Mbalo 14
14
Bathu banodudumwa ngekwa Mushe na Aroni
1Ipapo gubungano lose lakadila guwo, bakalala belila busiku gose. 2Bakabe beng'ong'ola ngekwa Mushe na Aroni beti, “Kobe kuyita atakabe takafila mu shango ye Egipiti, pana kuti tiwofila mu tjilambanyika itjetji! 3Apa ini Yahwe bangatizhisa mu shango iyeyi, kuwobulawa nge thumo kene? Bakadzi bedu ne bana bedu bawotapiwa, apa akungayite atingabgwilila ku Egipiti kene?”
4Ngono bakalebesana bakati, “Atizwishalulileni ntungamili tibgwilileni ku Egipiti!” 5Ndizo Mushe na Aroni bakathigama bakakotamisa misholo mbeli kwe gubungano lose le Baiziraela. 6Ngono Joshuwa nkololo wa Nuni na Khalebu nkololo wa Jefune, bamwe be bakabe banoshola shango, bakapalula zwiambalo zwabo. 7Bakadwa gubungano lose le Baiziraela bakati, “Shango yatakapalama kunoishola i shango yakanaka kwazo kwazo. 8Ha Yahwe bangatishathila, banowotikotosa muili bakatipa iyo, shango inowunga nkaka ne butji gwe nyutji. 9#Bahebheru 3:16Koga musitongopandukila Yahwe, kakale musitongotja bathu be shango iyeyije, bamu maboko edu, kubakiligwa kwabo kwakadusiwa mubali, kakale musitongobatja, Yahwe banaswi.” 10Ipapo gubungano lose likalebesana kuti libakikitidze nge mabgwe bafe. Ngono tjinyolotjo tjedza tja Yahwe tjikazwilakidza pezhugwi kwe nshasha we bushanganilo mu bathu bose be Iziraela.
Mushe unotembezelela Baiziraela
11Yahwe bakadwa Mushe bakati, “Apa kowodza kukabe lini bathu ibaba bendilengudza kene? Kowodza kukabe lini basingagale moyo mundili, pezhugwi kwe zwilakidzo zose zwingapa zwandakabathamila kene? 12Ndowobabulaya nge bugwele, ndibe ndibadusa mu thaka, ngono ndowothama ludzi lukulu ndiwe kakale gwakasima kubapinda.”
13 #
Kufuluka 32:11-14
Mushe kadwa Yahwe kati, “Makadusa bathu ibaba mu Egipiti nge simba lenyu; ngono ha Baegipiti bangahwa tjamathama bathu benyu, 14banowobudza bagali be shango iyeyi. Bathu ibaba bakahwa kale kuti munaswi, imwi Yahwe ne kuti mobong'wa muli patjena ha gole lenyu lima lakaangama pezhugwi kwedu ne kuti moyenda makatitungamila nge gole kuli masikati nenge moto kuli busiku. 15Ngono ngwenu, ha mungalobesa bathu bose ibaba, shule kwa ikoku zwitjaba zwakahwa ngekwe tjibombo tjenyu zowoti, 16‘Ngoti Yahwe bakong'wa kunokotosa bathu ibaba mu shango yabakatuna beti banowobapa iyo, ndizo babalobesa mu tjilambanyika.’ 17Ngono ngwenu, ndomutembezela Tetshi wangu, thamani kuti simba la Yahwe libe gulu sekwa makagadzabgwe, muti, 18#Kufuluka 20:5, 6; 34:6, 7; Matama 5:9, 10; 7:9, 10‘Yahwe banononoka kuzhala bushongola, kakale bazhele ludo gusingazunguzike, banozwiibhatigwa jinyo ne bupanduki, koga abatowosunungula una nlandu ndodwa, banolobela bana matjinyo abo tate babo kunoti ku tjizekugwana tje butatu ne tje bunna.’ 19Ndomutembezela Yahwe, muzwiibhatigwe jinyo le bathu ibaba kuyendidzana nge ludo gwenyu gusingazunguzike, ne kuyendidzana na sekwa makabazwiibhatigwa kudwa ku shango ye Egipiti kudzina kowobe nasi.”
