Baroma ZIBISO NGEKWE LUKWALO IGOGU
ZIBISO NGEKWE LUKWALO IGOGU
Lukwalo gwa Paulo ekwalila Baroma wakagukwala ezibisa kuti unowokumba gubungano la Kirisiti* liku Roma. Mazwimisilo awe akabe ili kunokulumbidza Bakirisiti ikoko lubaka gufutshwanana, ebe epindila ku Sipeini nge bhatsho yabo. Wakakwala etjenesa ngekwe bugalimoyo gwe Nkirisiti ne sekwa gungatungamila Bakirisiti kutjila butjilo gwakalulwama. Lukwalo igogu gwakafuma zwidiyo zwe bugalimoyo.
Shule kwe kudumilisa gubungano la Kirisiti li ku Roma nenge kubabudza sekwa anobatembezelela, Paulo unobalakidza itjo tjaanoleba nge kwatjo mu lukwalo, “Ngobe mu ndebo iyeyi ndulamo ye Ndzimu inozumbunugwa nge kugalamoyo” (Baroma 1:17).
Paulo unodwilila etjenesa sa ikoku. Bathu bose, Bajuta ne Bezwitjaba bakafanila kululwamisiwa nge Ndzimu, ngobe bathu bose bapasi kwe simba le tjibi. Bathu banolulwamisiwa nge Ndzimu nge bugalimoyo muna Jesu Kirisiti. Kudwa ipapo Paulo unodwilila etjenesa ngekwe butjilo gutshwa mu bung'ompela na Kirisiti gunodwa mu kube mwana we Ndzimu. N'galimoyo watjibe nge kunyalala ne Ndzimu kakale wasunungugwa nge Meya ye Ndzimu mu simba le tjibi nenge lufu. Mu ndima ye bushanu kunoti ye buzhanakadzi (5—8) Paulo unolebabo ngekwe nshingo we nlayo* nenge simba le Meya ye Ndzimu mu butjilo gwe n'galimoyo. Ipapo Paulo unolebeleka kwazo kuti Bajuta ne Bezwitjaba banongina tjini mu ndongoloso ye kutjidza bathu yabakathamigwa nge Ndzimu. Unopeleledza ngekuti kulambiwa kwa Jesu nge Bajuta kumu ndongoloso ye Ndzimu ye kuzhisa bathu bose mu ngoni dze Ndzimu dzimuna Jesu Kirisiti, kakale unoduma kuti Bajuta abatowolamba Jesu tjose.
Tje bupelo Paulo unokwala ngekwe butjilo gwe Nkirisiti sekwa akafanila tjila, kwazo kwazo ngekwe zila ye ludo mu kushingidzana ne bamwe. Unoleba ngekwe kushingila Ndzimu, nshingo unoshingwa nge Bakirisiti beshingila balauli be shango ya kanyi kwabo nenge kubhatshana kwe Bakirisiti nenge kwe njalakang'wa. Unopeleledza lukwalo gugwe nge dumiliso dzidze nenge matama anokudza Ndzimu.
Zwimu lukwalo igogu nge bufupi
Matama e kutanga e lukwalo nenge tjagunoleba 1:1-17
Ini bathu bakafanilo tjidziwa 1:18—3:20
Zila ye Ndzimu ye kutjidza 3:21—4:25
Butjilo butshwa muna Kirisiti 5:1—8:39
Iziraela mu ndongoloso ye Ndzimu 9:1—11:36
Mazwiibhato e Tjikirisiti 12:1—15:13
Matama e bupelo 15:14—16:27
Currently Selected:
Baroma ZIBISO NGEKWE LUKWALO IGOGU: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.