Mbalo 15
15
Milayo ngekwe zwibhayilo
1Yahwe bakadwa Mushe bakati, 2“Idwa bathu be Iziraela uti, ‘Kuti maswika mu shango yandinomupa, 3muduse tjipo tje ng'ombe kene pkhwizi kene mbudzi mutjipe Yahwe. Tjili tjibhayilo tjinopisiwa, kene tjili tjinozhadzisa kutuna kwenyu kene tjili tjemoyo ntjena, kene mu nzano kuthamila Yahwe tjibhayilo tjinopisiwa nge moto kube nnuhwo unonuhwa zwinozipa ku bali. 4Ngono unodusa tjipo tjitje, adusile Yahwe tjipo tje mathunde mu ithuwo tjimwe ne tjimwe tjaanodusa adusilanye ne seme ing'ompela ye bgwisa gwakanathiwa gwakashanganyiwa ne mafuta, ali zhele lithara ing'ompela tjili tjipo tje mathunde. 5Tjibhayilo tje pkhwizi tjimwe ne tjimwe tjinopisiwa tjiyisiwe ne lithara ing'ompela ye nkumbi we zhambi. 6Tjibhayilo tje nyundo, tjidusigwanyiwe ne seme ing'ompela ye bgwisa gwakanathiwa ne lithara ina gaswa ye mafuta e ntjelo we ntoba kube tjipo tje mathunde. 7Ngono tjipo tje tjing'o tjibe gaswa le lithara. Nnuhwo we zwibhayilo izwezwi unowobe nnuhwo unonuhwa zwinozipa kuna Yahwe. 8Ngono ha ululwamisa nkono kube tjibhayilo tjinopisiwa, kene tjibhayilo tjinozhadzisa kutuna, kene tjipo tje mbakisano kuna Yahwe, 9uwupeleke ne tjipo tje mathunde tje tjilizanyo tje seme dzili thatu dze bgwisa gwakanathiwa gwakashanganyiwa ne lithara mbili dze mafuta, 10ne tjipo tje tjing'o kuli lithara mbili dze nkumbi we zhambi, tjili tjipo tjinopisiwa mu moto kube nnuhwo unozipa kuna Yahwe.’ ”
11“ ‘Kuthamigwe nkong'wana mmwe ne mmwe, kene nyundo imwe ne imwe, kene pkhwizana ndume imwe ne imwe, kene mbudzana ndume imwe ne imwe, kuiyago. 12Kuyendidzana nge mbalo iyeyo yamunolulwamisa, mowothamila tjimwe ne tjimwe ithuwo kuyenda nge mbalo yazo. 13Batebe bose be Baiziraela banowothama zwithu izwezwi nge zila yakajalo mukudusa tjipo, tjili tjipo tjinopisiwa mu moto kube nnuhwo unozipa kuna Yahwe. 14Ngono ha ntaya unobe awolubila kene ugelile tjatjose namwi kuyenda nge zwizekugwana zwenyu zose, ebe eyemula kudusa tjipo tjinopisiwa mu moto kube nnuhwo unozipa kuna Yahwe, athamebo sekwa munothama. 15Mu gubungano, ndaulo ibe ing'ompela mu muli ne mu ntaya unobe egala namwi, ibe ndaulo nge kusingapele kuyenda nge zwizekugwana zwenyu, sekwa kuli iko mu muli, ne mu ntaya kuijalobo mbeli kwa Yahwe. 16#Zwipo 24:22Kube nlayo nng'ompela ne ndaulo ing'ompela mu muli ne mu ntaya unobe elubila mu muli.’ ”
17Yahwe bakadwa Mushe bakati, 18“Lebeleka ne bathu be Iziraela ubadwe uti, ‘Ha maswika mu shango yandinomupa, 19ngono ha muja zojiwa zwe shango iyeyo, makafanila dusila Yahwe tjipo. 20Mu tjiwunga tje bgwisa gwe kutanga madwa pa shokola muduse tjibhayilo tje tjiwunga, mutjiduse tjili tjipo tjinodwa mu lutombo. 21Mu tjiwunga tje kutanga tjabhikwa madwa pashokola, mupe Yahwe tjipo mutjili, kuyenda nge zwizekugwana zwenyu zose.’ ”
