Ziz 12

'Ŋlɔa ɩya ‑gbɔgbʋmlɛa

1Ghleda 'kadie ya ‑laagɔa nɩkplaan ‑zɔnwlʋ: 'Ŋlɔ bhlo, 'ylʋbhuoa ‑didioa 'mɔɔ, lokwi 'bhisa, cabhuoa ‑kʋa 'mɔɔ kpli ‑zɔn 'nyɩ nyɩbhɛlɩkpoonkpo, -a ‑ka 'lɛ ‑zɔlʋ 'kʋgba ‑mɔsɔ cɩ na, ‑kʋa 'mɔɔ 'lɛ 'wlu. 2Ɔ ‑kaa nɩkpla 'nyɩ ɔ paa bhubhu sa valʋ bhlaa ‑mɔɔ na.

3'Nyɩ ‑daa ghleda bhlo ya ‑awlɛ ‑laagɔa nɩkplaan ‑zɔnwlʋ: ‑Gbɔgbʋmlɛ 'kadie bhlo, ɛ ‑zaa le ‑kosu. Ɛ ‑kaa 'wli ‑ngbɔɔsɔ ɩya 'gwɩ 'kʋgba 'nyɩ nyɩbhɛlɩkpoonkpu 'kʋa 'lɛ 'wli ‑naa 'kʋ. 4Ɛla ‑goa nylupua ‑laagɔɔn 'la ‑zɔlʋa 'la ‑mɔta cea 'nyɩ ɛ 'kɔsɔlʋʋ ‑dʋdʋa 'kʋsa. ‑Gbɔgbʋmlɛa ya 'ŋlɔa ‑ɔ ‑cɩ kaa 'lɛ valɩ na 'ci 'kʋ 'nylugo, le ɔ 'ka valɩ ‑jaa na, ɛ 'ka 'cileea li. 5'Ŋlɔa ya 'ciŋodico valɩ. Ɔmɔ ‑cɩ ka 'lɛ letiepɛ 'ma ɩya ɔ 'ka 'bhlɩa 'fɩan 'kʋ 'la ncɛlɩa kpa. 'Nyɩ ma ya ɔla 'cileea 'ma 'nyɩ ma yɔɔ Laagɔ ɩya ɔla nyɩbhɛlɩkpoa cɩ fa. 6Na 'ŋlɔa ya 'gu 'nyɩ ɔ ya 'pʋpʋa nɩkplaan mʋ, gbazɩa Laagɔ gba 'lɛ 'nyɩ ma bhɔsʋɔ 'lɛ sakʋda le ma 'kɔɔ 'yɛpɩ lolulu ‑aan clɩɩ ‑tabhlu clɩɩ gwlɩɩ 'kʋgba ɩya clɩɩ gwlɩɩ ‑mɔta (1260).

7Na, tʋ ya ‑laagɔa nɩkplaan bhli. Mɩsɛlɩ#12.7 Mɩsɛlɩ ‑glɩ Laagɔ 'la tavʋbhlaandleecɩa 'fɩan ma to. ɩya ɔla 'bhlaandleecɩa* maya ‑gbɔgbʋmlɛa ya tʋ vʋ. 'Nyɩ ‑gbɔgbʋmlɛa ‑ma ɛya ɛla 'bhlaandleecɩa ‑ya maasɔ yʋʋ 'lɛ vʋ, 8‑ma ma 'ta ‑sɩa. Mala sakʋda 'taanɩa ‑laagɔɔn ‑kʋ. 9Na, ma yɛɛ ‑dʋdʋa 'kʋ 'pa, ɛmɛ ‑gbɔgbʋmlakadiea, ‑godogodotlɛa, ma la 'lɛ gɔzɛ ɩya Sataan*, ‑ɛ ‑glɩ 'lɛ ‑laagɔzɔnbhuoa 'la 'nyiglilinyɔa na, ma ya ɛya ɛla 'bhlaandleecɩa ‑dʋdʋa 'kʋ 'pa.

