Ziz 11

‑Danʋfʋɛcɩa ‑mɔsɔa

1Ma yaan kɔlʋ 'nyɩ. Ʋ ‑kʋ le ‑dʋdʋbɩɔnyɔ 'la ‑bɩɔkɔlʋ 'bhisa 'nyɩ ma yaan 'cla lebhe: «Mʋ ɩya ‑n ‑bɩɔ Laagɔpaakadiea ɩya gʋgwlagbatɩa ɩya ‑n zɛlɩ maa ‑ɔ gʋgwlalɩʋ 'lɛ ‑zɔn na. 2‑Ma ʋla bhɩalɩ slea 'talɩa 'cin, ‑naa ‑bɩɔmʋa, sa Laagɔ yaa sɔ 'kʋ ‑sa, ɔ ya ncɛlɩa 'ta 'lɛ Laagɔ ‑ci na 'nyɩ. Ma cɩ 'ka ‑kpɔkplɔdua 'kʋ namʋnʋ 'cɩ ‑gwlɩɩ ‑mɔsɔ ɩya 'cɩ ‑mɔsɔ nɩkplaan. 3Na, n cɩ 'ka 'na ‑danʋfʋɛcɩa ‑mɔsɔa ‑jioli 'nyɩ le ma ‑pla 'kuzluloku nɩkplaan ɩya ma nyɩtɛɛn ne 'kʋ clɩɩ ‑tabhlu ɩya clɩɩ ‑gwlɩɩ 'kʋgba (1200) nɩkplaan.» 4Maa ‑ɔ ‑glɩ 'lɛ ‑olivisia ‑mɔsɔa ɩya ‑buzuiigɩlɩɩa ‑mɔsɔa ‑ɩ ‑kʋ 'lɛ ‑dʋdʋa 'la ‑Kwlenyɔa ‑deliin na. 5Gbazɩ nclɔɔ ‑ka 'matɩ le ɔ 'ka maa ‑abhɔlɛ nʋ na, ka ‑kosu wlʋ 'lɛ maa neen 'nyɩ ʋ sie 'lɛ mala ‑zɔbhɛlɩgbanyaa. ‑Ghɛɛ, gbazɩ nclɔɔ ‑kaa ‑wa lebhe ɔ 'ka maa ‑abhɔlɛ nʋ na, 'lɩka ‑sa ‑ɩ ‑fata 'lɛ lebhe ɔ 'ku. 6Ma ‑ka ‑jioli ɩya ma 'ka ‑laagɔɔn kpaslɩlɩ ɩya clɩɩa nɩkplaan ma 'ka 'lɛ Laagɔ ne 'kʋ nyɩtɛ na, 'nyu ‑ylɛylɛ 'la ka bhla. Ma ‑ka ‑jioli ɩya ma 'ka 'nyidɔlɩ ‑dolu kaci ɩya ma 'ka ‑dʋdʋa 'kʋ 'la ncɛlɩa 'kwlɩbhɩɛ ‑mizimizi 'wlupa, saa ma ‑wa 'lɛ na.

7Daa ma cɩ 'ka 'lɛ ‑danʋfʋɛliliea bhɩalɩ na, mlɛa ‑ɛ wlʋ 'lɛ 'bhukua ‑ʋ 'ta 'lɛ 'wlukoda ‑ka na, nɩkplaan na, cɩ 'ka maa tʋ ŋeni, ɛ 'ka maa ‑sɩa ɩya ɛ 'ka maa 'bhla. 8Mala ‑blaanyɛkɛa cɩ 'ka dukadiea, ma palalɩ 'lɛ Sodɔmʋ ɩya Ejibhiti na, 'la clikpoa nɩkplaan kʋ, daa 'titia ma bholu 'lɛ mala ‑Kwlenyɔa dabhlalɩsua 'ciin na. 9'Lɔlɩ 'lɔlɩ, 'lɔkpʋ 'lɔkpʋ, 'bhlɩ 'bhlɩ 'kʋ 'la ncɛlɩ ɩya ‑goje ‑goje 'la nyɩtɛnya cɩ 'ka ci ɩya ma 'ka mala ‑blaanyɛkɛa 'lɩmʋ ‑aan clɩɩ ‑mɔta ɩya 'kle ɩya ma 'la ka ŋonu le ma zizie maa. 10‑Laagɔzɔɔnkʋnyaa cɩ 'ka mala 'kwɩa 'la gbʋ ‑pɔpʋɛ nʋ, ma cɩ 'ka pɔlɛkʋmɛnɔɔn kʋ ɩya ma 'ka lɩɩ vavalɩ, sa Laagɔnɛkʋnyɩtɛnyaa* ‑naa ‑mɔsɔa ya maa 'kwlɩɩbhɩa ‑gbɔɔn na.

