bose baamutjile bugalimoyo ngekwe zina lile, 6kudwiwa namwibo banodang'wa kuti mube ba Jesu Kirisiti.

7Ndokwalila bose Ndzimu bawunoda mu nzi we Roma bakadang'wa kube bayengemali nditi:

Ngoni ne kunyalala kunodwa ku Ndzimu Tate bedu na She Jesu Kirisiti kube namwi.

Ntembezelo wa Paulo we kuboka

8Tjekutanga ndoboka Ndzimu wangu nge zina la Jesu Kirisiti nge kwenyu mose, ngobe kugalamoyo kwenyu kolebgwa shango yose. 9Ngobe Ndzimu wandinoshingila nge moyo wangu wose ndisumikila ndebo mbuya ye Nkololo wawo, ntendeki wangu unoziba sekwa ndinomukumbula 10misi yose ha nditembezela, ndikumbila kuti nge imwe zila ngeda kwe Ndzimu nditubule kuzha kumuli. 11Ngobe ndoyemula kumubona, kuti ndimukobele tjipo tje tjimeya kumusimisa, 12kuti ndizo tikulumbidzane nge kugalamoyo kwedu, imi nge kwenyu, namwi nge kwangu.

13 # Mishingo 19:21 Ndoshaka kuti muzibe etji zwikamu, ndikanjinji* nditi ndozha kumuli koga kuna zwinomanikanya kuti ndivune zwizwalo, mu muli ne muna bose Bezwitjaba. 14Ndakasungika kusumikila ndebo mbuya, ku Bagiriki ne kubamwe basi Bagiriki, kuna bakatjenjela ne kuna basakatjenjela. 15Ndizo, ndina nyota ye kusumikila ndebo mbuya kumulibo imwi baku Roma.

Ndebo mbuya ina simba

16 # Mako 8:38 Anditobhatisiwa shoni nge ndebo mbuya, ngobe i simba le Ndzimu kutjidza mmwe ne mmwe unogalamoyo, ku Bajuta kutanga kunoti ne kuna Bezwitjaba. 17#Habakuku 2:4Ngobe mu ndebo iyeyi ndulamo ye Ndzimu inozumbunugwa nge kugalamoyo, sekwa kwakakwagwa kuyi, “Iye wakalulwamisiwa nge kugalamoyo unowotjila.”

Bathu bose bana nlandu mu mesho e Ndzimu

18Bushongola gwe Ndzimu gozumbunugwa gudwa kudzimu gudelukila bose babi nenge mbipo ye bathu banodzibila malebeswa nge mbipo yabo. 19Ngobe tjingazibgwa ngekwe Ndzimu tjipatjena ku bali, ngoti Ndzimu wakabalakidza itjo. 20Tjinga Ndzimu kwawakabumba shango, mbumbiko yawo isingaboneke ne simba lawo lisingapele ne budzimu gwawo zose izwezwi zwakatjeneseka zubuyanana mu zwithu zwakabumbiwa. Ndizo bathu abana tjabangabhatila patjili. 21#Baefeso 4:17, 18Ngoti nenguba bakabe beziba Ndzimu abazoukudza se Ndzimu kene kuli kuuboka, koga zose zwabanoalakana azwina nshingo, bakafa meya, mikumbulo yabo izhalima. 22Nenguba bezwidwa beti bakatjenjela, koga bazwilengwe, 23#Matama 4:16-18mu bumo gwekuti bakudze Ndzimu usingalobe, banokudza zwifano zwakathamiwa se nthu unoloba kene se nyuni kene se phuka kene zwitjili zwinosoba na pasi.

24Ndizo Ndzimu wakaletja bathu ibabo kushinga zwithu zose zwe shambgwa zwinoyemugwa nge mimoyo yabo, ngono banothamana zwinobhatisa shoni nge mibili yabo. 25Ngoti banotenganya malebeswa ngekwe Ndzimu nge manyepkhwa, bakanamata kakale bakashingila tjibumbiwa mu bumo gwe Mbumbi iye wakafanila kudziwa nge kusingapele! Ngakujalo.

26Ngekwa ikoku, Ndzimu wakabaletjedzela mu njemulo dzabo dzinobhatisa shoni. Ne bakadzi babo bakashandulila yendiso yakawolobeleka ye kuwalilana kuna isakawolobeleka. 27Ne balumebo bakaletja zila yakawolobeleka yekuwalilana ne bakadzi ngono bakawalilana tjekwabo. Balume banothama mishingo inobhatisa shoni ne bamwe balume. Ngekwa ikoku banoamutjila mbhayilo we shamu wakabafanila.

28Ngono ngekuti abazowana kwakafanila kuti bazibe Ndzimu, wakabaletja bali mu mikumbulo yabo yakabola, kuti bashinge zwithu izwezo zwabasakafanila shinga. 29Bazhele zila dzose dze bubi, ne kusalulwama ne bugovu ne bubi, bazhele fupa ne kubulaya ne kugwa ne kutjebela ne sudze. Bana bung'wa, 30ngono banolebelana bubi, banobenga Ndzimu, bana masapa, banozwida, bezwikudza, banokumbula zila njinji dze kushinga bubi abatohwa bazwadzi babo. 31Abana mikumbulo kakale abatogalikabgwe, abatolakidza buthu kene kuhwila bamwe zogwadza. 32Nenguba beziba nlayo we Ndzimu, kuti banothama zwakajali bakafanigwa nge lufu, abatothama izo koga, koga banolumbidza bamwe kuzwishingabo.

Currently Selected:

Baroma 1: KBTP

Highlight

Compare

Copy