10'Nyɩ n ya ‑laagɔa nɩkplaan ‑blɩɩzɔn 'kadie bhlo 'nu, ʋ claa lebhe: 'Lɩkanɩ ‑ala Laagɔ 'la gbʋʋnsalɩɛa, ɔla 'tɛtɩa ɩya ɔla ‑kwleliea 'la clɩɩa ɩya ɔla ‑Sasanyɔa* ‑ma 'la ‑kwleliea 'la clɩɩa. Sa, ‑a bholiecɩa 'la wɔlɩkɩgɩnyɔa, ɔmɔa ‑ɔ gɩa 'lɛ maa wɔlɩ 'kʋ zezezeliin ɩya bhlibhliylʋʋn, ‑ala Laagɔ ‑deliin na, ma yɔɔ ‑dʋdʋa 'kʋ 'pa. 11‑Ma maa, 'bhlabhlicoa 'la ‑dolua ɩya wɔɔnyɩtʋa 'la ‑danʋfʋɛ ma li 'lɛ na nɩkplaan ma ‑sɩalɩɔ 'lɛ: Ma 'ta mala jabhʋa wabha ɩya ma ‑ka 'kwɩ 'gulu.

12Ɩla gbʋ na, ‑laagɔɔn

ɩya anyɩa ‑ɔ ‑kʋ 'lɛ 'yɛpɩ na, 'naa a kʋ pɔlɛkʋmɛnɔɔn!

‑Ma, anyɩ ‑dʋdʋ ɩya ge, ‑munzue ya anyɩ bho,

sa gɔzɛ ya anyɩ 'bɩɩn kwlili dɔgbɛdɔgbɛɛn

'nyɩ ɛ ‑ci sɛɛ lebhe clɩɩa ‑ɩ ‑tolue 'lɛ na, 'tanɩ ‑zu.

13Daa ‑gbɔgbʋmlɛa 'lɩ 'lɛ lebhe ma yɛɛ ‑dʋdʋa 'kʋ 'pa na, ɛ ya 'ŋlɔa ‑ɔ valɩa 'lɛ 'ciŋodicoa na bɩkʋslo. 14‑Ma, ma ya 'ŋlɔa kɩkɛ 'kadiea 'la ‑papua ‑mɔsɔa 'nyɩ, le ɔ 'ka ‑bluu ɩya ɔ 'ka 'pʋpʋa nɩkplaan mʋ, gbazɩa ‑ɩ tlʋ 'lɛ tlɛa cɩda 'nyɩ ma bhɔsʋa 'lɛ ɔla gbʋ, le ma 'kaa 'mɔɔ lolulu ‑aan liowlia ‑mɔta ɩya 'kle nɩkplaan na. 15Na, tlɛa ya 'nyu ‑ʋ kɔlɔ 'lɛ le 'nyɩdɔlʋ na gɔzɩɛ le ʋ 'ka 'ŋlɔa famʋ. 16‑Ma ‑dʋdʋa ya 'ŋlɔa 'kʋ ci: Ʋ ya cɩ ‑sasalɩ 'nyɩ ʋ ya 'nyidɔlʋa ‑gbɔgbʋmlɛa gɔzɩɛa 'lɛ na, mla. 17Saa 'titia 'ŋlɔa 'la dɔgbɛa ‑yelia 'mɛɛ 'lɛ na, ‑gbɔgbʋmlɛa ya 'ŋlɔa 'la vanɩkplaa, ‑a ‑to 'lɛ 'nyɩ ‑a 'plɩlɩ 'lɛ Laagɔ 'la ‑jlɩmaa ɩya Zozii 'la wɔɔnyɩtʋa 'kʋ na, tʋa 'klʋ ‑tla. 18Na, ɛ ya 'plɩ, ɛ ya ‑gezɔan mʋ le ɛ ‑ka ‑ko.

Currently Selected:

Ziz 12: NTLD13

Highlight

Copy

Compare