Filipenses 4
4
Kushishqa kawanantsikpaq
1Kuyë wawqikuna y panikuna, qamkunata alläpa llakiyarnikim watukaqnikikuna shamïta munëkä. Qamkunam premiuta chaskishqä corönänö këkäyanki. Yachatsiyashqaqnö kawakuyaptikim alläpa kushikü. Señornintsik Jesucristo munashqannö imëpis kawakuyë.
2Evodiata y Síntiquitam alläpa rowëkü Señornintsik Jesucristuta chaskikushqana këkarqa juk shonqunölla kawakuyänanpaq. 3Willapäkuq mayï, qamtapis alläpam rowëkuq pëkunata shumaq amishtëkatsinëkipaq. Jesucristupa willakïninta Clementiwan y wakin willapäkuq mayïkunawan willakuptï tsë warmikunam alläpa yanapayämashqa. Libru de la Vïdachömi pëkunapa shutinkuna qellqarëkan.
4Jesucristupa makinchö kawëkarqa imëpis kushikuyë. Yapëmi niyaq: ¡Kushikuyë!#1Tes. 5.16. 5Alli nuna kayashqëkita pïmëpis musyayätsun. Señornintsik Jesucristo kutimunanpaq ichikllanam pishikan.
6Imapaqpis ama llakikuyëtsu. Tsëpa rantinqa Teyta Diosta payllä nir llapanchöpis yanapëkuyäshunëkipaq mañakuyë.#Col. 4.2-4; 1Tes. 5.17-18. 7Tsënö mañakuyaptikim Teyta Dios alli kawëta qoyäshunki. Pëmi shonqïkikunata y yarpënikikunata cuidanqa Jesucristuman markäkur mana llakikuyänëkipaq. Tsëmi imanir kushishqa kawayashqëkita pipis käyiyanqatsu.
8Wawqikuna y panikuna, rasun kaqkunapaq, alli rurëkunapaq y alli kawëpaq imëpis yarpakachäyë. Imapis alli kaptin o alabanantsikpaq kaptinqa tsëkunapaqpis yarpakachäyë. 9Yachatsiyashqaqnö, käyitsiyashqaqnö, wiyayämashqëkinö y imanö kawashqätapis rikäyämashqëkinö imëpis kawakuyë. Tsënö kawakuyaptikim Teyta Dios imëpis yanapayäshunki alli kawakuyänëkipaq.
Pablo payllä nikunqan
10Wawqikuna y panikuna, apatsikayämushqëkita chaskir Teyta Diostam <<payllä>> nï. Manaraq chaskirpis musyarqämi mana qonqëkayämashqëkita. Tsënö kaptinmi pillapis mana shamuq kaptin apatsikayämurqëkitsu. 11Manam pishipukurtsu tsënö niyaq. Imäpis kapamashqanllawan kushishqa kawakïtam yachakurqü. 12Noqa musyämi rïcu kë y waktsa kë imanö kashqantapis. Imanö kawarpis conformakïtam yachakushqä. Tsëmi pacha junta karpis, mallaq karpis, rïcu karpis o waktsa karpis kushishqa kawakü 13Imanö karpis Jesucristo yanapamaptinmi alli kawëkä. 14Tsënö karpis wanëkashqä höra apatsikayämushqëkita chaskir alläpam kushikurqü.
15Filipos markachö wawqikuna y panikuna, musyayashqëkinöpis Jesucristupa alli willakïninta willakuq Macedonia provinciapita ëwaptï wakin iglesiakuna mana yanapayämaptinpis qamkunallam yanapayämashqanki. 16Tesalónica#Hech. 17.1. markachö këkaptïpis yapëkuryanmi wanashqäkunata apatsikayämurqunki.#2Cor. 11.9. 17Manam yapë apatsikayämunëkita munartsu tsënö nikäyaq, sinöqa yanapakuq kayashqëkipita mas bendicionta chaskiyänëkita munarmi.
18Epafrodituwan apatsikayämushqëki llapan wanashqäkunapaq tinkuptinmi imäpis pishintsu. Tsë apatsikayämushqëkim Teyta Diospaq shumaq pukutaq sacrificiunö këkushqa.#Éxo. 29.18. 19Jesucristo rëkurmi gloriachö riquëzankunapita Teyta Dios qamkunatapis llapan wanayashqëkita qoyäshunki. 20¡Yayantsik Teyta Dios imëpis alabashqa këkullätsun! Tsënö katsun.
Cartapa ushanan
21Qamkuna kaqchö llapan wawqikunata y panikunata napëkulläyë. Noqawan këkaq wawqikuna y panikunapis napëkuyäshunkim. 22Tsënöllam kë markachö markäkuq mayintsikkunapis napëkuyäshunki. Mas mandakuq Césarpa wayinchö uryaq wawqikuna y panikunapis napëkuyäshunkim.
23Señornintsik Jesucristo alli këninwan llapëkikunata yanapëkulläyäshï. [Tsënö katsun.]
Currently Selected:
Filipenses 4: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.