1 Kolt 7

'Cɩcɩɛ 'la cɩa wɔlɩ

1‑A cinɩ ɩmɩa gbʋa a zieen 'lɛ na 'kʋ. Ɩ nanɩ nclɔɔ 'la da le ɔ 'la koa 'ŋlɔ. 2'Bhlɩmɔɔn, a 'la ka 'lɛ ‑badaaglu li na, 'naa ŋodi ŋodi kalɩ ɔla 'ŋlɔ, ɩya 'ŋlɔ 'ŋlɔ kalɩ ɔla ŋodi. 3'Naa ŋodia 'nyɩ ɔcɩ ɔ nʋŋlɔ, ɩya 'ŋlɔa ‑ma 'nyɩ ɔcɩ ɔ ‑ŋuto. 4‑N 'ta 'ŋlɔa ‑ɔ 'ta 'lɛ ɔla 'nyɛkɛa ‑jioli 'kʋ ‑kalɩ, ‑ma ɔ ŋuto. Sɛɛ bhlogbɩɩ ‑n 'ta ŋodia ‑ɔ 'ta 'lɛ ɔla 'nyɛkɛa ‑jioli 'kʋ ‑kalɩ, ‑ma ɔ nʋŋlɔ. 5Bhlogbɩɩ 'la tiea ɔcɩ ɔ 'yʋ, ‑n 'ta le a 'ka neennunu ɩya a 'ka clɩɩ ‑zlʋsaasa 'ma ɩya a 'ka bhibhie na. Ɩla leen, a cɔlɔcɔlɔlʋ 'ciin, ɩya ala ‑ncɩkʋklacɩcɩa a 'ta 'lɛ ‑ka na, 'la kasɛ Sataan* 'plɩlɩda 'nyɩ le ɔ cla anyɩ gbɩɩn.

6N ‑ka ‑sa nyɩtɛ na, ‑jioli n nyɩ 'lɛ anyɩ ‑ma ‑n 'ta ‑jlɩmaa 'n 'nyɩ 'ta 'lɛ anyɩ. 7N ‑waanɩa lebhe ncɛlɩa ‑tɛtɛa, kʋa ‑amʋ 'bhisa. ‑Ma Laagɔ nyɩ nclɔɔ nclɔɔ ɔla sa, ɔ nyɩ ‑anɔ bhlo ‑sa 'nyɩ ɔ nyɩ 'lɛ ‑da -naanɔ -buun sa bhlo.

8Na, n cla ‑gblɔnyaa, ‑gblɔŋwlɛa ɩya 'kuzluŋwlɛa le ɩ nanɩ le ma kʋ mala saa, ‑amʋ 'bhisa. 9‑Ma ɩ ‑ka ‑kʋ le maa cɩ 'ta macɩ 'kʋklalɩɛ mino na, 'naa ma nʋ 'cɩcɩɛ. Sa 'tʋa 'kaa 'lɛ maa 'bhla na, ‑afalɩma 'naa ma nʋ 'cɩcɩɛ.

10N 'clalɩ maa, ‑ɔ nʋɔ 'lɛ 'cɩcɩɛ na, le 'ŋlɔ 'la 'wlʋlʋa ɔ ‑ŋuto cɩɩn, ‑n 'tanɩ ‑amʋ, ‑ma ‑Kwlenyɔa. 11Ɩ ‑ka kʋ le ɔya ɔ ‑ŋuto ya cɩ ‑sasalɩ na, ɔ 'la 'cɩanɩ ŋodi, ‑aana, ɔya ɔla ŋodia 'plɩ bhlo. Ɩya ŋodi ‑ma, ɔ 'la 'tlia ɔ nʋŋlɔ.

