1 Kolt 6

Bholiecɩa bhlobhlo kukulu tʋ

1Wɔlɩ ‑ka anyɩ ‑gbaaglɩɩn ‑kʋ na, 'lɩsaa 'la gbʋ a fɩɩ 'lɛ maa ‑ɔ 'ta 'lɛ Laagɔ ‑ci na ‑deliin 'nyɩ a ‑la 'tɩɩ 'lɛ ‑kplɔkplɔnyaa ‑deliin bha? 2Ka a 'ta 'lɛ sɛɛ ‑ci lebhe ‑kplɔkplɔnyaa -ɔ ‑cɩ ka 'lɛ ‑laagɔzɔan 'tɩtɩpla bha? 'Nyɩ ɩ ‑ka ‑kʋ le anyɩ -ɔ ‑cɩ ka 'lɛ ‑laagɔzɔan 'tɩtɩpla na, ka a mino 'ta 'lɛ wɔɔpɩpɩa 'la 'tɩtɩa ‑plalɩɛ bha? 3Ka a 'ta 'lɛ sɛɛ ‑ci lebhe ‑anyɩ ‑ɔ ‑cɩ ka 'lɛ 'bhlaandleecɩa* 'tɩtɩpla bha? Na, ka a mino 'ta 'lɛ ɩya a 'ka 'pʋpʋ ‑naa 'kʋ 'la wɔlɩ 'bhebhe nyɩtɛ bha? 4Gbazɩ a ‑ka ‑sa 'la 'tɩtɩplalɩɛ ‑ka na, ncɛlɩa ‑laagɔnɩkplaa bu 'ta 'lɛ na, maa a ma 'lɛ le 'tɩtɩplanya bha? 5Ɩ ‑glɩ ala ‑zo dɛ n nyɩtɩɩ 'lɛ. Na, ka dɩgalɩcibhlilinyɔ bhlogbɩɩ 'ta 'lɛ anyɩ sidiin ‑kʋ, ɩya ɔ 'ka 'lɛ ɔ bholiecɩa ‑gbaaglɩɩn 'la 'tɩtɩa ‑plalɩɛ mino bha? 6Dɛ bholi ɩya bholi pla 'lɛ 'tɩtɩ, 'nyɩ ɩmɩ ‑naa 'plɩlɩ 'lɛ maa ‑ɔ 'ta 'lɛ Laagɔ 'la pɔɔtɛtɛ ‑ka na ‑deliin bha?

7Na, saa 'fɩan ɩ cɩnɩ 'lɛ kʋkʋlʋ na, 'tɩtɩ ‑kʋnɩ 'lɛ anyɩ bhlobhlo ‑gbaaglɩɩn na, ka a ya 'lɛ tooto bhli. ‑Ma 'lɩsaa 'la gbʋ 'a ŋonu 'ta 'lɛ ɩya ma 'ka anyɩ 'nyisasawɔlɩ cɩ nʋ bha? 'Lɩsaa 'la gbʋ 'a te 'ta 'lɛ acɩ ne ɩya ma 'ka 'lɛ ala kalɩkalɩlɩɩa ‑salɩ bha? 8'Nyɩ anyɩ ‑ɔ ‑ka 'lɛ 'nyisasʋ 'nyɩ ‑ɔ salɩ 'lɛ a 'ye 'la kalɩkalɩlɩɩ. A bholiecɩ ma ‑glɩ 'lɛ ‑ma. 9Na, ka a 'ta 'lɛ sɛɛ ‑ci lebhe maa ‑ɔ ‑ka 'lɛ 'nyisasʋ na, maa cɩ 'ta Laagɔ 'la Nyɩbhɛlɩdua* ‑aja 'kʋ lili bha? A 'la 'nyiglilia acɩ! ‑Badaaglulinya, ‑zliigʋgwlanya, ŋlʋmatɩnya, ŋodiea ‑ɔ 'cɩcɩlɩ 'lɛ, 10'winya, lɩɩguguonya, nʋgbumlanya, ncaavlanya ɩya ‑bhɩakpanya, maa cɩ 'ta Laagɔ 'la Nyɩbhɛlɩdua ‑aja 'kʋ lili. 11'Lɩka ‑sa anyɩ sidiin ‑anʋaa ‑kʋa 'lɛ. ‑Ma ma yanɩ anyɩ ala nyiynia cɩ wɔlʋ, a yanɩ ‑kplɔ, a yanɩ 'kʋnylugolunya 'plɩ, ‑Kwlenyɔ Zozi Klisi 'la 'ŋlɩa nɩkplaan ɩya ‑ala Laagɔ 'la 'Wugoa nɩkplaan.

