Ma tchi wala 1

Kak ka yam andagad’a ka hid’a zlat nga d’i

1Wana ni zlad’a hi Ma tchi wala David goroma amul ma Jerusalem-mid’a. 2Ma tchi wala mi dala: Ahlena pet ni hawa na, zlazi nga d’i, ahlena pet ni hawa na, ni hawa na. 3Sana mi fe ni djiviya me ata sun nda mi lat ki kaud’a yam andagad’a ka hid’a ge? 4Atchogoid’a tu nga d’i kala, ta dinga ti mba, wani andagad’a ti nga ni kaka ata yat hina ba ba. 5Afata nga d’i deyâ, afata nga d’i niga, ti nga d’i b’at tat á hulong ata yima ti deî kuana. 6Bur ma dingâ simetna nga mi sir iram abo ma sutna, bur ma dingâ nga mi sir iram abo ma norâ, nga mi ngui tita balum asem burâ ki burâ. Bugola, mi hle lovot ta mi hlat adjeud’a. 7Alum ma gureina pet mi i ni djangâ kä kur alum ma ngolâ, wani alum ma ngolâ nga mi oî d’i. Wani alum ma gureina nga mi i avogovok ata yima mam nga mi djang kuana. 8Ahlena pet a nga le sun nda kaud’a kal á ded’a. Ira nga d’i kau abo gola d’i, humba nga d’i kau abo humba d’uo mi. 9Vama mba dana, ni mam ba, mba mi mba kua; vama le dana, ni mam ba, mba mi le kua d’ei. Vama awili ma mba mi le yam andagad’a ka hina nga d’i. 10Le vama ding ma mba a nga de kam ala: Wana ni vama awilina ni, va máma mi le wa woi kur atchogoi d’a kal woi avoreid’a da d’ou. 11Sa nga mi djib’er yam vama mi kal leina d’i; ahle suma a mba mba bugolâ, sa nga mi djib’er kazi d’uo mi.

Fek ad’ud’a hi ma tchi walid’a

12An ma tchi wala, an tamula yam Israel-lâ avo Jerusalem. 13An he tan á hal ned’a, á fek ad’u ahlena pet suma a nga lazi ka hî yam andagad’ina. Wani ni sun nda kau d’a Alona mi tinit yam sumid’a! 14An gol sun nda a nga lat yam andagad’a ka hid’a pet. An gol ni sun nda hawa yaka, ni d’igi sana mi dik simetna na mi. 15Vama gun ndei dana, sana mi ndak á d’obom mbi; vama nga d’uo na, sana mi ndak á ndumum mbuo mi.

16An de kurun ala: An ni fe ned’a kal suma a tamula avoron avo Jerusalem-ma, an fe ned’a ki wed’a ngola mi. 17An he tan á wäd’u ned’a ki guruta ki lilid’a, wani an we zla ndata ni d’igi sana mi dik simetna hawa na. 18Le ang fe ned’a ngola ni, ang fe ni ndaka ngola; le ang fe wad’ud’a kam kua kam kua ni, ang fe ni djib’era kam kua kam kua mi.

Currently Selected:

Ma tchi wala 1: BA

Highlight

Copy