12‑Da -naanʋaa, n cla maa lebhe: Gbazɩ bholi bhlo ‑ka 'ŋlɔa ‑ɔ 'ta 'lɛ Zozii 'la pɔɔtɛtɛ ‑ka na cɩɩ, 'nyɩ ɔ ‑ka ‑wa le ɔ ‑yɔɔsɔ cɩ sakʋ na, ɔ 'la 'tlio. ‑Amʋ ‑ɔ nyɩtɛnɩ 'lɛ ‑ma ‑n 'ta ‑Kwlenyɔa. 13'Nyɩ gbazɩ 'ŋlɔ ‑ka ŋodia ‑ɔ 'ta 'lɛ Zozii 'la pɔɔtɛtɛ ‑ka na cɩɩ, 'nyɩ ɔ ‑ka ‑wa le ɔ ‑yɔɔsɔ cɩ sakʋ na, ɔ 'la 'tlio. 14Sa 'ŋlɔa gba 'nyɩ ŋodia ‑ɔ 'ta 'lɛ Zozii 'la pɔɔtɛtɛ ‑ka na, ɔ lɩ ‑kplɔlɩɛ, 'nyɩ ŋodia ‑ma gba 'nyɩ 'ŋlɔa ‑ɔ 'ta 'lɛ Zozii 'la pɔɔtɛtɛ ‑ka na, ɔmɔ ‑ma ɔ lɩ ‑kplɔlɩɛ. Ɩ 'taa sɛɛ ‑kʋ na, ala 'cuoa cɩ 'taa ‑kplɔ. ‑Ma ma ‑kplɔ. 15‑Ma ɩ ‑ka ‑kʋ le ɔmɔa ‑ɔ 'ta 'lɛ Zozii 'la pɔɔtɛtɛ ‑ka, ‑ka ‑wa le ɔya ɔ 'yʋa cɩ cɩsasalɩ na, 'naa ɔ nʋ! 'Dɛ 'la daa na, bholia ‑aana mɛnɔa ‑jionɩ. Ka Laagɔ la 'lɛ anyɩ le a 'ka pupueen kʋ. 16‑Masa, 'ŋlɔ, ‑mɔ ‑ci le ‑n cɩ gba 'nyɩ ‑n ‑ŋuto cɩ gbʋʋnsalɩɛ 'lɩ, ‑aana ŋodi, ‑mɔ ‑ci le ‑n cɩ gba 'nyɩ ‑n nʋŋlɔ cɩ gbʋʋnsalɩɛ 'lɩ bha?

A kʋ ala saa a ‑kʋa 'lɛ na

17‑Awlɛ, 'naa nclɔɔ nclɔɔ kʋ ɔla saa ‑Kwlenyɔ nʋɔ 'lɛ, 'nyɩ ɔ kʋa 'lɛ 'fɩɔn ɔ yɔɔ 'lɛ la na. Ɩmɩ n ca 'lɛ ‑laagɔnɩkplaa 'la ncɛlɩa 'fɩan. 18Bhlo ‑kaa 'kʋdɩɔa 'fɩɔn Laagɔ ‑kɔɔ la na, ɔ 'la ziziea ɔla 'kʋdɩlɩɛa. ‑Anɔ bhlo 'taa 'kʋdɩɔ na, ɔ 'la gbaa ɩya ma 'la 'dɩɔɔ 'kʋ. 19'Kʋdɩlɩɛa 'ta wɔlɩ ‑ylɛylɛ ‑glɩ, 'nyɩ nclɔɔ 'ta 'kʋdɩɔ na, ɩ 'ta wɔlɩ ‑ylɛylɛ ‑glɩ. Ɩmɩa ‑ɩ ‑glɩ 'lɛ wɔlɩ na, ɩmɩ ‑glɩ 'lɛ Laagɔ 'la niwɔlɩa 'la 'kʋplɩlɩlɩɛ. 20Na, 'naa nclɔɔ nclɔɔ kʋ ɔla saa ɔ ‑kʋa 'lɛ, 'nyɩ Laagɔ yɔɔ 'lɛ la na. 21Geyu ‑n ‑glɩa 'lɛ, 'nyɩ Laagɔ yɔɔ 'lɛ la bha? ‑Naa plea ɩla pɔlɛ. ‑Ma ɩ ‑ka ‑kʋ le ‑n cɩa geylia nɩkplaan 'wlʋlɩɛ mino 'titio na, 'maa 'plɩlɩ ‑naa geyliinkʋlɩɛa 'kʋ ɩya ‑n nʋ 'nanɩ.#7.21 Ncɛlɩa ‑anʋa gugu lebhe ka wɔɔnyɩtʋ ‑naa cla 'lɛ lebhe: «Ɩ ‑ka ‑kʋ le ‑n cɩ geylia nɩkplaan 'wlʋlɩɛ mino na, 'wlʋɛ 'kplookʋ.» 22Sa geyua ‑Kwlenyɔ ya 'lɛ la na, ɔ yanɩɔ geylia nɩkplaan ‑sa. 'Sɛtɛɛ bhlogbɩɩ, ɔmɔa ‑ɔ ‑glɩa 'lɛ ‑ncɩkalɩnyɔ 'nyɩ Laagɔ ya 'lɛ la na, ɔ ‑glɩnɩ Klisi 'la geyu. 23Dlu ma ‑plʋ 'lɛ 'nyɩ ma ya 'lɛ anyɩ nɩkplaan 'kplɩ. Na, ala plea acɩ ncɛlɩ 'la geye. 24Bholiecɩnyɩ, Laagɔ 'ci 'kʋ, 'naa nclɔɔ nclɔɔ kʋ ɔla saa ɔ ‑kʋa 'lɛ 'nyɩ ɔ yɔɔ 'lɛ la na.