N ‑ka ‑tɛtɛa 'fɩan 'la ‑jioli

12«N ‑ka ‑tɛtɛa 'fɩan 'la ‑jioli,» ‑ma ‑tɛtɛa 'fɩan 'ta nʋda nanɩ. «N ‑ka ‑tɛtɛa 'fɩan 'la ‑jioli,» ‑ma 'n cɩ 'ta lʋʋ ‑ylɛylɛ ne te ɩya ʋ 'kaan ʋla geyu ple. 13Lilinyɩ ‑kʋ ɩ ‑nyɩɔ nɩkpla, 'nyɩ nɩkpla ‑kʋ 'lɛ a ‑nyɩɔ 'lɛ lilinyɩ. 'Nyɩ Laagɔ cɩ 'ka ɩla 'cia ‑mɔsɔa nyumo. ‑Ma 'nyɛkɛa 'ta ‑kʋ ɛ 'ta ‑badaaglulilie ‑nyɩɔ. Ɛ ‑kʋ ɛ ‑nyɩɔ ‑Kwlenyɔ 'nyɩ ‑Kwlenyɔ ‑ma ‑kʋ 'lɛ, ɔ ‑nyɩɔ 'lɛ 'nyɛkɛa. 14Na, Laagɔa ‑ɔ ‑bho 'lɛ ‑Kwlenyɔa 'kwɩɩn 'kʋ na, ɔ cɩ 'ka ‑anyɩ 'kwɩɩnkʋbho ɔla 'tɛtɩa nɩkplaan.

15Ka a 'ta 'lɛ sɛɛ ‑ci lebhe ala 'nyɛkɛa ‑glɩ Klisi 'la 'blɩ bha? Na n cɩ Klisi 'la 'blɩa 'ma 'nyɩ n cɩɩ ‑badaagluliŋlɔ 'la 'blɩ ple bha? ‑Wɔɔ, ɩ 'ta sɛɛ ‑kʋ. 16Na, ka a 'ta 'lɛ sɛɛ ‑ci lebhe ɔmɔa ‑ɔ mɛ 'lɛ ‑badaagluliŋlɔ cɩ na, ka ɔ ‑yɔɔsɔ plɩ 'lɛ 'nyɛkɛ bhlo bha? Sa Zieziewɔlɩa* nabhe: «Maa ‑mɔsɔa, cɩ 'kanɩ 'nyɛkɛ bhlo 'plɩ.» 17‑Ma ɔmɔa ‑ɔ mɛ 'lɛ ‑Kwlenyɔ cɩ na, ɔ ‑yɔɔsɔ ‑glɩ 'wugo bhlo. 18Na, a 'gulu ‑badaaglu! Sa ‑daa nyinyia ‑tɛtɛa nclɔɔ nʋ 'lɛ na, 'ɩ ble 'ta ɔla 'nyɛkɛa nɩkplaan. ‑Ma ‑badaaglulinyɔ, ɔmɔ 'titi ɔla 'nyɛkɛa ɔ nʋ 'lɛ nyinyi. 19Ka a 'ta 'lɛ sɛɛ ‑ci lebhe ‑Kplɔkplɔ ‑Wugoa* Laagɔ 'nyɩ 'lɛ anyɩ, 'nyɩ ‑ʋ ‑kʋ 'lɛ anyɩ nɩkplaan na, ala 'nyɛkɛa glɩ 'lɛ ʋla gʋgwlapalʋ bha? Ka a 'ta 'lɛ sɛɛ ‑ci lebhe a 'ta acɩ nɩnɩ bha? 20Dlu ma ‑plʋ 'lɛ 'nyɩ ma ya 'lɛ anyɩ nɩkplaankplɩ. 'Dɛndlana, a 'ma ala 'nyɛkɛa ɩya a ‑gba Laagɔ 'klʋ.

Currently Selected:

1 Kolt 6: NTLD13

Highlight

Copy

Compare