Ziz 13

Mlaa ‑mɔsɔa

1Na, n ya mlɛ bhlo 'lɩ, ɛ 'wlʋlʋa gea nɩkplaan, ɛ ‑kaa 'wli ‑ngbɔɔsɔ ɩya 'gwɩ 'kʋgba. ‑Asɩkɛkpoonkpu 'kʋgba ‑kʋa ɛla 'gwɩa 'kʋ 'nyɩ Laagɔ 'la vlaŋlɩ ‑zieoa 'lɛ ɛla 'wlia 'kʋ. 2Mlɛa n 'lɩ 'lɛ na, ‑kʋa le jigbɛ, ɛla bhɩa ‑kʋa le 'kwlaan 'la mlanyinye bhlo 'la bhɩ 'nyɩ ɛla nea ‑kʋa 'lɛ le ‑bhedi 'la ne. ‑Gbɔgbʋmlɛa yɛɛ ɛla 'tɛtɩa, ɛla ‑kwlekpoa ɩya ‑kwletɛtɩ 'kadiea 'nyɩ. 3Ɛla 'wlia bhlo ‑kʋa le saa ma yaa 'mʋʋ 'lɛ ‑nacaa ‑a ‑cɩ 'kaa 'lɛ ɛla 'kwɩ 'plɩ na, nɩkplaan palɩ na, ‑ma ɛla ‑nacɩjea ‑a ‑cɩ 'kaa 'mɛɛ 'lɛ 'bhla na, ya 'ku. Na, nikpoo ya ‑dʋdʋa 'kʋ 'la ncɛlɩa ‑tɛtɛa sla 'nyɩ ma ya mlɛa gɩlɩ. 4'Nyɩ ncɛlɩ ya ‑gbɔgbʋmlɛa gʋgwla, ‑ofi lebhe ɛ yaa ‑kwletɛtɩa mlɛa 'nyɩ. Na, ma gʋgwla mlɛa 'nyɩ ma claa lebhe: «Ncaasaa ‑ɔya mlɛa 'wlʋlʋa 'lɛ bha? 'Nyɩ ncaasaa ‑ɔ ‑yɛɛsɛ cɩa 'lɛ vʋlɩɛ mino bha?»

5Na, ma yɛɛ ne te le ɛ nyɩtɛ ‑tutuleewɔlɩ ɩya ɛ vla Laagɔ. 'Nyɩ ma ya ‑awlɛɛ 'lɛ ‑kwletɛtɩ 'nyɩ le 'cɩ ‑gwlɩɩ ‑mɔsɔ ɩya 'cɩ ‑mɔsɔ nɩkplaan, ɛ nʋ saa ɛ ‑wa 'lɛ na. 6Na, ɛ ya ne cɩsasalɩ 'nyɩ ɛ ya Laagɔ vlalɩɛ bhɔ, ɛ nyumoa ɔla 'ŋlɩ, ɛ vlaa ɔla sakʋdaa ɩya maa ‑ɔ ‑kʋ 'lɛ ‑laagɔɔn na. 7Ma yɛɛ ‑jioli 'nyɩ le ɛya Laagɔ 'la ncɛlɩa vʋ tʋ ɩya ɛ ‑sɩa maa 'nyɩ ma yɛɛ 'lɛ 'lɔkpʋ 'lɔkpʋ, 'lɔlɩ 'lɔlɩ, ‑goje ‑goje ɩya 'bhlɩ 'bhlɩ 'kʋ 'la ncɛlɩ 'la ‑kwletɛtɩ 'nyɩ. 8‑Dʋdʋa 'kʋ 'la ncɛlɩa ‑tɛtɛa mala 'ŋlɩ 'ta 'lɛ ‑laagɔzɔan 'la bhɔdaa tooto, 'bhlabhlɩcoa ma 'dɩ 'lɛ ‑blɩɩn na, 'la jabhʋfluwaa nɩkplaan ‑zieo na, cɩ 'kɛɛ gʋgwla.