Ncɛlɩa ‑ɔ 'ta 'lɛ 'cɩcɩɛ ‑nʋɔ na

25'Ŋwlɛa ‑ɔ 'ta 'lɛ ŋodi ‑ci na 'la gbazɔ, n 'ta ‑Kwlenyɔ 'la niwɔlɩ ‑ka. 'Na saa n 'lɩlɩlɩlɩ 'lɛ na, ɩmɩ n nyɩtɛ 'lɛ, 'nyɩ ɩ ‑glɩ nclɔɔa ma cɩ 'lɛ ‑Kwlenyɔ 'la ŋaazɩɩnlɩlɩɛa nɩkplaan ‑delikʋtɛbhalɩ na, 'la niwɔlɩ. 26‑Pɔtɔnʋ 'la 'kwlɩbhɩɛa 'la gbʋ, N gugu lebhe ɩ nanɩ nclɔɔ nclɔɔ 'la da, ɩ ‑glɩ wɔɔnanɩ le ‑a ‑kʋ ala saa. 27‑N cɩɩ 'ŋlɔ bha? ‑Naa 'matɩa le ‑n ka 'cɩcɩɛa gbɔlʋ. ‑N 'ta 'ŋlɔ cɩɩ bha? ‑Naa 'matɩa 'ŋlɔ. 28‑Ma 'bhlɩmɔɔn, ‑n ‑ka 'ŋlɔ 'cɩ na, ‑n 'ta ka nyinyi nʋ. 'Nyɩ 'ŋlɔa ‑ɔ 'ta 'lɛ ŋodi ‑ci na, ‑ka ŋodi 'cɩ na, ɔ 'ta ka nyinyi nʋ. ‑Ma ncɛlɩa ‑ɔ ‑nʋɔ 'lɛ 'cɩcɩɛ na, gbɩɩnclalɩɛ cɩ 'ka maa ŋeni. 'Nyɩ ‑amʋ, n 'ta ‑wa lebhe ɩ ŋeni anyɩ.

29Bholiecɩnyɩ, 'lɩka ɩmɩa n solu 'lɛ anyɩ na. Clɩɩa ‑glɩnɩ 'klipɛ. Na, ‑ɩ 'manɩɔ 'lɛ ‑da na, 'naa maa ‑ɔ ‑ka 'lɛ 'ŋlɔ na, nʋ le saa ma 'taa 'lɛ 'ŋlɔ ‑ka na. 30Maa ‑ɔ tu 'lɛ na, nʋ le saa maa 'tu 'ta 'lɛ na, maa ‑ɔ nʋ 'lɛ ‑pɔpʋɛ na, nʋ le saa maa nʋ 'taa 'lɛ ‑pɔpʋɛ na, maa ‑ɔ pɩa 'lɛ na, nʋ le saa ma 'ta 'lɛ lʋʋ ‑ylɛylɛ 'lɩ na 31ɩya maa ‑laagɔzɔn ‑naa namanɩ 'lɛ na, nʋ le saa 'ɩ namanɩ 'taa 'lɛ maa ‑ylɛylɛ na. ‑Masa ‑laagɔzɔn ‑naa, a ‑jlɛ 'lɛ na, ka ɩ plɩ 'lɛ.

