Mbalo 13
13
Shodzi mu shango ye Kanana
(Matama 1:19-33)
1Yahwe bakadwa Mushe bakati, 2“Tola bamwe batungamili mu njudzi dzili gumi lina mbili dze Iziraela ubatume bayende banoshola shango ye Kanana, yandinopa Baiziraela.” 3Nge ndaulo ya Yahwe Mushe katuma shodzi dzidwa mu tjilambanyika tje Parani. Bose bakabe bali batungamili be Baiziraela. 4Awa ndiwo mazina abo; kudwa mu ludzi gwa Rubheni ndi Shamua nkololo wa Zakhuri; 5kudwa mu ludzi gwa Simiyoni ndi Shafati nkololo wa Hori; 6kudwa mu ludzi gwa Juda ndi Khalebu nkololo wa Jefune; 7kudwa mu ludzi gwa Isakari ndi Igali nkololo wa Josefa; 8kudwa mu ludzi gwa Ifureimi ndi Hosheya nkololo wa Nuni; 9kudwa mu ludzi gwa Bhenjamini ndi Paleti nkololo wa Rafu; 10kudwa mu ludzi gwa Zebuluni ndi Gadieli nkololo wa Sodi; 11kudwa mu ludzi gwa Josefa igo gwa Manase ndi Gadi nkololo wa Susi; 12kudwa mu ludzi gwa Dani ndi Amiyeli nkololo wa Gemali; 13kudwa mu ludzi gwa Asheri ndi Sethuri nkololo wa Mikaele; 14kudwa mu ludzi gwa Nafutali ndi Nahibhi nkololo wa Vofisi; 15kudwa mu ludzi gwa Gadi ndi Geuele nkololo wa Maki. 16Awa ndiwo mazina e balume bakabe batumwa ndi Mushe kunoshola shango. Mushe katumila Hosheya nkololo wa Nuni zina linoyi Joshuwa.
17Kwakati Mushe ebatuma kunoshola shango ye Kanana kabadwa kati, “Yendani ku Negebu, mube mutathila mu shango ye matombo. 18Mubone kuti i shango yakatini, ne kuti bathu bagele muili bakasima kene abazosima, kakale mubone kuti bashomanana kene banjinji. 19Mubone kuti shango yabagele yakanaka kene yakabipa ne kuti kene mizi yabagele yakabakiligwa kene ayizobakiligwa nge luswingo. 20Mubone kene i shango ina mavu akakola kene asakakola, ina miti kene isina. Mutjele mimwe mitjelo ye shango iyeyo muyisenge muzhe nayo. Ipapo kwakabe kuli tjibaka tje mitjelo itangisa kubidwa.”
21Ipapo bakayendila pezhugwi bakashola shango kudwa mu tjilambanyika tje Zini kunoti ku Rehobu, pejo nge nkoba we Hamati. 22Bakayendila pezhugwi mu Negebu, bakanoswika ku Heburoni; pakabe pegala Ahimani na Sheshayi na Talemayi, zwizekugwana zwa Anakimu. (Heburoni yakabakiwa makole ali kutendeka itangila Zoani ku Egipiti.) 23Bakaswika ku Nkuku we Eshikholi, bakathubula lutabi gwe nzhambi, bakagusenga bakagupikisana nge bhangwana bali babili, bakazha ne mitjelo ye pomegiranate ne phaya. 24(Pathu ipapo pakadang'wa Nkuku we Eshikholi#13:24 Eshikholi: Zina ileli nge Tjihebhuru lodwa kuti lutabi gwe zhambi. ngobe Baiziraela bakathubula lutabi gwe nzhambi po.)
25Bakashanduka shule kwe mazhuba ali makumi manna (40) bedwa kunoshola shango. 26Bakaswika kuna Mushe na Aroni ne gubungano lose le Baiziraela mu tjilambanyika tje Parani, ku Kadeshi, bakababikila sekwa bakayenda, bebuya bebalakidza mitjelo ye shango yabazha nayo. 27Bakadwa Mushe bakati, “Takaswika ku shango yamakatituma ko, malebeswa inowunga nkaka ne butji gwe nyutji! Eyi ndiyo mitjelo yayo. 28Nenguba kwakajalo bathu bagele mu shango iyeyije bakasima, ne mizi yabo yakabakiligwa nge luswingo kakale mikulu kwazo, kakale takabona zwizekugwana zwa Anakimu ikweno. 29Baamaleki banogala mu shango ye Negebu; Bahiti ne Bajebusi ne Baamori banogala mu shango ye matombo; Bakanana banogala pejo ne gungwa, mu supho we gwizi gwe Jorodani.”
30Khalebu kanyaladza bathu mbeli kwa Mushe, kabadwa kati, “Ngatiyendeniko tjinyolotjo tinoitapa, takazwilizanila, towobakulila.” 31Koga balume bakabe bayenda na Khalebu bakan'dabila beti, “Atingatubule kunogwa ne bathu ibabaje, ngobe bakasima kutipinda.” 32Ndizo bakabikila Baizaraela mbiko isi iyo ngekwe shango yabakabe banoshola beti, “Shango yatakapalama tiishola, i shango inoja bagali bayo, ne bathu batakabona muili balume bakakulila pezhugwi. 33#Kutangisa 6:4Kakale takabona makwelemba ikweno, zwizekugwana zwa Anakimu, tikazwibona tili batukununu se zwipombobushwa, ndiko sekwa takafanila kuzwilinga mubali.”
Currently Selected:
Mbalo 13: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
