Exodus 23
23
Perᴋojat maligaksallo sunatuinait.
1Unipkausiksaliortuksaungilatit mikseᴋârtôlungitomik; aggatit ilautailitikit idluitulijunut kigligiudjijôjomavlutit nalâgôngitomik.
2Inugasaksuit maligaksarilungilatit idluitulijomavlutit; idluarsaivingmelo kiojuksaungilatit idluarnek muminasuaromavlugo inuit unuktut taimailiormata.
3Inuglo aklujok nertoraksarilungilat akkerartorninga pivlugo.
4Omigijivit tuktuvaᴋotinga siuterᴋortojoᴋotingalônêt tammaumajok naipigungne uttertitaksarivat tâpsomunga.
5Ilingnik omisuktub siuterᴋortojoᴋotinga ochosimajok nangmartame atâne takogungne, ikajortailigosugalloarungne ikajoraksarivat.
6Idluarnek sangutitaksarilungilat patangajomit erᴋartortaulertilugo.
7Ungasigit pingitsertornermit nalâgôngitomit; pasijaksaungitullo idluartullo toᴋoniarnagit, idluitut idluarneraromanginapkit.
8Tunergusianiglo tigusijuksaungilatit: tunergusiat tautuktut tautungitingmagit, idluartublo oᴋausingit mumikpait.
9Takorngartarlo oᴋumaiksartitaksarilungilat: takorngartaub ômatinga ilitarigapsiuk, ilipse takorngartaulaurapse nuname Egipteneme.
10Jârit 6it kingorlerêklutik nunat karngavigijaksarivat paungangillo katersorlugit:
11Jârille 7ingane merngoersertitaksarivat ᴋikartilugolo, inôᴋativit aklujungit nerrijungnarᴋovlugit; tâpkoalo amiakôtitangit ômajut naternamêtut nerrijaksarivait. Taimailiorvigijaksarivallo perorsêvit vaineliksatalik perorsêvillo orᴋsuktalik.
12Uvlut 6it kingorlerêklutik, suliaᴋartuksauvotit, uvlullo 7ingane merngoersertuksauvotit, tuktuvait siuterᴋortojuillo merngoerserungnarᴋovlugik, kivgavillo arnab erninga, tujormiarlo nakokserᴋovlugik.
13Tamaitalo oᴋauserijakka ilipsingnut nâlaksigik: gûdillo asima atingit erᴋaumaniarasigik, ᴋanernillônêt tusartauniaratik.
14Pingasuertorlutit jâreme uvloksiorviksiortuksauvotit uvamnut.
15Uvloksiorvik sêrnarsauteᴋangitunik ᴋakᴋôjaktorvik uvloksiorutigijaksarivat: ᴋakᴋôjaktortuksauvotit sêrnarsauteᴋangitunik uvlunik 7nenik, sorlo perᴋogapkit, takᴋiub Abibib naliuningane: tâpsomane anilauravit Egiptenemit: tunergutiksalijaranelo sakᴋertoᴋartuksaungilak sâmne:
16Uvloksiorviglo sulinivit paungangita sivorlerpât, karngasortavinivit perorsêvingnut, katersivingat: uvloksiorviglo katersivik, jârib nâningane naliutijok, perutsiatit perorsêvingnit katersorêrungne.
17Pingasuertorlutik jâreme angutitit ilûnnatik sakᴋijârtuksauvut Nâlekab Gûdib sângane.
18Uvamnut tunergutaujub aunga tunergutiksarilungilat ilaᴋartilugo ᴋakᴋôjamik sêrnarsautelingmik; uvamnullônêt tunergutaujub orᴋsunga ᴋomergutaujuksaungilak uvlâk tikidlugo.
19Nunavit perortungita sivorlerpângita ânanaunerpângit âtaksarivatit Nâlekab Gûdivit iglunganut. Tuktungajoarak amâmaktok sulle igajaksarilungilat.
20Ahak, sivunerne Engele tilijomavara, saputjerᴋovlugo ilingnik apᴋome, tikitilutillo iniksaliarimajamnut perᴋovlugo.
21Ileragiuk, nipingalo nâleklugo, sinaungasarniarnagolo; tappanise isumagijungnairniangimagit: atera tâpsomanêngmat.
22Nipingale nâlatsiarungne, piniarlutillo tamainik oᴋauserijamnik, omisukteojomavunga omigijingnut, akkerartorteovlungalo akkerartortingnut.
23Engelima sivorlerniarpâtit, tikitilutillo Amoriterinut, Hetiterinullo, Perisiterinullo, Kânaaniterinullo, Heviterinullo, Jebusiterinullo; tâpkoalo kippigomavakka.
24Tâpkoa Gûdingit pâmaktervigijaksaringilatit kivgartornagillo, piniarningillônêt malingnagit; ochomariktitaksarivatille, gûdingoangillo okpikâtilugit.
25Nâlegarlo Gûdise kivgartoraksarivase, tâpsomalo nerᴋiksatit imiksatillo saimartitsomavait; ᴋanimaserillo pêjaromavakka akunapsingnit.
26Serᴋomitsijoᴋaromângilak piaraksamingnik, ᴋitorngisuitoᴋaromâranelo nunangne; Uvluksavillo unurningit nâmaksititsomavakka.
27Sivôranek uvamnik tilijomavara sivunerne, inuillo ilûnnaita tikilârtatit aseroromavakka, omigijitillo ilûnnaita tunutitsomavakka ilingnik.
28Igupsaksuillo tilijomavakka sivunerne, tâpkoa Heviterit, Kânaaniterillo, Hetiterillo ᴋemâtilârpait sivunernit.
29Jâreme atauserme ᴋemâtitsomangilakka sivunernit, nuna inuerutjaudlaroarmat, ômajullo naternamêtut unuksidlaroarmata ilingnut.
30Naleᴋârdlutik ᴋemâtitsomavakka sivunernit, unukserᴋârtinak nunalo kingormgutilugo.
31Kigleᴋartitsomavagillo imarbingmit, suvlolingmit Filisterit imarbinganut, sunaᴋajuitomillo kôngmut: nunab inungit tunijomagapkit aggangnut; ungorlârpatillo sivunerkut.
32Tâpkoa gûdingillônêt angerᴋatigijaksaringilatit.
33Ineᴋartuksaungilat nunangne idluitulitidlaroarmatit uvamnut: tagva gûdingit kivgartorungne, tamanna nigarniutitut ilingnut ilinganajarmat.
Currently Selected:
Exodus 23: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