9'Naa ɔmɔa ‑ɔ ‑ka 'lɛ 'nyukwli na, ɔ 'nu: 10Ɔmɔa ‑ɔ ‑cɩ ka 'lɛ geyliin mʋ na, cɩ 'ka geyliin mʋ. Ɔmɔa ‑ɔ ‑cɩ 'ka 'lɛ lɛtɛ 'la 'kwɩ 'ku na, cɩ 'ka lɛtɛ 'la 'kwɩ 'ku. Na, maa ‑ɔ ‑kʋlʋ 'lɛ Laagɔ na, 'la pɔɔklalɩɛa ɩya mala pɔɔtɛtɛa 'la 'ŋwacɩa ya ŋeni.

11'Nyɩ n ya ‑awlɛ 'lɛ ‑buun mlɛ bhlo 'lɩ, ɛ 'wlʋlʋa ‑gluu. Ɛ ‑kaa 'gwɩ ‑mɔsɔ le 'bhlabhlɩco 'bhisa, ‑ma ɛ nyɩtɛa le ‑gbɔgbʋmlɛ. 12‑Bɛka mlɛa 'la ‑kwleliea 'fɩan ‑kʋa 'mɛɛ wlɩɩn 'nyɩ ɛla 'ci ‑kʋa 'mɛɛ 'lɛ 'kʋ. Na, ɛ ‑gba 'nyɩ ‑dʋdʋa ɩya ʋla 'kʋ 'la ncɛlɩa tɛtɛa, gʋgwlaa ‑bɛka mlɛa, ɛla ‑nacɩjea ‑a cɩ 'kaa 'mɛɛ 'lɛ 'bhla na, 'ku 'lɛ na. 13Ɛ nʋa 'ciinzizielɩlobholi 'kadɩ, ɛ gbaa 'nyɩ ‑kosu 'titio, ʋ wlʋa ‑laagɔɔn 'nyɩ ʋ bhlilia ‑dʋdʋa 'kʋ, ncɛlɩa 'fɩan 'ci 'kʋ. 14Ɛ 'plɩlɩa 'ciinzizielɩlobholia, ma 'nyɩɛ 'lɛ le ɛ nʋ ɩya ɛ 'nyɩ ‑bɛka mlɛa na 'kʋ, 'nyɩ ɛ 'nyiglili ‑dʋdʋa 'kʋ 'la ncɛlɩa. Ɛ 'susuo maa le ma nʋ ‑bɛka mlɛa ma 'ma 'lɛ lɛtɛa, ma 'bhla 'lɛ 'nyɩ ɛ jabha 'lɛ na, 'la palalɩlʋʋ, -ʋ cɩɛ 'lɛ 'klʋgba na. 15Ma yɛɛ ‑jioli 'nyɩ le ɛ 'nyɩ ‑bɛka mlɛa 'la palalɩlʋʋa ‑sasanyɔmʋ, ɩya ɛ mino ɛ nyɩtɛ ɩya ɛ gba ma 'bhla maa ‑ɔ cɩ 'tɛɛ 'lɛ gʋgwla na. 16'Cuo ɩya ‑glɛɛglɛnya, nyɩbhɛlɩ ɩya ŋaazɩnya, ‑ncɩkalɩnya ɩya geye, ɛ ya maa ‑tɛtɛa cibhlilida 'lipasɔ ‑kɔgbaa 'kʋ ‑aana 'kʋtaan zʋ. 17'Nyɩ nclɔɔ ‑ylɛylɛ cɩ 'taa ‑pɩalɩɛ ‑aana 'pɛlʋzʋlɩɛ mino, ɩ ‑ka ‑kʋ lebhe ɔ 'taa cibhlilidaa, mlɛa 'la 'ŋlɩa ‑aana ɛla 'ŋlɩa 'la 'ylɩciea cɩ ‑ka na.

18‑Da ɩ ‑fata 'lɛ lebhe ma cibhlili wɔlɩ nɩkplaan gbazlɩlɩsa: Ɔmɔa ‑ɔ ‑ci 'lɛ dɩgalɩ na, 'naa ɔ ‑sa mlɛa 'la 'ylɩciea ‑zɔn, sa nclɔɔ 'la 'ylɩcie ɛ ‑glɩ 'lɛ: Ɛla 'ylɩciea ‑glɩ ‑gwlɩɩ ‑ngbi 'la dɩpici ‑ngbʋflʋ, ‑gwlɩɩ ‑mɔta ɩya ‑ngbʋflʋ (666).

Currently Selected:

Ziz 13: NTLD13

Highlight

Copy

Compare