1 Corintios 7

Casädukunapaq yachatsikunqan

1Kanan käyitsiyashqëki cartakayämushqëkichö tapuyämashqëkipaq. Allim kanman warmiwan nuna mana kakuptin. 2Tsënö kaptinpis jukwan jukwan mana kakuyänanpaq juknin juknin warmiyuq qowayuq kayätsun.

3Qowanta warmin cuerpunta ama michätsuntsu. Tsënölla warminta qowanpis cuerpunta ama michätsuntsu. 4Casakuptinqa warmipa cuerpun manam kikinpanatsu, sinöqa qowanpanam. Y qowanpa cuerpunpis manam kikinpanatsu, sinöqa warminpanam. 5Tsënö këkaptinqa cuerpïkikunata ama michänakuyëtsu.

Wakin casädukunaqa parlayan Teyta Diosta mañakuyänan junaqkuna pasashqanyaq mana pununakuyänanpaqmi. Tsënö parlakurirqa parlayashqëki junaqyaqlla ama pununakuyëtsu. Tsënö kaptinpis ama alläpa unëpaqa jaqiriyëtsu juntu punïta. Parlayashqëki junaq cumpliriptinna yapë pununakuyë. Tsënö mana kayaptikiqa Satanásmi mëqëkitapis jutsaman ishkitsiyäshunki. 6Manam casädukuna pununakuyänanta michëta munartsu tsënö niyaq, sinöqa wakinkuna tsënö rurëta munayaptinmi nikäyaq.

7Kikïllapitaqa imanömi munëkü noqanö mana warmïkushpa täkuyänëkita. Tsënö kaptinpis Teyta Diosmi permitishqa juknintsik juknintsik imanöpis kanantsikpaq.

8Soltërukunatam y pajukunatam käyitsiyaq noqanö japallëkikuna täkuyänëkipaq. 9Japallëki täkïta mana puëdirninqa mas allim casakuyankiman. Jukta jukta munapar kakuyänëkipa rantin casakuyashqëki mas allim kanqa.

10Casädukunatam Señor Jesucristo nirqan qowanpita warmi mana rakikänanpaq.#Mar. 10.12. 11Tsëmi qowanpita rakikarqa mana yapapakïllapa täkunan. Qowayuq këta munarqa qowanwanmi amishtakunan. Tsënöllam qowanpis warminpita rakikänantsu.

12Mëqan wawqipa warminpis rakikëta mana munaptinqa Jesucristuman mana markäkuptinpis warminpita ama rakikätsuntsu. Tsëpita Señor Jesucristo mana yachatsishqa kaptinpis mana rakikänanpaqmi tsënö nï. 13Tsënölla mëqan panipa qowanpis rakikëta mana munaptinqa Jesucristuman mana markäkuptinpis qowanpita ama rakikätsuntsu.

14Ama yarpäyëtsu Jesucristuman qowëki o warmiki mana markäkuq kaptin pëwan täräyashqëki mana alli kashqanta. Jesucristuman warmi markäkuptinqa qowanwan täräyanqan allim këkan. Tsënöllam Jesucristuman qowan markäkuptin warminwan täräyanqan alli këkan. Tsënö mana kaptinqa wamrankunata Teyta Dios manam yanapanmantsu. Tsënö kaptinpis wamrankunata ankuparmi Teyta Dios yanapëkan.

15Jesucristuman mana markäkuq warmi o ollqu rakikëta munarqa rakikäkutsun. Rakikaptinqa jukninpis jukninpis librinam këkan. Teyta Dios manam munantsu casädukuna mana alli kawayänanta.

16Wawqikuna, käyikuyë. Mana rakikaptikiqa itsa warmiki käyikur salvakunqa. Panikuna, qamkunapis käyikuyë. Mana rakikaptikiqa itsa qowëki käyikur salvakunqa.

Señalakushqa o mana señalakushqa karpis, esclävu o libri karpis Teyta Diosta sirwiyänanpaq ninqan

17Jinantinchö wawqikunata y panikunatam kënö nir käyikätsiyaq: Salvayäshunëkipaq Teyta Dios qayayäshuptikiqa señalakushqa o mana señalakushqa karpis, esclävu o libri karpis Teyta Diosta sirwiyë.

18Cuerpïkikunachö señalakushqata qayayäshushqa kaptinqa señalakushqalla kakuyë. Cuerpïkikuna mana señalakushqata qayayäshushqa kaptinqa ama señalakuyëtsu. 19Señalakushqa kayashqëki o mana señalakushqa kayashqëkipis Teyta Diospaqqa iwalllam këkan. Pëqa munan imanö karpis mandamientunkunata cäsukur kawayänëkitam. 20Salvayäshunëkipaq Teyta Dios qayayäshuptiki señalakushqa o mana señalakushqa kayashqëkinölla kakuyë.

