KOLOSÉ 4
4
1Oé meut ngasang sengaji, agil agu molor koém agu mendis. Nuk dé, méu kolé manga sengajis éta Surga. 2Seber koém oné ngaji, agu jerék koém oné wali di’a. 3Ngaji kolém latang te ami, kudut Mori Keraéng wuka para latang te keréba dami, wiga ami ngancéng tombo latang te pété ceha di Kristus, ai landing hitu tara buig aku. 4Ngaji ga, kudut aku ngancéng tombo si'ang pété ceha hitu wiga gétas kétay.
5Oné woé-joé de méu agu sanggen ata situt toé imbi, nggalas koé mosés agu paké di’a sokor ata mangan. 6Poro curup de méu kanang ata cembesd agu minak dengén. Poro baé le méu, co’oy ata di'an te walé sanggéd réi data.
Cemoln Agu Tabé
4:7-18
7Sanggéd keréba latang te aku kudut toi agu méus li Tikhikus, asé-ka’é dité ca imbi ata momang. Hia ata junggu agu haé reba dami ata keturu laing latangt Morin. 8Hia jera laku ngo oné méuy, betuan ga kudut pecing le méu keréba latang te ami agu kudut hia lémbu nai de méu. 9Hia jera laku cama laing agu hi Onésimus, asé-ka’é ca imbi dité hitut junggu agu momang, cengata oné-mai bahi-réha méu. Isé kudut toi taung agu méu sanggéd cao-ca ata jari cé’é ho’o.
10Tabé latang te méu oné-mai hi Aristarkhus, haé réba ata bui agu aku, agu oné-mai hi Markus bangkong di Barnabas – latang te hia méu poli tiba pedé; tiba koé hiam, émé hia mai oné méuy – 11agu oné-mai hi Yésus ata ngasangn hi Yustus. Hanang isét telu so’o, oné-mai isét poli sunat ata ciri haé reba ca gori daku latang te Adak de Mori Keraéng. Isé situ poli ciri ata lémbu latang te aku. 12Tabé oné-mai hi Épafras latang te méu; hia cengata oné-mai méu, mendi di Kristus Yésus, ata ngaji mtaung latang te méu, kudut méu mberes kis hesés ného ata tu’am agu imbi tu’ung oné sanggén cao-ca lorong ngoéng de Mori Keraéng. 13Ai aku ngancéng téing saka-si latang te hia, te hia wuli-mpuir latang te méu agu latang te isét oné Laodikia agu oné Hiérapolis. 14Tabé latang te méu oné-mai doktér Lukas ata momang agu oné-mai hi Démas. 15Tombo koé le méu tabé dami, latang te asé-ka’é ca imbi oné Laodikia agu latang hi Nimfa agu sanggéd ata serani oné mbaru diha. 16Émé poli bacangn surak ho’o oné bahi-réha méu, gejur koém kudut bacang koléy oné weki serani Laodikia agu surak latang te isét Laodikia ngancéng bacang kolé oné méuy. 17Tombo koé oné hi Arkhipus: Indang koé, kudut pandé di’a-di’ay gori keturu hitut tiba de hau oné-mai Morin.
18Tabé oné-mai aku hi Paulus. Tabé ho’o tulis laku ali limé rug. Nuk koé lampang dakum oné bui ho'o. Widang de Mori Keraéng loréng méuy.
Currently Selected:
KOLOSÉ 4: BMNT
Highlight
Copy
Compare
Share
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.
