1 Corintios 6

Autoridäkunaman mana quejanakuyänanpaq ninqan

1Qamkuna imallapitapis liryar ¿imanirtaq Teyta Diosta mana cäsukuq autoridäkunaman quejakuq ëwëkäyanki? ¿Imanirtaq kikikikunapura arreglayankitsu? 2¿Manaku musyayanki Jesucristuman mana markäkuq nunakunata juzganantsikpaq Teyta Dios churamänantsikpaq kashqanta? Tsënö këkaptinqa imapis kaptin ¿imanirtaq kikikikunapura arreglayankitsu? 3¿Manaku musyayanki angelkunatapis juzganantsikpaq kashqanta? Tsënö kanantsikpaq këkaptinqa ¿imanirtaq wawqikuna y panikuna liryayaptin arreglashwantsu? 4Mëqan wawqiwan o paniwanpis liryar ¿imanirtaq Jesucristuman mana markäkuq autoridäkunamanraq ëwayanki? 5¿Manaku penqakuyanki? ¿Manaku qamkunachö pillapis kan Jesúsman markäkuqpura liryayaptiki arreglayäshunëkipaq? 6Kikikikunapura arreglayänëkipa rantin Jesucristuman mana markäkuq autoridäkunamanraq quejakuq ëwayashqëki manam allitsu.

7Markäkuqpura quejanakurqa mana allitam rurëkäyanki. Quejanakuyanqëkipa rantin piñatsiyäshuptikipis ¿imanirtaq upälläkuyankitsu? Suwapäyäshuptikipis ¿imanirtaq <<jina apakutsunpis>> niyankitsu? 8Qamkunaqa kikikikunapura penqakïpaqmi quejanakïkäyanki y suwapänakïkäyanki.

9¿Manaku musyayanki jutsata ruraq nunakunaqa Teyta Diospa mandakïninman mana yëkuyänanpaq kashqanta? Shumaq käyikuyë: fornicación jutsata ruraqkuna, ïdulukunaman markäkuqkuna, warminta o qowanta engañaqkuna, prostitütanö puriq jövinkuna,#6.9 Prostitütanö puriq jövinkunataqa nunakuna pagayanmi prostitütawannö kakuyänanpaq. ollqupura warmiwannö punukuqkuna, 10suwakuqkuna, ambiciösukuna, borrächukuna, wasarimakuna y sakyapakuqkunapis Teyta Diospa mandakïninman manam yëkuyanqatsu.

11Qamkunapis wakinnikiqa nöpata tsënömi jutsata rurar kawayarqëki. Kananqa Señor Jesucristupa shutinchö Diosnintsikpa Espïritunwan jutsëkikunapita paqashqanam këkäyanki, santunam këkäyanki y jutsannaqnam këkäyanki.

Fornicación jutsapita witikunantsikpaq ninqan

12Qamkunam nikäyanki munayashqëkita rurayänëkipaq librina këkäyashqëkita. Libri karpis manam llapantatsu rurayankiman.#1Cor. 10.23. Manam jutsata rurar kawanantsikpaqtsu libri këkantsik, sinöqa Teyta Dios munashqannö kawanantsikpaqmi. 13Wakinnikiqa kënömi niyanki: <<Mikïqa pachantsikpaqmi y pachantsikqa mikïpaqmi>>. Tsënö niyaptikipis Teyta Diosmi pachantsiktapis mikïtapis ushakätsinqa. Tsënöllam cuerpuntsikpis fornicación jutsata ruranantsikpaqtsu këkan, sinöqa Señor Jesucristo munashqannö kawanantsikpaqmi. 14Teyta Dios pëta kawaritsimushqannömi noqantsiktapis poderninwan kawaritsimäshun.

15¿Manaku musyayanki Jesucristuwan juknölla kayashqëkita? ¿Pëwan juknölla këkartsuraq prostitütawan kakuyankiman? Tsënöqa ama kayëtsu. 16¿Manaku musyayanki juk nuna prostitüta warmiwan kakurqa pëwan juk cuerpunöllana kashqanta? Teyta Diospa palabranpis kënömi nikan: <<Tsënö täkurmi ishkanpis jukllëllanö kayanqa>>.#Gén. 2.24. 17Tsë nishqannöllam Jesucristuman markäkurqa Jesucristuwan juknöllana këkantsik.

18¡Fornicación jutsa rurëpita witikuyë! Wakin jutsakunata rurarqa manam cuerpïkitatsu rakchatëkäyanki. Fornicación jutsata rurarmi sï cuerpïkita rakchatëkäyanki.

19¿Manaku musyayanki Teyta Dios qoyäshushqëki Espíritu Santu tärashqan templu kayashqëkita? Tsënö këkaptinqa cuerpïkikuna manam qamkunapatsu, sinöqa Teyta Diospam.#1Cor. 3.16; 2Cor. 6.16. 20Qamkunataqa Teyta Diosmi rantiyäshurqunki.#1Cor. 7.23; Apoc. 5.9. Tsëmi jutsata mana rurashpa pë munashqannö kawakuyänëki.#6.20 Wakin qepa kaq griego copiakunachömi nin: Teyta Diosta cuerpïkikunachö y espïritïkikunachö glorificayë. Tsëkunaqa Diospam kayan.

Currently Selected:

1 Corintios 6: qwhB

Highlight

Copy

Compare