21Esclävu këkaqta qayayäshushqa kaptikipis ama llakikuyëtsu. Tsënö kaptinpis esclävu këkäyashqëkipita pillapis jorquyäshuptiki allim kanman. 22Jesucristo rëkur Teyta Dios qayayäshuptikim esclävu kashqa karpis Jesucristuman markäkur librinöna këkäyanki. Tsënöllam Teyta Dios qayayäshuptiki libri kashqa karpis Jesucristuta sirwiyänëkipaq pëpa esclävunna këkäyanki. 23Teyta Diosmi salvayäshurniki rantiyäshurqunki. Tsënö këkaptinqa señalakuyänëkipaq niyäshuptiki o esclävu kayashqëkipita yarqukuyänëkipaq niyäshuptiki ama cäsuyëtsu. Cäsurqa pëkunapa esclävunnömi tikrayanki.

24Wawqikuna y panikuna, tsënö këkaptinqa señalakushqa o mana señalakushqa karpis, esclävu o libri karpis Teyta Diosta sirwiyë.

Casädu o japallan täkuyänanpaq yachatsikunqan

25Kananqa japallan kaqkunapaq parlapäyashqëki. Pëkunapaqqa Señor Jesucristo manam imatapis parlakushqatsu. Tsënö kaptinpis Teyta Dios ankupämar yachëta qoykämaptinqa yachatsiyanqaqta chaskikuyänëkim. 26Kanan witsan alläpa jipakïkuna kaptin noqapa käyikïnïpitaqa soltëru kaqkunaqa japallankunam täkuyanman. 27Casädu karqa warmikipita ama rakikäyëtsu. Japallëkikuna karqa warmita ama ashiyëtsu. 28Tsënö kaptinpis warmita ashirqa manam jutsatatsu rurëkäyanki. Tsënöllam shipashpis casakurqa jutsatatsu ruran. Imanö kaptinpis casakurqa kanan witsan alläpa jipakïkuna kaptinmi mas jipayanqa. Tsënö kananta manam munätsu.

29Wawqikuna y panikuna, kë patsa ushakänanpaq wallkallanam pishin. Tsënö këkaptinqa casädu karpis japallaq kayashqannö kawayätsun.#7.29 Manam warminta jaqiyänanpaqtsu nikan, sinöqa Teyta Diosta mas sirwir kawayänanpaqmi. 30Llakishqa karpis mana llakishqa këkaqnö kawayätsun. Kushishqa karpis mana kushishqa këkaqnö kawayätsun. Imata rantirpis tsëkunaman ama markäkuyätsuntsu.#7.30 Tsënö nirqa käyitsirqan llakishqa karpis kushishqa karpis imata rantishqa karpis Teyta Dios munashqannö kawayänanpaq kashqantam. 31Imëkayuq karpis tsëkunaman yarparäkur ama kayätsuntsu. Kë rikëkashqantsik patsaqa ushakänanpaqnam këkan.

32Manam munätsu yarpakachäkur kawayänëkita. Warminnaq nunakunaqa Señor Jesucristo munashqanta rurayänanpaqmi mas yarpakachäyan. 33Peru warmiyuqkunam sï warminwan alli kawayänanpaq mas yarpakachäyan. 34Tsënö karqa warminta alli rikäyänanpaq y Jesucristuta sirwiyänanpaqmi yarpakachäyan.

Tsënöllam pajukunapis#7.34 Wakin griego copiakunaqa warmikunapis niyanmi. y shipashkunapis Señor Jesucristo munashqannö llapanchöpis santu kawayänanpaq yarpakachäyan. Tsënö kaptinpis qowayuq warmikunaqa qowanwan alli kawayänanpaq masmi yarpakachäyan. 35Tsëta niyaq manam casädu kayänëkita michäyarnikitsu, sinöqa casädu kayänëkipaq o mana casädu kayänëkipaqpis shumaq yarpakachäyänëkita munarmi. Tsënöllam munëkä shumaq kawakur Señor Jesucristuta llapan shonqïkikunawan sirwiyänëkita.

36Pï nunapa warmi tsurinpis qowayuq kananpaq edäninchöna kaptinqa y qowayuq këta munaptinqa casatsitsun. Casatsirqa manam jutsatatsu rurëkan. 37Tsënö kaptinpis casatsita mana munarqa ama casatsitsuntsu. Manam pipis casatsinanpaq o mana casatsinanpaqpis obliganmantsu. 38Tsëmi tsurinta casatsir allita rurëkan. Tsënö kaptinpis mana casatsir mas allitam rurëkan.

39Qowayuq warmiqa qowan kawashqanyaq [ley nishqannölla] qowanllawanmi täranman. Qowan wanuriptinqa librinam këkan jukwan casakunanpaqpis. Tsënö kaptinpis Jesucristuta mana chaskikuq nunawanqa manam casakunmantsu. 40Casakunanpaq libri kaptinpis noqapa yarpënïpitaqa paju mananam yapapakunmannatsu. Tsënö niyaq noqapis Espíritu Santuta chaskikushqa karmi.

Currently Selected:

1 Corintios 7: qwhB

Highlight

Copy

Compare