22“ ‘Koga ha mungazwiwana mapambuka mukulondolodza mimwe milayo Yahwe yabakadwa Mushe, 23milayo yose yaka lauligwa Mushe ndi Yahwe, kudwa mu zhuba Yahwe labakampa ndaulo kudwa shule kuzwizekugwana zwenyu, 24ipapo ha gubungano lakaleyanya ngosaziba, gubungano lose liduse nkong'wana we tjibhayilo tjinopisiwa, kuthama tjibhayilo tjithamwa nge moto kube nnuhwo unonuhwa zwinozipa kushathisa Yahwe, ne tjipo tje mathunde ne tje tjing'o, kuyenda nge nlayo, ne mbudzi ing'ompela ye phoko ye tjibhayilo tje tjibi. 25Ngono mpirisiti unowothamila gubungano lose le bathu be Iziraela gadzano na Yahwe, ngono Yahwe banowobazwiibhatigwa. Se bakabe baleyanya ngosaziba, bebe bedusa tjibhayilo tjinopisiwa nge moto kupiwa Yahwe, ne tjibhayilo tje tjibi mbeli kwa Yahwe, bethamila leyanywa kwabo. 26Gubungano lose le Baiziraela lowozwiibhatigwa, ne bataya babanogala nabo, ngobe itjaba tjose tjakabe tjaleyanya ngosaziba.
27 #
Zwipo 4:27-31
“ ‘Ha nthu nng'ompela atjinya ngosaziba, aduse mbudzi hadzi ing'ompela ina gole ling'ompela ye tjibhayilo tje tjibi. 28Mpirisiti unowothamila nthu iwoyo wathama nlandu ngosaziba gadzano mbeli kwa Yahwe, ngono Yahwe banowonzwiibhatigwa. 29Nlayo wenyu ube nng'ompela mu ntebe upakati kwe bathu be Iziraela kene banolubila mu muli, banowobe bathama nlandu ngosaziba.
30“ ‘Koga nthu unothama tjibi mwaza, ungabe ntebe kene nlubili, etuka Yahwe, nthu uwoyu abulawe mu gubungano le Iziraela. 31Ngobe alengudza dama la Yahwe, kavuna nlayo wabo, uwoyu nthu abulawe tjoselele, jinyo lile lowobe mu mathudzi awe.’ ”
Nthu usalondolodza nlayo we Sabata
32Kwakati Baiziraela batji mu tjilambanyika, bakawana nthu eshaka hwuni nge zhuba le Sabata. 33Ngono ibaba bakan'wana eshaka hwuni bakantola bakan'yisa kuna Mushe na Aroni, ne ku gubungano lose. 34Kazhaliligwa akalisiwa, ngobe kwakabe kusathu kukazibgwa kuti ungaying'wi. 35Yahwe bakadwa Mushe bakati, “Nthu uwoyo ngaabulawe, gubungano lose linkikithidze nge mabgwe kuzhe kwe bukotokelo. 36Ipapo gubungano likantolela kuzhe kwe bukotokelo, likankikithidza nge mabgwe kafa Yahwe sekwa bapa Mushe ndaulo.”
Nlayo we mahadzwana mu hazu
37Yahwe bakadwa Mushe bakati, 38#Matama 22:12“Idwa Baiziraela uti, ‘Muzwithumile mahadzwana mu mipeto ye hazu dzenyu, mube mulunjila nsungwana we mbala we makole mu hadzwana limwe ne limwe. Mukuthame kuyenda nge zwizekugwana zwenyu nge kusingapele. 39Ngono mowotimulinga ku mahadzwana mowokumbula milayo ya Yahwe yose, kuihwilila, musingatobele njemulo dzenyu ne sekwa munobona zwithu ndiko, zwamunotobelela muthama sekwa munoshaka. 40Mahadzwana anowomukumbuludza mukahwilila milayo yangu yose, mukabe bakayengemala ku Ndzimu wenyu. 41Ndimi Yahwe Ndzimu wenyu, wakamudusa ku shango ye Egipiti, kube Ndzimu wenyu, ndimi Yahwe Ndzimu wenyu.’ ”
Currently Selected:
Mbalo 15: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
