1 Corintios 5

Madrastanwan kakuq nunata qarquyänanpaq Pablo käyitsinqan

1Qamkunachö juk nuna madrastanwan kakushqantam musyarqü. Pëwan kakurqa alläpa penqakïpaq fornicación jutsatam rurëkan. Tsënö nunataqa Jesucristuta mana chaskikuq nunakunapis alläpam penqapäyan.#Deut. 22.30. 2Tsënö këkaptinqa ¿imanirtaq penqakuyankitsu? Penqakuyänëkipa rantinmi kushikïkäyanki. Tsënö nunataqa ¿imanirtaq ëllukäyashqëkipita qarquriyankitsu?

3Qamkuna kaqchö mana këkarpis nöpëkichö këkaq cuentam këkä. Tsëmi tsë nunataqa juzgarqüna. 4Señor Jesucristupa shutinchö ëllukäyaptikim noqapis qamkunawan këkaq cuenta këkäshaq y puëdiq Jesucristupis qamkunawanmi këkanqa. 5Tsënö këkaptinqa tsë nunata Satanáspa makinman jaqiriyë. Tsëchö jipar jutsanta jaqiriptinran Señor Jesucristo kutimur salvanqa.

6Tsë nunata mana qarqurqa alabakurpis mana allitam rurëkäyanki. ¿Manaku musyayanki tsë jutsaqa ichik levadüralla masata jakatsishqannö kashqanta?#Gál. 5.9. 7Tsënö këkaptinqa qamkunachö këkaq levadürata jitariqnö tsë nunata qarquyë. Tsënöpam mushuq masapita rurashqa levadürannaq tantanö kayanki.#5.7 Pascua fiesta qallëkunanpaqmi Israel nunakuna levadürata wayinkunapita jitarir levadürannaq tantata rurayaq. Tsë costumbriman iwalatsirmi wawqikunata y panikunata Pablo nirqan jutsa ruraq nunata ëllukäyashqanpita qarquyänanpaq. Ëllukäyashqanchö jutsa ruraq nuna mana kaptinnam mushuq masapita rurashqa levadürannaq tantanö wawqikuna y panikuna kayanqa. Pascuachö mallwa üshanö Jesucristo [noqantsik rëkur] wanutsishqa kaptinmi rasunpa levadürannaq tantanö këkäyanki.#Éxo. 12.15; 13.7; Deut. 16.3. 8Tsënö këkaptinqa Pascua fiestata rurayänanpaq levadürata jitariqnö jutsa rurëkunata y mana alli rurëkunata jaqirishun. Tsënö jaqirir Teyta Diospa willakïnin nishqannö kawashun.

9Puntata cartakamushqächöpis#5.9 Tsë cartaqa oqrakashqam këkan. Mëchö kashqantapis manam musyantsiktsu. unënam niyarquq fornicación jutsata ruraq nunakunawan mana ëllukäyänëkipaq. 10Manam llapan tsënö kawaq nunakunapita witikuyänëkipaqtsu tsënö niyaq. Jina manam llapan ambiciösu nunakunapita, suwakunapita y ïdulukunaman markäkuq nunakunapita witikuyänëkipaqtsu niyaq. Pëkunawan mana juntakarqa ¿mëparaq ëwayankiman? 11Tsënö kaptinpis wakin nunakunaqa <<Jesucristumanmi markäkü>> nikarmi fornicación jutsachö kayan, imapaqpis ambiciösu kayan, ïdulukunaman markäkuyan, nunapa wasan rimayan, borrächu kayan y suwakuyan. Pëkunawan mana ëllukäyänëkipaqmi niyaq. Pëkunawanqa mikuyänëkillapaqpis ama ëllukäyëtsu.

12Noqantsik manam puëdiqtsu kantsik Jesucristuman mana markäkuqkunata juzganantsikpaq. Tsënö kaptinpis Jesucristuta chaskikuq mayintsikkuna jutsata rurayaptinqa juzganantsikpaq y willapänantsikpaqpis puëdiqmi këkantsik. 13Jesucristuta mana chaskikuq nunakunataqa kikin Teyta Diosmi juzganqa. Jesucristuman markäkuq mayikikunata willapäyänëkipaq puëdiq këkarqa madrastanwan kakuq nunata qarquriyë. Tsënöpam mana alli rurëkuna qamkunachö kanqatsu.#Deut. 13.5; 17.7; 19.19.

Currently Selected:

1 Corintios 5: qwhB

Highlight

Copy

Compare