KOLOSÉ 3
3
1Landing hitu, émé méu poli to’o kolém cama agu hi Kristus, kawé koém cao-ca situt éta Surga, nia mangan hi Kristus, ata lonto oné racap wanang de Mori Keraéngy. 2Nuk ga cao-ca situt éta Surga, toé so’ot oné lino. 3Ai méu poli matas agu mosé de méu ceha cama-cama agu hi Kristus oné Mori Keraéng. 4Émé itay tai hi Kristus hitut teing ité mosé, ita kolé méu cama agu Hiam oné angosN.
Manusia Weru
3:5-17
5Landing hitu pandé matas sangged belek de lino ata pande rowak wekis, neho: nelung, rinek, todong, motor agu ngomper ata cama agu io pina-naéng. 6Sanggéd taung gauk da'at situ pandé rabo Mori Keraéng (latang te sanggéd ata toé lorong Hia). 7Danong, méu kolé pandé sangged belek de lino situ, du méu mosé kin lorong belekn. 8Maik te ho’on, oké taung situ ga, neho: rabo, ngger ného acu, pandé da’at, nggecer-nggewuk, pocu agu curup da’at ata pé’ang oné-mai mu’u de méu. 9Néka manga kolé méu adong taus, ai méu poli loak manusia mangas agu gaukn. 10Meu poli paké manusia weru hitut nukung pandé werun lorong gambar de Mori Dédék, kudut pecing tu'ung Mori Keraéng. 11Cai wan ga, toég manga kolé ata Yunani ko ata Yahudi, ata poli sunat ko ata toéd sunat, ata Barbar ko ata Skit, mendi ko ata toé mendi, maik hi Kristus oné sanggén taung, Hia nai ca anggit agu sanggén cao-ca. 12Landing hitu, ai méu ata poli pilé le Mori Keraéng te ciri nggeluk agu momang Liha, méu weli ga paka: lembak nai, gawas, kasi-asi nai, hemu-hel, agu ngéngga nai. 13Ngéngga koé nai agu ampong koé cama taus, émé hiat cengata ngetek ata banay; cama ného Mori poli ampong méun, pandé nenggitu kolé méu. 14Bétan mai sanggéd taung situ: méu paka momang tau, ai momang tau hitu ata pandé neki-ca agu pandé besik asé-ka'é ca imbi. 15Poro hambor-libur di Kristus manga tédéng oné nai de méuy, ai latang te hitu muing méu poli béntas oné ca weki. Agu wali di’am ga. 16Nahé reweng di Kristus ka’éng déméng monggu-roun oné bahi-réha méu, wiga méu ali dod nggalas te toing agu langga koé cama taus. Méu wali di’a kamping Mori Keraéng wa mai nais, canggu déré mazmur agu déré naring agu déré nggeluk. 17Sanggéd cao-ca ata paka pandé ko curup le méu, pandé agu curup taung situ oné ngasang de Mori Yésus, cang agu wali di’a lut Hia oné Mori Keraéng, Ema dité.
Mosé Oné Ka’éng Kilo
3:18--4:1-6
18Oé méut ngasang wina, lorong koé ronas, ai meu imbi Mori Yesus.
19Oé méut ngasang rona, momang koé winas agu néka sehak agu hia.
20Oé anak-anak, lorong koé ata tu’as oné sanggéd cao-ca, ai hitu ata henan oné Morin. 21Oé méut ngasang ema, néka pandé beti-nai de anaks, boto mbalo naid.
22Oé méut ngasang mendi, lorong koé moris oné lino ho’o, oné sanggén cao-ca, néka hanang oné ranga disé kanang kudut nisang nai disé, maik ali junggu, landing rantang Morin. 23Apa kaut pandé de méu, pandé ga mai wa mai nain, cama ného latang te Morin agu toé latang te manusia. 24Pecing le méu, te oné-mai Morin méu kudut tiba mbaté ata ciri lahé de méu. Hi Kristus hitu sengajiy, agu méu ciri mendi Diham. 25Céing kaut ata pandé sala, paka tanggong salan hitu, ai Mori toé manga lélo atan.
Currently Selected:
KOLOSÉ 3: BMNT
Highlight
Copy
Compare
Share
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.
