Filipenses 2

Wakin kaqkunata precisaqpaq churanantsikpaq

1Jesucristupa makinchöqa allim kawëkantsik. Pë kuyamashqam kushishqa kawëkantsik. Espíritu Santupis noqantsikwanmi imëpis këkan. Teyta Diosmi käyikätsimantsik ankupänakur y kuyanakur kawanantsikpaq. 2Tsënö këkaptinqa tsë yarpëlla kar juk shonqulla imëpis kuyanakur kawakuyë. Tsënö këkäyashqëkita musyarmi kushikushaq.

3Nuna mayikiwan ama chikinakuyëtsu ni yachaq tukuyëtsu, sinöqa pïmëtapis allipaq churar respetayë. 4Kikikikunalla alli kawayänëkipaq yarpakachäyänëkipa rantin wakinkunapis alli kawayänanpaq yarpakachäyë. 5Jesucristo kawashqannö qamkunapis kawayë.

6Pëqa Dios këkarpis#Juan 1.1-3; Col. 1.15. manam ciëlullachötsu täkurqan.

7Puëdiq këninta jaqirirmi imëka sirwikuq nunanölla kananpaq noqantsiknö yurikurqan.

8Nuna karmi Teyta Dios munashqanta rurar cruzchö wanurqan.#Mat. 26.39; Juan 10.18; Heb. 5.8.

9Tsëmi Teyta Dios pëta churashqa llapanpitapis mas puëdiq kananpaq.

Pëpa shutin churarqan llapanpitapis mas poderyuq kaqtam.#Heb. 2.9; 12.2.

10Tsëmi ciëluchö kaqkuna, patsachö kaqkuna y infiernuchö kaqkunapis Jesucristuman qonqurikuyanqa.

11Tsëchömi pïmë nunakunapis niyanqa Jesucristo Señornintsik kashqanta.

Tsënö nirmi Teyta Diosta llapanpis alabayanqa.#Isa. 45.23.

Teyta Dios munanqannö kawanantsikpaq

12Kuyë wawqikuna y panikuna, tsënö këkaptinqa qamkunawan këkar yachatsiyashqaqkunata cäsukuyashqëkinölla karuchö këkaptïpis cäsuyämë. Salvashqana kayashqëki musyakänanpaqqa Teyta Diosta mantsakur llapan shonqïkikunawan pë munashqannö kawakuyë. 13Pë munashqannö kawayänëkipaqmi alli yarpëta y poderta kikin qoyäshunki.

14Mana penqapänakushpa y mana liryakushpa imëpis shumaq kawakuyë. 15Tsënö kawayaptikiqa Diospa wamran kayashqëkita käyikurmi pipis mana wasëki rimayanqatsu. Tsëmi mana cäsukuqkunapa markanchö tärarpis#Deut. 32.5. imëka paqaschö aktsi cuenta kayanki.

16Salvakunantsikpaq kaq willakïta imëpis cäsukuyë. Cäsukuyaptikim Jesucristo kutimuptin willakïninta allipaq willapashqäta musyarir alläpa kushikushaq.

17Tsënö kaptinmi wanutsiyämänan kaptinpis kushikü. Wanutsiyämaptinqa sacrificiu jananman vïnuta jichayashqannömi kashaq. Teyta Diosta mana utinëpa sirwiyashqëkipis sacrificiunö kaptin qamkunapis kushikuyë. 18Noqa kushikushqänölla qamkunapis kushikuyë.

Timoteuta Filipusman Pablo kachananpaq ninqan

19Señornintsik Jesucristo munaptinqa Timoteutam#Hech. 16.1-3. kachamushaq. Kutimur imanö këkäyashqëkitapis willaramaptinmi kushikushaq. 20Manam ni pipis kantsu Timoteunöqa. Pëllam noqanö qamkunapaq yarpakachar këkan. 21Wakinkunaqa Jesucristo munashqanta rurayänanpa rantinmi kikinkuna yarpäyashqanllata rurayan.

22Qamkuna musyayankim Teyta Dios munashqannö Timoteo kawashqanta. Pëqa tsurïnömi Jesucristupa alli willakïninta willakur yanapëkäman. 23Tsëmi sentenciäta musyarir pëta kachamushaq. 24Teyta Diosmanmi markäkïkä llawirashqäpita yarqaramur kikïpis watukayaqniki jeqaramunäpaq kashqanta.

Filipusman Epafrodituta kachananpaq ninqan

25Wawqintsik Epafroditutapis qamkunaman kachamushaqmi. Allipaqmi pëta kachëkalläyämurqunki. Teyta Diospa soldädunnö karmi imata jiparpis yanapamashqa. 26Qeshyaptin alläpa llakikuyashqëkita musyarmi qamkunaman kutimïta munëkan. 27Änirpis alläpam qeshyashqa. Antsänanpaqna këkaptinmi Teyta Dios ankupar kachakätsishqa. Tsënöpam alläpa mana llakikunäpaq noqatapis Teyta Dios ankupämashqa.

28Tsëmi pëwan tinkur kushikuyänëkipaq ras kachamushaq. Y rikärir kushikuyaptiki noqapis mananam llakikushaqnatsu. 29Pë chämuptin Señornintsik Jesucristupa shutinchö kushishqa chaskiyanki. Pënö yanapakuqkunataqa llapantapis alli chaskïkulläyë. 30Jesucristuta sirwir qamkunapa rantiki yanapëkämashqanchömi ichikllapa wanushqatsu.

Currently Selected:

Filipenses 2: qwhB

Highlight

Copy

Compare