Hakobo 2
2
Tene kuidou ku diskriminashon
1Mi rumannan, boso ku tin fe den nos glorioso Señor Hesu-Kristu no mester diskriminá hende. 2Suponé ku un hende riku ku dede tur na renchi di oro i ku paña karu na su kurpa bishitá boso reunion i un hende pober ku paña mizerabel tambe bini. 3Anto boso ta faboresé e hende bon bistí i bis'é: ‘Tuma e asiento di honor akí,’ pero e hende pober boso ta bisa: ‘Abo keda pará ei banda òf sinta akibou na mi pia.’ 4Ta diskriminá boso ta diskriminá otro i boso motibunan pa balorá hende ta robes.
5Mi rumannan stimá, skucha mi! Dios a skohe hende pober riba e mundu akí pa ta riku den fe i tuma parti na e reino ku El a primintí esnan ku ta stim'É. 6Pero boso ta menospresiá hende pober! No ta hende riku ta oprimí boso i lastra boso hiba dilanti hues? 7No ta nan ta blasfemá e nòmber presioso ku a invoká riba boso?
8Boso ta hasi bon, si di bèrdat boso atené boso na e lei supremo ku nos ta haña den Skritura, esta e Lei ku ta bisa: ‘Stima bo próhimo manera bo ta stima bo mes.’#Levítiko 19:18 9Pero si boso diskriminá hende, boso ta kometé piká i Lei ta kondená boso komo violadó di Lei. 10Pasobra ken ku aten'é na henter Lei, pero faya ku djis ún mandamentu so ta resultá kulpabel di a faya ku tur e otro mandamentunan. 11Ta e mesun Dios ku a bisa: ‘No kometé adulterio’#Éksodo 20:14; Deuteronomio 5:18 a bisa tambe ‘No mata’!#Éksodo 20:13; Deuteronomio 5:17 Ke men ku te na ora bo no a kometé adulterio, pero bo a mata hende, tòg bo ta un violadó di Lei. 12Papia i aktua manera hende ku lo ta husgá pa e lei ku ta hasi nos liber. 13Pues Dios lo no mustra mizerikòrdia, ora E husga esun ku no tabatin mizerikòrdia ku otro hende, pero esun ku sí tabatin mizerikòrdia lo sali viktorioso na momento di huisio.
Fe i obra
14Mi rumannan, ki bal un hende bisa: ‘Mi tin fe’ i su obranan no ta demostrá esei? Akaso e fe ei por salb'é di huisio? 15Suponé ku tin un ruman sin paña drechi pa bisti ni sufisiente kuminda pa kome. 16Ki bal un di boso bis'é: ‘Te aworó! Tur kos bon! Kòrda tapa pa bo no kohe bientu i bon apetit,’ si bo no yud'é den su nesesidat? 17Asina fe tambe ta morto riba su mes, si e no ta kompañá pa obra!
18Pero awor un hende por bisa: ‘Abo tin fe i ami tin obra!’ Anto ami lo kontest'é: ‘Mustra mi kon un hende por tin fe sin obra i ami lo mustra bo mi fe dor di mi obranan.’ 19Bo ta kere ku ta un Dios so tin? Ta bon ku bo ta kere esei, pero asta e demoñonan ta kere esei i nan ta tembla di miedu! 20Hende bobo! Ta mira bo no ke mira ku fe sin obra no tin balor? 21Dios a aseptá nos antepasado Abraham komo hustu pa loke el a hasi: el a pone Isak riba altá pa sakrifik'é.#Génesis 22:1-14; 1 Makabeonan 2:52 22Bo por mira ku obra tabata kompañá i perfekshoná su fe. 23Anto e Skritura akí a keda kumplí: ‘Abraham a konfia Dios i p'esei Dios a konsider'é un hende hustu.’#Génesis 15:6; 1 Makabeonan 2:52 I yama Abraham amigu di Dios.#2 Krónikanan 20:7; Isaías 41:8; Daniel 3:35 24Boso ta mira antó ku Dios ta aseptá nos komo hustu pa loke nos ta hasi i no djis pasobra nos tin fe. 25Esei tambe a pasa ku e prostituta Rahab. Dios a asept'é komo hustu pa loke el a hasi, esta mustra hospitalidat na e spiònnan israelita i yuda nan skapa via di un otro ruta.#Yozue 2:1-21
26Ke men anto, meskos ku un kurpa ta morto si e no tin rosea, asina fe ta morto si e no ta kompañá pa obranan.
Currently Selected:
Hakobo 2: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
