KOLOSÉ 2
2
1Ai ngoéng daku, kudut pecing le méu: mendon kéta tili-mpoét daku latang te méu agu latang te isét oné Laodikia agu latang te sanggén taung, siot toéd pecing tu’ung akus. 2Betuan pandé daku hitu kudut lémbu koé nai disé, agu isé neki cas oné momang. Ali hitu tingo lisé agu baé paéln oné imbi kudut pecing pété ceha de Mori Keraéng, ngong hi Kristus. 3Ai oné Hi Kristus cehad sanggéd nggalas agu nggepuk de Mori Keraéng. 4Tombo ho’o laku, boto manga ata adong méu ali curup ata minakd. 5Ai koném po weki rug aku toé manga oné bahi-réha méuk, maik oné naig aku cama laing agu méu kig. Nisang kéta nai daku te lélo mosé de méu hitut inos agu imbi de méu hitut mberes oné hi Kristus.
Mosé Ata Besikn
2:6-15
6Méu poli tiba hi Kristus Yésus, Mori dité. Landing hitu, poro kong kin méu nai ca anggit agu Hiam. 7Poro méu kali waké caler oné Hiam agu téti éta mosé oné Hiam. Poro méu tambang mberes oné imbis, ného hitut poli toingn oné méu. Poro nai de méu peno ali wali di’a.
8Jengkek di’a-di’am, boto manga ata pandé wa-nai de méu ali go'ét mésé data hitut pandé adong. Go'ét mésé situ toé lorong hi Kristus, maik lorong toing de manusiay agu déwa-du'ang de lino ho'oy. 9Ai nai de Mori Keraéng ka'éng oné hi Kristus, ngong oné wekiN hitut ita le matay. 10Méu poli ciri bersikm ai meu nai ca anggit agu Hia. Hiay dé tu'a de sanggéd pemerénta agu data cau kuasa. 11Ai nai ca anggit agu hi Kristus, méu poli sunats: toé ali sunat hitut pandé le manusia, maik ali sunat di Kristus hiot pandé céla meu one-mai belek de wekis hitut ndékok. 12Ai du cebong le waé serani, méu boak cama agu hi Kristus agu lut Hia méu to’o kolé lorong imbis oné kuasa de Mori Keraéng, hitut poli pandé to’o kolé Hia oné-mai ata mata. 13Koném po méu danong matam ali manga ndékoks agu ali toéd sunat wekis, maik poli pandé mosé kolé le Mori Keraéng cama laing agu hi Kristus. Mori Kraéng ampong taungs sanggéd ndékok dité, 14ali koso surak raung hitut mangkong agu ngetek ité. Le pakus oné haju panggol, pandé moras Liha surak raung hitu. 15Oné haju panggol hitu, Mori Yésus pandé lencér taungs déwa-du'ang de sanggéd pemerénta agu ata cau kuasa. Isé porong taungs le lawa do, du hi Kristus todang isé cama ného ata terungku oné ontong Diha.
Kawé ga Cao-ca Situt Éta Surga
2:16--3:1-4
16Landing hitu néka ondang ata te wolo méu, latang te hang agu inung ko latang te leso ramé wulang weru ko leso Sabat. 17Sanggéd taung so’o hanang nénu dé apa situt paka mai, maik tomingn hi Kristus. 18Néka ondang ontong de méu génggél lata siot pisik kasi-asi naid, agu suju malékats ko bombong-rakd le wéla-mata agu toé manga comongn pandé mésé-nai weki ru ali nuk de lino, 19wiga toe nai ca anggit agu hi Kristus ata tu'a laing. Be wa mai perénta de Kristus, igold sanggén weki agu pongo ciri ca ali celi agu ruék, lorong ngoéng de Mori Keraéng. 20Émé méu poli mata camas agu hi Kristus agu poli ledo oné-mai nai de lino ho'o, co’o tara ciri mendi de wintuk situm, néhot ngai mosé kis oné lino ho'o, rapangn: 21néka cau ho’o, néka la’it hitu, néka cégong ho’o. 22Sanggéd taung wintuk situ hanang latang te dokong kaut. Émé polis papéd, toe manga betuad ga. 23Koném po itad penong ali nggalas agu ngaji pandé le rud neho suju malékat, kasi-asi nai, wahéng weki rud, sanggéd wintuk so’o toé manga betua laingd, hanang latang te pandé nisang mosé oné lino.
Currently Selected:
KOLOSÉ 2: BMNT
Highlight
Share
Copy
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.