Baroma 2

Sumikilisa kwe Ndzimu kwakalulwama

1 # Matewu 7:1; Luke 6:37 Ndizo iwe unosumikilisa bamwe, auna tjaungabhatila patjili, kene uli ani; ngobe ha usumikilisa bamwe, ngono ube uthama izwezobo zwabanothama unozwisumikilisa. 2Toziba kuti kusumikilisa kwe Ndzimu kwakalulwamila ibabo banothama zwithu zwakajalo ngobe ku malebeswa. 3Ngono iwe, nthu koga unosumikilisa bamwe koga uzwithamabo. Apa unokumbula kuti unowodzeta kusumikilisa kwe Ndzimu kene? 4Kene unolingila pasi nzhazho wawo nkulukulu ne moyo wawo nyolo ne moyo wawo nlefu? Apa autoziba kuti nzhazho we Ndzimu wakathamigwa kukutungamilila mu kushandukila matjinyo awo? 5Koga ngekwe bukomba gugo nenge moyo uwo nkukutu kushanduka, unozwibiganyidzila shamu mu zhuba linowoti bushongola gwe Ndzimu ne kusumikilisa kwawo kwakalingisana kukazumbunuka. 6#Njimbo 62:12; Makungulupeswa 24:12Ngobe Ndzimu unowopa mmwe ne mmwe mbhayilo kuyendidzana ne mishingo iye. 7Ibabo banodwilila nge moyonlefu beshinga ndulamo ngono beshaka kukudziwa ne kutetiwa ne kusafa, ibo Ndzimu unowobapa butjilo gusingapele. 8Koga ibabo banozwialakana boga, ngono basingahwe malebeswa, koga betobela bubi, Ndzimu unowobagwadzilamoyo ukabe ne bushongola mu bali. 9Kowobepo kudziyila ne kuhwazogwadza mu bali bose ibabo banoshinga bubi, kutanga ne Bajuta kukoti kuna Bezwitjaba. 10Koga kowobe ne kukudziwa ne kutetiwa ne kunyalala ku bali bose banoshinga ndulamo, kutangisa nge Bajuta kukoti Bezwitjaba, 11#Matama 10:17ngobe Ndzimu auna shalaulo.

12Bose bakatjinya kusina nlayo, banowoloba kuzhe kwe nlayo, koga bose banotjinya bali pasi kwe nlayo banowosumikilisiwa nge nlayo. 13Ngobe ate kuli banohwa nlayo, banobe balulwami mbeli kwe Ndzimu, koga nge banolondolodza nlayo ndibo banolulwamisiwa. 14Ha Bezwitjaba ibo basina nlayo beshinga nge kwabo zwabo tjinoshakwa nge nlayo, ba nlayo nge kwabo, nenguba basakapiwa nlayo. 15Banolakidza kuti tjinoshakwa nge nlayo tjakakwagwa mu mimoyo yabo, ha hana dzabo dzipabo butendeki ne njalakang'wa dzabo tjimwe tjibaka dzibatilika nlandu koga tjimwe tjibaka dzibamila, 16mu zhuba Ndzimu usumikilisa nthu uzumbunula zwakasumbikala ndi Kirisiti Jesu, sekwa kuli iko mu ndebo mbuya yangu.

Nlayo unolebani ngekwe Bajuta?

17Koga ha uzwidana Njuta wakabiga mu nlayo, uzwikudza ngekwe buzwalani gugo ne Ndzimu 18kakale uziba Ndzimu tjaunoshaka wakadiyiwa mu nlayo tjakalulwama, 19ngono ha una malebeswa kuti u nkwebi we mapofu, u tjedza tje bamu zhalima, 20u nlayi we zwilengwe ne n'diyi we batjetjana, ngobe una nlayo unoziba tjimwe ne tjimwe nge buzhalo kakale tjaunoleba malebeswa. 21Iwe ngono unodiya bamwe autozwidiya kene? Iwe unodiya bamwe uti basikwibe, apa iwe unokwiba kene? 22Iwe unoti bathu basithame bupombgwe, apa unothama bupombgwe kene? Unoshima midzimu yakabezhiwa, koga apa unokwiba mu ng'umba dze midzimu yakabezhiwa kene? 23Iwe unozwikudza ngekwe nlayo, apa unolengudza Ndzimu ngokutjuluka nlayo kene? 24#Isaya 52:5Ngobe kwakakwagwa kuyi, “Zina le Ndzimu losapugwa nge Bezwitjaba nge kwenyu.”

25Kuthumbigwa kuna nshingo ha ulondolodza nlayo, koga ha usingalondolodze nlayo kuthumbigwa kuko kowobe kusi kuthumbigwa. 26Ndizo ha nthu usakathumbigwa elondolodza nlayo, apa kusathumbigwa kukwe akutowotogwa se thumbigwa kene? 27Ngono ibabo basakathumbigwa koga belondolodza nlayo banowokubona nlandu iwe una nlayo wakakwagwa kakale wakathumba koga usingalondolodze nlayo. 28Njuta wakwako ate Njuta tjakuzhe koga ne buthumbi gwe malebeswa ate gwakuzhe koga kakale guli gwe mbili. 29#Matama 30:6Njuta wakwako Njuta tja mukati ne buthumbi gwe malebeswa ngegwe moyo, gwe Meya ate gwakakwagwa koga mu nlayo. Nthu wakajalo unokudziwa nge Ndzimu, kusi nge bathu.

Currently Selected:

Baroma 2: KBTP

Highlight

Compare

Copy