20Ipapo Yahwe bakadabila beti, “Sekwa wakumbila, ndabazwiibhatigwa, 21#Bahebheru 3:18koga tjoselele se nditjila, ne shango yose sekwa yawozhala gudzo langu, 22Bathu bose bakabona gudzo langu ne zwilakidzo zwangu zwandakathama mu Egipiti ne mu tjilambanyika, ngono bakandilika ka gumi bakasihwilile dama langu, 23Akuna wabo unowobona shango yandakagadzabgwe bobatategulu babo, kakale akuna wa ibabo bakandilengudza unowoibona. 24#Joshuwa 14:9-12Koga nlanda wangu Khalebu, ngoti akabe nge meya isingafanane neye bamwe kakale kandihwilila, ndononkotosa ku shango yaakanoshola, ne zwizekugwana zwizwe zowothuwa shango iyeyo. 25Sakuno, se Baamaleki ne Bakanana begala mu mikuku, mangwana mushanduke mu ngine mu tjilambanyika nge zila inoyenda ku Gungwa Shaba.”
Yahwe banolobela bathu ng'ong'ola
26Yahwe bakadwa Mushe na Aroni bakati, 27“Apa kowodza kukabe lini gubungano ileli lakakombama ling'ong'ola nge kwangu kene? Ndakahwa ndebeleko dze Baiziraela, dze kung'ong'ola kwabo. 28Ngwenu ubadwe uti, ‘Tjoselele se nditjila, ndowomuthamila sekwa makaleba mulonga mu zebe dzangu, koleba Yahwe. 29#Bahebheru 3:17Zwitumbu zwenyu zowoandama mu tjilambanyika itjetji, kudwa muna be makole ali makumi mabili bakazwagwa kuyenda pezhugwi akuna unowongina mu shango iyeyije. 30Akuna ne nng'ompela wenyu unowoswika mu shango yandakatuna nditi ndowomugadza muili kuzhe kwa Khalebu nkololo wa Jefune na Joshuwa nkololo wa Nuni 31Koga bana benyu bamakati banowotapiwa, ndowobakotosa, banowoziba shango yamakalamba. 32Koga imwi mowofa zwitumbu zwenyu zwika kandalala mu tjilambanyika itjetji. 33#Mishingo 7:36Bana benyu banowodzungayila mu tjilambanyika bali balisi kwe makole ali makumi manna (40), bedziyilila matjinyo enyu, kudzina nfi we bupelo itumbu tjitje tjiwila mu tjilambanyika. 34Kuyendidzana nge mazhuba amakapalama shango muishola ali makumi manna (40) zhuba ling'ompela limwe ne limwe limilile gole, ngono mowosenga matjinyo enyu makole ali makumi manna (40). Ndiko kwamunowoziba kuti ku gwadza moyo kwangu kodwani! 35Imi Yahwe, ndiko ndaleba, oku ndiko kwandinowothama mu gubungano lose ileli libiibi lakakubunganila kundipandukila. Banowoswika pa bhelelo labo mu tjilambanyika itjetji, banowofila ipapo.’ ”
36Ipapo balume bakabe batumwa ndi Mushe kunoshola shango, bebe bezha bethama gubungano kuti li dudumwe ngekwa Yahwe ngopa mbiko ye manyepkhwa, 37bakalobesiwa mbeli kwa Yahwe. 38Joshuwa nkololo wa Nuni na Khalebu nkololo wa Jefune ndibo boga bakasala pafa, mu balume bakabe banoshola shango.
Baiziraela banotanga kuthasela
(Matama 1:41-46)
39Kukati Mushe ebikila bathu be Iziraela bose matama iyawa, bakalila tjililo tjikulu. 40Bakabinduka, bakatathila ku shango ye matombo, bakabe beti, “Tipano, ngatiyendeni kwatakagadziwabgwe ndi Yahwe, ngobe takatjinya.”
41Koga Mushe kabadwa kati, “Apa ini mutjuluka ndaulo ya Yahwe ngono kusina tjinowopunduka.” 42Musiyende, zwita zwenyu zonomukulila, Yahwe abate bali mile namwi. 43Mowonofila mu maboko e Baamaliki ne Bakanana, mowolobesiwa nge thumo, ngobe moshandukila Yahwe, Yahwe abangame namwi. 44Koga nge misholo yakawoma bakatathila ku shango ye matombo, nenguba kwakajalo Bhokisi le Tjidumano tja Yahwe basinalo, kene iye Mushe kasibhude mu bukotokelo. 45Ipapo Baamaliki ne Bakanana bakabe begala mu shango iyeyo ye matombo bakadeluka bakagwa nabo, bakabakulila bakatatana nabo bakanobasiya ku Horima.
Currently Selected:
Mbalo 14: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
