Ma tchi wala 3

Alona mi nga yina yam ahlena pet

1Ahle suma a le yam andagad’a ka hina a nga ki yazi teteng. 2Yima vuta mi nga, yima matna mi nga mi; yima ped’a mi nga, yima a pat vama a puma woina mi nga mi; 3yima tchi matna mi nga, yima tchil sana mi nga mi; yima a to azina kä woina mi nga, yima min azinina mi nga mi; 4yima tchina mi nga, yima sanda mi nga mi; yima tchi horâ mi nga, yima lü ndjongâ mi nga mi; 5yima a dur ahinad’a woina mi nga, yima a yo ahinad’a mi nga mi; yima a bed’ei tei koko’â mi nga, yima bei b’ed’ei tei koko’â mi nga mi; 6yima hala mi nga, yima vit teina mi nga mi; yima ngomba mi nga, yima ged’a woina mi nga mi; 7yima haû woina mi nga, yima dupa mi nga mi; yima bei de zlad’a mi nga, yima de zlad’a mi nga mi; 8yima lei yam teina mi nga, yima noyoî teina mi nga mi; yima dur ayîna mi nga, yima b’leng nga halasâ mi nga mi.

9Sana mi fe ni me yam sun nda kau d’a mam lata ge? 10An we sun nda kau d’a Alona mi tinit yam sumid’a. 11Ahle suma mi lazina pet, ni djivid’a kur atchogoi mazid’a, gak mi hazi djib’era yam ahle suma a nga mbana. Hina pet pî, sana mi ndak nga á wäd’u sun nda Alona mi tinit ad’ut á led’a gak dabid’id’a d’i. 12An we vama djivi ma yam sumuna ni d’ala a le furîd’a, a le sun nda djivid’a ki kak mazi d’a yam andagad’a ka hid’a d’a. 13Le sana nga mi te nga mi tche nga mi le furîd’a yam sun mamba ni, ndata ni he d’a hawad’a hAlonid’a. 14An wahle suma Alona mi lazina pet, a nga nata yazi hina gak didin; vama a ge kam kuana nga d’uo mi na, vama hlum mbeina nga d’uo mi. Alona mi le hina kayam suma a lum mandaramu. 15Vama nga inina, ni vama nga adjeu dedeina. Alona nga mi hulongî ki vama kal leina.

Ahlena pet yazi d’a dabid’a ni matna

16Wana ni vama an wum yam andagad’a ka hina: Asa’ata ti vrak balum sariya d’a ka d’a irata, asa’ata ti vrak balum d’ingêra mi. 17An de kurun ala: Alona mba mi ka sariyad’a yam sama d’ingêrâ ki sama asa’atna djak, kayam mi nga nga yina yam ahlena pet, yam sun nda lara ge pet mi. 18An de kurun yam suma ala: Alona nga mi kuguziya, kayam azi wala azi ni d’igi azureina na, 19kayam vama nga mi mba yam sumina, nga mi mba yam azarâ ni na mi. Ma kal ndram nga d’i, ma hî mi mit mi, ma hî mi mit mi, azi ni ki muzuk ka tud’a; kal la sana mi kal azarîd’a zlat nga d’i, kayam ahlena pet ni hawa hina yak. 20Kayam ahlena pet a i nata yima tuna. Ahlena pet a tcholï naduk andaga d’a gugud’upa, a nga hulongî kä aduk andaga d’a gugud’upa mi. 21Ni nge mi wala muzuka hi sumid’a ti dja’î akulo ge? D’oze muzuka hazureinid’a ti surop mî kä ad’u andagad’a ge? 22An we vama djivi ma yam sanina ni d’ala mi le furîd’a yam sun mamba d’a. Wana ni wurak mamba! Ni nge ba, mba mi hulongômî á we vama mi le blogoma ge?

Currently Selected:

Ma tchi wala 3: BA

Highlight

Copy