11‑Ma clɩɩ ‑naa ‑mɔtaa ɩya 'klea ‑ka 'plɩ na, nyɔmʋa ‑ʋ nyɩ 'lɛ jabhʋ na, cɩ 'ka Laagɔ cɩ 'wlʋ, ʋ 'ka maa nɩkplaan ble ɩya ma 'ka 'kʋbho, ma 'ka 'nylugo. Na, maa ‑ɔ 'lɩmʋa 'lɛ maa na, ŋanɔ cɩ 'ka maa ‑gbɔɔn pla. 12Laagɔnekʋnyɩtɛnyaa ‑mɔsɔa ya ‑blɩɩzɔn 'kadie bhlo 'nu, ʋ 'wlʋlʋ ‑laagɔɔn 'nyɩ ʋ ya maa 'cla lebhe: «A ‑gblaa ‑wɔlʋ». 'Nyɩ ma ya 'nyukplu nɩkplaan 'plɩlɩ, ma ya ‑laagɔɔn ‑gblaa, mala ‑zɔbhɛlɩgbanyaa 'ci 'kʋ. 13Dɩpɩa bhlogbɩɩ, ‑dʋdʋa ya gbasa tɩtɛlɩ, 'dua 'la 'kʋgba klea ya gbɔlʋ 'nyɩ ncaatabhli ‑ngbɔɔsɔ (7 000) ya ‑muunzuewɔlɩ ‑naa nɩkplaan 'kulu. Maa ‑ɔ 'ta 'lɛ 'kumu na, ŋamɔ ya maa pla 'nyɩ ma ya Laagɔa ‑ɔ ‑kʋ 'lɛ ‑laagɔɔn na 'klʋgba. 14‑Mɔsɔ ‑kwlɩbhɩɛa ya 'plɩ. 'Lɩka ‑mɔta ‑naanɛa cɩ 'yɛpɩ ‑clɩɩklipɛ nɩkplaan.

‑Ngbɔɔsɔ ‑lɛglɛa ya gba

15‑Ngbɔɔsɔ ‑bhlaandleea* ya ɔla lɛglɛa bholi. 'Kasɛ ya ‑laagɔɔn 'wlʋlʋ 'nyɩ ɛ claa lebhe: «‑Laagɔzɔan 'la nyɩbhɛlɩdua yanɩ ‑pɔtɔnʋ ‑ala ‑Kwlenyɔ ɩya ɔla ‑Sasanyɔa* 'nʋ 'plɩ. 'Nyɩ ɔ cɩ 'ka ‑kwle 'lʋkʋlʋkʋ ɩya 'lʋkʋlʋkʋ.» 16Ncaakpasɩa ‑gwlʋʋa ɩya ‑nmɔɔnaa ‑ɔ ‑kʋ 'lɛ mala ‑kwlekpua 'kʋ sa, Laagɔ ‑deliin na, ya ‑kukoonkplii sasla, ma gʋgwlaa Laagɔ 17'nyɩ ma claa lebhe:

«‑Kwlenyɔ, 'tɛtɩ Laagɔ,

‑mɔɔa ‑ɔ ‑kʋ 'lɛ, 'nyɩ ‑ɔ ‑kʋa 'lɛ na, ‑a bhɔlʋɔ!

Sa, ‑n ya ‑naa 'tɛtɩ 'kadɩa 'ma

'nyɩ ‑n ya ‑naa ‑kwleliea kpo 'kʋ zʋ.

18‑Laagɔzɔan 'la ncɛlɩa ya dɔgbɛ 'ma.

‑Ma ‑naa dɔgbɛa 'la clɩɩa ya ŋeni.

Ɩ ‑glɩ 'kua 'la 'tɩtɩplaclɩɩ,

‑naa lobhocuoa, ‑ɔ ‑glɩ 'lɛ

‑naa nekʋnyɩtɛnyaa na 'la dluuplʋclɩɩ,

‑kplɔkplɔnyaa ɩya maa ‑ɔ ‑ka 'lɛ

‑naa 'ŋlɩa 'la zʋlɩɛ na,

'cuo ɩya ncaakpasɩ 'la dluuplʋclɩɩ.

‑Ɩ ‑glɩ maa ‑ɔ nyumo 'lɛ ‑dʋdʋa na, 'la nuaclɩɩ.»

19Laagɔpaakadiea* ‑ʋ ‑kʋ 'lɛ ‑laagɔɔn na 'la gbinea ya kalɩ 'nyɩ mɛnʋlakaa ya ‑palʋa ‑zɔn futolu. Na, ‑laagɔa nɩkplaan ya 'wɛtɩa, 'kasɛ ɩya ‑laagɔzadlɛ ya gba, ‑dʋdʋa ya tɩtɛlɩ 'nyɩ 'nyu 'kadie ya bhla.

Currently Selected:

Ziz 11: NTLD13

Highlight

Copy

Compare