32Na, n 'ta ‑wa le a ple pɔlɛ. Ɔmɔa ‑ɔ 'ta 'lɛ 'cɩcɩɛ ‑nʋɔ na, ‑Kwlenyɔ 'la wɔlɩa 'la pɔlɛ ɔ ple 'lɛ. Saa ɔ cɩ 'ka 'lɛ ‑Kwlenyɔa 'tʋplaplalɩ na, ɩmɩ ɔ 'matɩ 'lɛ. 33‑Ma ɔmɔa ‑ɔ ‑nʋɔ 'lɛ 'cɩcɩɛ na, ‑laagɔzɔan 'la wɔlɩa 'la pɔlɛ ɔ ple le. Saa ɔ cɩ 'ka 'lɛ ɔ nʋŋlɔ 'tʋplaplalɩ na, ɩmɩ ɔ 'matɩ 'lɛ 34'nyɩ ɔ ‑polio 'lɛ. ‑Ma, 'ŋlɔa ‑ɔ 'ta 'lɛ ŋodi ‑ka, ɩya ŋlʋgbɩɔ, ‑Kwlenyɔ 'la wɔlɩa 'la pɔlɛ ma ple 'lɛ le ma 'ka ‑kplɔ, 'nyɛkɛɛn ɩya 'wugoon. ‑Ma 'ŋlɔa ‑ɔ cɩɩ 'lɛ ŋodi na, ‑laagɔzɔan 'la wɔlɩa 'la pɔlɛ ɔ ple 'lɛ. Saa ɔ cɩ 'ka 'lɛ ɔ ‑ŋuto 'tʋplaplalɩ na, ɩmɩ ɔ 'matɩ 'lɛ. 35Na, anyɩ 'titi ala 'nanɩ 'la gbʋ, dɛ n solu 'lɛ anyɩ ɩmɩ ‑naa, ‑n 'ta le n 'ka anyɩ 'bhlu ‑blɩɩn gɩ, ‑ma a 'ka ɩmɩa ‑ɩ nanɩ ala da na nʋ ɩya a 'ka ‑Kwlenyɔ kʋlʋ, pɔlɛ bhloon.

36Gbazɩ nclɔɔ ‑ka ɔla 'ŋlɔa ɔ 'ta ka ka 'lɛ cibhlili na, ‑gbɔɔn ‑wa, 'nyɩ ɔ ‑ka gugu lebhe ɔ 'tɔɔ 'cɩ na, ka ɔ 'tɔɔ 'lɛ zʋ, ‑ma ɩ ‑fata lebhe mala wɔlɩa mʋ 'kʋklʋʋn na, 'naa ɔ nʋ saa ɔ gugu 'lɛ na. 'Naa ma 'cɩcɩlɩ, ‑ma ɔ 'ta ka nyinyi nʋ. 37‑Ma ɔmɔa ‑ɔ ya 'lɛ ɔcɩɩn mʋ, nclɔɔ 'ta 'lɛ 'kʋkpɛ, 'nyɩ ɔmɔ 'titi ɔ ya 'lɛ ŋonu le ɔ cɩ ɔla 'dʋʋnzʋŋlɔa zʋ na, 'dɛnaanɔa 'nyɩ ‑ɔ ya 'nanɩ nʋ. 38Na, ɔmɔa ‑ɔ cɩ 'lɛ ɔla 'dʋʋnzʋŋlɔa na, ɔ nʋ 'nanɩ, ‑ma ɔmɔa ‑ɔ 'cɩ 'tɔɔ 'lɛ na, ɔ 'nɩa zi 'kʋ.

39'Ŋlɔ ‑kʋ ɔ ‑nyɩɔ ɔ ‑ŋuto, daa ŋodia ‑ja ka ka 'lɛ na. ‑Ma gbazɩ ɔ ‑ka 'ku na, ɔ ‑ka ‑jioli ɩya ɔ 'ka nclɔɔa ɔ ‑wa 'lɛ na 'cɩ, ‑ma ɩ ‑fata lebhe ɔ 'plɩ ‑Kwlenyɔa 'la pɔɔtɛtɩkalɩnyɔ. 40'Bhlɩmɔɔn, n gugu lebhe 'kuzluŋlɔa ka ɔla saa ‑kʋ na, ɩ nanɩ ‑gbɔɔn. 'Nyɩ n ‑ka pɔɔtɛtɛ le ‑amʋ ‑ma n ‑kamʋ Laagɔ 'la 'Wugoa.

Currently Selected:

1 Kolt 7: NTLD13

Highlight

Copy

Compare