Ma tchi wala 2
2
1An de kurun ala: An mba ni iya, an mba ni kuk tan ki furîd’a, an mba ni kak ki halasa mi. Hina pet pî, ni hawa hina yak! 2An de yam sanda ala ni sun nda lilid’a; an de yam furîd’a ala an fe ni me kua ge? 3An nga hurun á le furîd’a ki süm guguzlud’a á ndjun vun suma lilid’a. Hina pî, an nga ni te yam hliwinu. An min á wäd’u vama djivi ma suma a nga lum yam andagad’a ka hî ki kak mazi d’a yam andagad’a ka hid’a. 4An le sunda ngola, an min azina ablaud’a, an pe guguzlud’a mi. 5An vasinena, an min yima paguna, an pandjaf agu ma vuta kua teteng mi. 6An ka golongeîna kurum teteng á rap mbina yam agu ma a pum awilina. 7An gus magumei suma andjofâ ki magumei suma aropma, a vut grozina avo hatanu. An nga ki d’uwar ma nglona ki d’uwar ma gureina kal suma a kak avoron avo Jerusalem-ma. 8An tok kawei ma hapma ki lora ki ndjondjoîd’a hamuleinid’a ki ndjondjoîd’a hi suma nglonid’a yam andagad’a teteng. An yo andjof suma a hle sawala karop suma a hle sawala kahle suma bud’a teteng suma a le suma tazi djivid’ina, an yo aropma ablaud’a mi. 9An mbut sama ngolâ kal suma a kak avoron avo Jerusalem-ma, ne manda ti wal nga woi ki sed’en nduo mi. 10Ahle suma iran ti min golozina, an nga ni d’elet ti. An nga ni d’el tan á le furîd’a d’uo mi, kayam an nga ni le furîd’a kurun krovo yam sun nda pet ta an lata. Wana ni wurak ka yam sun nda an lata. 11Bugola, an gol sun nda an lat kabonda hina pet ki kau d’a an kawat yam sun nda an lata hina pet, wani an gol ahle ndazina hina pet nahle suma hawa ya’â, ni d’igi sana mi dik simetna na mi. Vama djivi nga ka hî yam andagad’a tu d’i!
12An he tan á we ned’a ki guruta ki lilid’a. An djop tan ala: Sama mba mi vrak tamula blangâna, mba mi le ni me ge? Mba mi le nahle suma a lazi woi dana hol. 13An we woi tetet ala ned’a ti kal lilid’a d’igi b’od’a ti kal nduvunda na mi. 14Sama ned’a nga mi we yima mam i kuana, wani sama lilid’a mi tit ni kur nduvunda. Wani an we vana tu nga mi djubuzi zla tazi djak! 15An de kurun ala: Vama nga mi mba yam sama lilid’ina, mba mi mba kan an ni hina mi! Ni kayam me ba, an he tan á mbut sama ne ma kalâ ge? An de kurun ala: Doli ni sun nda hawa yaka d’ei. 16Kayam a nga djib’er yam ma ned’a gak didin kal ma lilid’a d’i, bur ma avina a mba mar kazi zla tazi djak. Ma ned’a mba mi mit ni d’igi sama lilid’a na mi. 17Kayam ndata, an gol kaka kur duniyad’a ni vama ndjendjed’a iranu, an we sun nda suma a lat yam andagad’a ka hid’a pet ni vama ndjendjed’a mi, an golî vama hawa ya’â d’igi sana mi dik simetna na. 18An noî sun nda kau d’a an lat yam andagad’a ka hid’a woi pet tala mbeî an arat djivi mata mi sama mba mi vrak blangâna d’a. 19Sama mba mi vra’â le ni ma ne, le ni ma liliya, sa mi we nga d’i. Wani mba mi kak yam ahlena pet suma an lazi kur duniyad’a ka hî ki kaud’a ki ne mandina. Hina pet pî, ni sun nda hawa yaka d’ei. 20Ki tchetchemba, an tan tchuk lus kayamba an he tan á le sun nda ndaka yam andagad’a ka hid’a. 21Sama dingâ mi nga mi le sunda ki ned’a ki wad’ud’a ki d’ingêra ki kaud’a. Wani mba mi arazi mi sama mi fe nga ndaka ki sed’ezi d’uo na. Wana ni sun nda hawa yak ka tcho d’a kala! 22Sana mi fe ni me yam sun nda mi he tam kat á led’a kur duniyad’a ka hî ki ndakid’a ge? 23Kur bur mama pet, mi ni kur djib’era kur ndaka burâ ki burâ; andjege pî, nga mi kak tchugot ti. Wan pet pî, ni sun nda hawa yaka!
24Vama djivi ma yam sanina ni tala mi te, mi tche, mi le furîd’a yam sun mamba d’a. Wani an wala zla ndata ti tcholï nata Alona. 25Mi dala: Le ni an nduo ni, ni nge mi ndak mi te mi le furîd’a ge? 26Sama mi le Alona tam djivid’ina, Alona nga mi hum ned’a, wed’a ki furîd’a. Wani sama tchona Alona nga mi aram lovota á tok ahlena, mi moloziya, kayam mam hazi woi mi sama mi lum tam djivid’ina. Wan pî, ni hawa hina yak d’igi sana mi dik simetna na!
Currently Selected:
Ma tchi wala 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
