1 Kolt 5

‑Laagɔnɩkplaa 'la ncɛlɩ ‑anʋa li ‑badaaglu

1Ma nyɩtɛ daa ‑tɛtɛa lebhe ma li ‑badaaglu anyɩ sidiin, 'nyɩ ‑badaaglu ‑naa, maa 'lɩlɩ 'tʋʋ ncɛlɩa ‑ɔ 'ta 'lɛ Laagɔ ‑ci 'titio na sidiin. Anyɩ sidiin, bhlo ‑ya ɔ to nʋŋlɔ ‑pla 'sle! 2'Nyɩ a kpolilii 'lɛ nɩkplaan! 'Nyɩ ɩ 'ta 'lɛ ‑sa anyɩ cɩɩnkabha 'bhebhe ɩya a 'ka wɔlɩ ‑naa 'la nʋnyɔa acɩ sidiin ‑sa! 3‑Amʋ, n tlʋ anyɩ cɩ da 'bhlɩɩ, ‑ma 'na pɔlɛa ‑kʋ anyɩ cɩ, 'nyɩ n ya tooto ɔmɔa ‑ɔ nʋ 'lɛ wɔlɩ ‑naa na, 'tɩtɩpla le saa n ‑kʋa 'lɛ anyɩ sidiin na. 4Na, ‑Klwenyɔ Zozii 'la 'ŋlɩa nɩkplaan, a ‑ka 'wluwlalɩ na, n cɩ 'ka anyɩ sidiin kʋ 'wugoon, ɩya aya ɔla 'tɛtɩa 'ka 5‑sa 'la nclɔɔa sɔ 'kʋ ‑sa ɩya ‑a 'ka Sataan* 'nyɩ, le ɔla 'nyɛkɛa nyumo, ɩya ‑Kwlenyɔa 'la ciclɩɩa 'kʋ, ɔmɔ 'titi 'ka gbʋʋnsalɩɛ 'lɩ.

6Na, ala wɔlɩa a kpolili 'lɛ nɩkplaan na, ɩ 'ta nanɩ. A 'ta sɛɛ ‑ci lebhe 'zɩ* pɛ gba 'lɛ 'nyɩ ‑faliia ‑tɛtɛa flu 'lɛ bha? 7A kpla acɩ ‑godogodozɩa cɩ ɩya a 'ka ‑falii ‑leli 'plɩ, ‑masa a 'tanɩ 'zɩɩn* ‑ka na. Sa ma ya Klisi, ‑ala geyliinwlʋlɩɛa* 'la 'bhlabhlɩcoa 'ma 'nyɩ ma ya ‑teyiyi. 8Na, ‑a li 'fɛtlɩa, ‑n 'tanɩ ‑aya ‑godogodozɩa ‑aana ‑abhɔlɛ ɩya ‑abhɔlɛnʋnʋgbɩ 'la 'zɩaa*, ‑ma ‑a 'ma 'flawia ‑ɩ 'ta 'lɛ 'zɩɩn ‑ka na, ɩya ‑a li 'fɛtlɩa, ‑kplɔlɩɛ ɩya ‑nʋawlɛ nɩkplaan.

9N ya anyɩ ‑afluwaa n zie 'lɛ anyɩ na, nɩkplaan 'cla le aya ‑badaaglulinya 'la namʋa. 10‑N 'ta ‑laagɔzɔn ‑naa 'la ‑badaaglulinyaa ‑aana ‑lɩɩtɩtɔnyaa ɩya 'winyaa ‑aana ‑zliigʋgwlanyaa ‑tɛtɛa n sa 'ta 'lɛ. Sa, ka a cɩ 'kaa 'lɛ ‑laagɔzɔan 'wlʋ na. 11‑N 'ta maa n sa 'tɛ 'lɛ, ‑ma ka n zie 'lɛ anyɩ le aya nclɔɔa ‑ɔ ‑lio 'lɛ bholi ŋlɩa na 'la namʋa, ɩ ‑ka ‑kʋ le ɔ ‑ka ‑badaaglu li, ɔ ‑ka lɩɩ 'tɩtɔ, ɔ ‑ka ‑zlii gʋgwla, ɔ ‑ka ncɛlɩ ‑glaankalɩ, ɔ ‑ka nʋgbu 'mla, ‑aana ɔ ‑ka ghli na. Ɩ 'ta ‑fata lebhe aya 'sɛ 'la nclɔɔa lili dabhlo. 12Na, ‑amʋ ‑ɔ ‑cɩ kaa 'lɛ ‑jlukuun ‑naanʋaa 'tɩtɩpla bha? Nɩkplaan ‑naanʋaa, ‑n 'ta maa a cɩ 'ta 'lɛ 'tɩtɩpla bha? 13‑Jlukuun ‑naanʋaa, Laagɔ cɩ 'ka maa 'tɩtɩpla. ‑Ma anyɩ, a ‑sa ‑abhɔlɛnyɔa acɩ sidiin.

Currently Selected:

1 Kolt 5: NTLD13

Highlight

Copy

Compare