Filipenses 3

Jesucristuman markäkur salvakunantsikpaq

1Wawqikuna y panikuna, Teyta Diospa makinchö kawëkarqa kushikuyë. Noqa manam ajayätsu tsëllata yapëkuryan qellqamurpis. Tsënö qellqamunqä qamkunapaq allim këkan.

2Llutanta yachatsikuqkunapita cuidakuyë. Tsë allqukunaqa niyan: <<Teyta Dios salvayäshunëkipaqqa leyninkunata cumplirran cuerpïkikunachö señalakuyänëki>>.

3Cuerpuntsikchö mana señalakurpis Espíritu Santu yanapamashqam Teyta Diosta sirwiqkunaqa shonquntsikchö señalashqana këkantsik.#3.3 Cuerpunta señalar compañonninpa punta qaranta roqurir jorquqnömi shonqunkunata señalar jutsa rurëta jaqiriyan.#Jer. 4.4; Rom. 2.28-29; Gál. 6.15; Col. 2.11-13. Manam leykunata cumplirninraqtsu salvakuntsik, sinöqa Jesucristuman markäkurllam.

4Leykunata cumplirninraq salvakushqaqa noqaraqchi leykunata cumplir salvakushqana käman karqan. Manam noqanöqa pipis leykunata cumplishqatsu. 5Leykuna nishqannöllam yurishqäpita puwaq junaqllata señalayämarqan.#Lev. 12.3. Tsënöllam Benjamín trïbupita Israel nuna kä.#Rom. 11.1. Manam mëqan hebreo mayïpis noqanöqa leykunata cumplishqatsu. Fariseo karmi Teyta Diospa leyninkunata mana qonqëta cumplirqä.#Hech. 23.6; 26.5. 6Teyta Dios munashqanta rurëkashqäta yarparmi Jesucristuman markäkuqkunatapis chikir qatikacharqä.#Hech. 8.3; 9.1-2; 22.4; 26.9-11. Tsë leykuna ninqanta llapantam cumplirqä.

7Tsënö cumplirmi yarparqä allita rurëkashqäta. Kananqa noqantsik rëkur Jesucristo wanushqanta musyarmi paqwëpa käyirirqü tsë cumplishqäkuna mana imapaqpis sirwishqanta. 8Rasunpa kaqchöqa Señornï Jesucristuta reqishqämanqa manam imapis iwalantsu. Tsëmi nöpata rurashqäkunaman markäkunäpa rantin kananqa Jesucristullamanna markäkü. Puntata rurashqäkunaqa manam imapaqpis sirwimantsu. 9Manam leyninkunata cumplishqäpitatsu munanqanta ruraqtanö Teyta Dios chaskimashqa, sinöqa Jesucristuman markäkunqäpitam.

10Jesucristutam mas reqita munä. Pëta Teyta Dios poderninwan kawaritsimushqannö noqatapis tsë poderninwan yanapamänantam munä. Tsëmi Jesucristo jipashqannö jiparpis y pëta wanutsiyashqannö wanutsiyämaptinpis pë cäsukushqannö noqapis cäsukushaq. 11Tsëmi shuyarëkä Jesucristuta Teyta Dios kawaritsishqannö noqatapis wanuptï kawaritsimänanta.

Teyta Dios munanqannö kawanantsikpaq

12Manam jutsannaq santu kashqätatsu nikäyaq, sinöqa Jesucristo munashqannö kawanäpaqmi waran waran pëta qatirëkä. Tsënö kawanäpaqmi Jesucristo salvamashqa.

13Wawqikuna y panikuna, manaran Teyta Dios munashqannötsu llapantapis rurëkä. Unë kawashqäta yarparänäpa rantinmi waran waran yarpakachä Teyta Dios munashqannö kawanäpaq. 14Premiuta chaskinanpaq llallinakur cörriqnömi noqapis Teyta Diospa nöpanman chänäpaq pë munashqannö kawëkä. Tsëman chänäpaqmi Jesucristo rëkur Teyta Dios qayamashqa.

15Jesucristuman alli markäkuqkuna, nishqäkunata shumaq käyikuyë. Käyita mana puëdiyaptikiqa Teyta Diosmi käyitsiyäshunki. 16Imanö kaptinpis Jesucristo munashqannö kawashun [y juk yarpëlla kashun.]

17Wawqikuna y panikuna, imanö kawashqätapis rikäyämë.#1Cor. 4.16; 11.1. Jina noqakuna kawayashqänö kawaqkunapita yachakuyë. 18Wakin nunakunaqa mana alli kawarmi Jesucristo cruzchö wanushqanta manakaqpaq churayan. Tsënö kayashqanta atska kutinam qamkunata niyarquq. Kananpis weqïta ramarirmi yapë niyaq. 19Tsë nunakunaqa Jesucristo munashqannö kawayänanpa rantinmi shonqunkuna yarpashqannö kawakuyan. Llutankunata rurayashqanpita penqakuyänanpa rantinmi kushikacharninraq gälakuyan. Kë patsachö kawayänanllapaqmi yarpakachäyan. Tsë nunakunaqa infiernuman jitashqam kayanqa.

20Noqantsikpa markantsikqa gloriam këkan. Tsëmi salvamaqnintsik Señor Jesucristo gloriapita kutimunanta shuyäkïkantsik. 21Pëqa llapanpaqpis puëdiq karmi kë ushakaqlla cuerpuntsikta mushuq cuerpuman tikraratsinqa. Tsë mushuq cuerpuntsikqa kikinpa cuerpunnö mana ushakaqmi kanqa.#1Juan 3.2.

Currently Selected:

Filipenses 3: qwhB

Highlight

Copy

Compare