Hebreonan 13
13
Biba komo kristian
1Keda stima otro manera ruman den Kristu. 2No keda sin demostrá hospitalidat, pasobra dor di demostrá esei algun hende, sin tabata sa, a hospedá angel.#Génesis 18:1-8; 19:1-3; Tobit 5:4; Romanonan 12:13; 1 Pedro 4:9
3Kòrda riba prezu komo si fuera boso tabata prezu huntu ku nan, i riba esnan ku ta keda maltratá, pasobra meskos asina por sosodé ku boso.#Mateo 25:35-46
4Tur hende respetá matrimonio, i esposo i esposa keda fiel na otro. Pasobra Dios lo husga esnan ku ta praktiká inmoralidat seksual i ta kometé adulterio.
5No biba pa plaka so,#1 Timoteo 6:6-10 keda kontentu ku loke boso tin. Dios mes a bisa: ‘Mi no ta laga bo nunka bandoná.’#Deuteronomio 31:6,8; Yozue 1:5; Sirag 29:23; Filipensenan 4:11-13 6P'esei nos por bisa ku konfiansa:
‘Señor ta yuda mi;
p'esei mi n' tin miedu.
Anto kiko hende por hasi mi?’#Salmo 56:3-4,9-11; 118:6
7Kòrda riba boso lidernan ku a anunsiá boso e mensahe di Dios. Wak kon nan a biba i kon nan a muri, i tuma un ehèmpel di nan fe. 8Hesu-Kristu ta e mesun Kristu, ayera, awe i den eternidat. 9No laga tur sorto di teoria straño bruha boso. Pasobra ta bon ku nos kurason keda fortifiká dor di Dios su grasia i no dor di regla tokante kuminda; esnan ku a sigui e reglanan akí, no tabatin niun probecho di nan.
10Saserdote ku ta hasi sirbishi den e santuario bieu, no mag kome di e sakrifisio ku a keda ofresé riba nos altá. 11E gransaserdote a hiba sanger di e bestianan den santuario komo sakrifisio pa piká, pero a kima nan kurpa pafó di e kampamentu.#Levítiko 16:27 12P'esei Hesus tambe a sufri pafó di e porta di siudat, pa E konsagrá e pueblo ku su mes sanger na Dios. 13Ban serka djE pafó di e kampamentu anto i sufri e deshonra ku E tambe a sufri. 14Pasobra aki nos no tin un siudat ku ta keda, pero nos ta en buska di e siudat di futuro. 15Ban ofresé Dios pa medio di Hesus kontinuamente un sakrifisio di alabansa, esta e ofrenda ku nos lepnan ta ofres'É ora nos ta alabá su nòmber.#Levítiko 7:12; Salmo 50:14,23; Hoséas 14:2 16Kòrda hasi bon i kompartí loke boso tin ku otro hende; pasobra esakinan ta e sakrifisionan ku ta agradá Dios.
17Obedesé boso lidernan i hasi loke nan bisa; nan ta kuida boso konstantemente, pasobra ta nan mester duna kuenta na Dios. Si boso obedesé nan, nan lo kumpli ku nan tarea ku plaser; pero si boso no obedesé nan, e tarea ta bira un peso pa nan, i esei no ta kumbiní boso.
18Resa pa nos. Nos ta konfia ku nos konsenshi ta limpi, pasobra nos ta trata di komportá nos bon, semper i tur kaminda. 19Mi ta pidi boso orashon spesialmente pa Dios pèrmití mi bolbe serka boso pronto.
Bendishon i despedida
20Dios a tuma Señor Hesus bèk for di morto, Hesus, ku ta e gran wardador di karné#Isaías 40:11; Ezekiel 34; Lukas 15:4-5; Huan 10:1-16 a base di e sanger ku El a drama pa konfirmá e aliansa eterno. Dios, ku ta duna pas,#Éksodo 24:8; Hebreonan 10:29 21proveé boso di tur kos bon ku boso tin mester pa kumpli ku su boluntat. E, pa medio di Hesu-Kristu, hasi den nos loke ta agrad'É. N'E sea tur honor te den eternidat! Amèn.
22Mi ta supliká boso, rumannan, pa ta habrí pa e poko palabranan di enkurashamentu ku mi a skibi. 23Boso mester sa ku nos ruman Timoteo ta den libertat kaba; si e bini lihé, mi ta bini kuné ora mi ta bin wak boso. 24Kumindá tur boso lidernan i henter e pueblo santu. E rumannan for di Italia ta kumindá boso. 25Grasia di Dios sea ku boso tur!#13:25 Tin manuskrito ku ta añadí: Amèn.
Currently Selected:
Hebreonan 13: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
