Hakobo 1
1
Saludo
1Esaki ta un karta di Hakobo,#Mateo 13:55; Marko 6:3; Echonan 15:13; Galatanan 1:19 sirbidó di Dios i di Señor Hesu-Kristu:
Mi ta kumindá e diesdos tribunan ku ta plamá rònt mundu.#1 Pedro 1:1
Fe i sabiduria
2Mi rumannan, ora boso konfrontá ki sorto di prueba ku ta,#Sirag 2:1-5; Sabiduria 3:5-6 tuma esei komo un oportunidat pa ta kontentu. 3Pasobra manera boso sa kaba, prueba den fe ta siña hende soportá sufrimentu ku fortalesa. 4I sòru pa e fortalesa ei hiba boso na madures kompleto i na un bida ireprochabel i pa boso no faya den nada.
5Si kualke un di boso falta sabiduria, resa pidi Dios i lo E duna bo e, pasobra Dios ta gusta duna tur hende sin límite, sin tira nada na nan kara.#1 Reinan 3:7-12; Proverbionan 1—9; Sabiduria 8:2—19:18; Hakobo 3:13-17 6Pero ora bo ta resa, resa ku fe den Dios, sin niun tiki duda, pasobra esun ku ta duda ta manera ola di laman ku bientu ta supla djaki p'aya.#Mateo 7:7-11; Huan 16:23-24 7Un hende asina no mester kere mes ku e ta risibí nada di Señor, 8pasobra e ta un hende ku tin awa den un man, kandela den e otro; e no tin un kondukta stabil.
Pobresa i rikesa
9E ruman den fe sin moda mester ta kontentu ku e tin gran balor#Yeremías 9:24 10i esun ku moda mester ta kontentu ku su rikesa no tin niun balor. Pasobra hende riku ta manera flor di mondi ku no ta keda pa largu tempu. 11Ora solo sali ku su kalor sofokante, e ta kima e matanan; e flornan ta marchitá i nan bunitesa ta kaba na nada.#Isaías 40:6-7 Asina un hende riku ta disparsé, atendiendo su negoshinan.
Prueba i tentashon
12Felis ta e hende ku ta para firme no opstante e pruebanan ku e ta pasa aden. Ora e pasa e pruebanan ku éksito, lo e risibí bida komo premio, un korona#Sabiduria 4:2; 5:16 ku Dios a primintí esnan ku ta stim'É. 13Si un hende ta hañ'é tentá pa prueba, e no mester bisa: ‘Ta Dios mes ta hasi pa mi kai den tentashon,’ pasobra maldat no por tenta Dios, ni Dios mes no ta hasi pa hende kai den tentashon!#Sirag 15:11-13,20 14Pero un hende ta hañ'é den tentashon dor di su mes mal deseonan ku ta sedusié i koutiv'é. 15E mal deseonan ei ta konsebí piká, anto unabes ku e piká yega na su punto kulminante, e ta pari morto!
16Mi rumannan stimá, no laga niun hende gaña boso! 17Tur don perfekto i tur kos bon ku nos risibí ta bini di shelu, di Dios ku ta Kreador di tur e astronan selestial. E sí no ta kambia nunka manera nan; E no ta kambia#Numbernan 23:19; Malakías 3:6 di posishon, laga nos den sombra di skuridat. 18Boluntariamente El a duna nos bida nobo pa medio di e mensahe di bèrdat,#1 Pedro 1:23 pa asina nos por tin na manera di bisa e promé lugá den su kreashon.
Skucha e palabra i kumpli kuné
19Mi rumannan stimá, tene kuenta ku loke mi a bisa i sea ansioso pa skucha, pero lento na papia i na rabia!#Sirag 5:11 20Pasobra rabiamentu no ta hiba na un bida hustu manera Dios ta deseá. 21P'esei antó deshasí di tur sorto di impuresa i di e gran kantidat di maldat den boso bida. Aseptá ku humildat kompleto e palabra ku Dios a planta den boso kurason i ku por salba boso.
22No gaña boso mes i kere ku djis skucha palabra di Dios ta sufisiente; sea hende ku ta pone e mensahe den práktika! 23Esun ku ta djis skucha e palabra di Dios sin kumpli kuné, ta manera un hende ku despues di wak su mes kara den spil, 24ta kita bai i lubidá ki sorto di aparensia e tin! 25Sinembargo esun ku no lubidá loke el a tende, pero ta kumpli ku i fiha su bista riba e lei perfekto ku ta duna libertat, ta haña bendishon di Dios den loke e ta hasi.
26Si un hende ta kere ku e ta mashá dediká na Dios, pero e no por frena su lenga, e ta gaña su mes i su dedikashon no ta sirbi pa nada. 27Ata aki loke Dios Tata ta konsiderá dedikashon puru i ireprochabel: buska drechi di e wérfano i biuda ku ta pasa trafat,#Sirag 4:10 i wak pa maldat di e mundu akí no susha bo.
Currently Selected:
Hakobo 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013