Luka 6:27-49

“A ‘ou te fai atu ‘iā te ‘outou o ē fa‘alogo mai, ‘Ia alofa atu i ē o fai ‘outou mo latou fili; ‘ia agalelei atu i ē ita mai ‘iā te ‘outou, ‘ia ‘outou fa‘amanuia atu i ē fetu‘u mai ‘iā te ‘outou, ‘ia ‘outou tatalo fo‘i mo ē tu‘ua‘i fua mai ‘iā te ‘outou. O lē po ‘iā te oe i le tasi alafau, ‘inā liliu atu i ai le tasi; o lē ‘ave ‘ese lou ‘ofu tele, ‘aua ‘e te vaoia atu fo‘i lou ‘ofu tino. ‘Inā avatu ia i tagata uma o ē ole mai ‘iā te oe; o lē fao i au mea, ‘aua ‘e te toe ‘a‘amiina atu. Pei ‘ona ‘outou loto i tagata ‘ona ‘ia latou faia ‘iā te ‘outou, ‘ia fa‘apea lava ‘ona ‘outou faia ‘iā te i latou. “Pe ‘āfai tou te alolofa atu i ē alolofa mai ‘iā te ‘outou, pe se a ‘ea se fa‘afetai ‘iā te ‘outou i lea mea? Auā ‘ua alolofa atu ē agasala i ē alolofa mai ‘iā te i latou. Pe ‘āfai fo‘i tou te agalelei atu i ē agalelei mai ‘iā te ‘outou, se a ‘ea se fa‘afetai ‘iā te ‘outou i lea mea? Auā ‘ua faia lea lava mea ē ‘ua agasala. Pe ‘āfai tou te avatu tupe i ē nonō mai, ma ‘outou fa‘amoemoe i ai e toe maua mai ai, se a ‘ea se fa‘afetai ‘iā te ‘outou i lea mea? Auā e avatu e tagata agasala tupe e nonōina e tagata agasala ‘ina ‘ia latou maua mai sona fa‘atusa. Peita‘i ‘outou, ‘ia ‘outou alolofa atu i ē o fai ‘outou mo latou fili, ma ‘ia agalelei atu, ma ‘ia avatu tupe e nonōina, ‘aua le fa‘amoemoe i se mea e tasi e ‘aumai; e tele ai lo ‘outou taui, e ‘avea fo‘i ‘outou ma fānau a le Silisili‘ese; auā o ia le agamalū i ē agavale, ‘atoa ma ē amio leaga. O lenei ‘ia mutimutivale lo ‘outou alofa, pei ‘ona alofa mutimutivale o lo ‘outou Tamā. “‘Aua tou te fa‘amasino atu, ‘ona lē fa‘amasinoina mai ai lea o ‘outou; ‘aua tou te fa‘asala, ‘ona lē fa‘asalaina mai ai lea o ‘outou; ‘ia ‘outou fa‘amāgaloina atu, e fa‘amāgaloina mai ai ‘outou. ‘Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.” ‘Ua fetalai atu o ia le fa‘ata‘oto ‘iā te i latou, “E mafai ‘ea le tauaso ‘ona ta‘ita‘i i le tauaso? La te lē pa‘u‘ū uma lava ‘ea i le lua? E lē sili le so‘o i lona a‘oa‘o a ‘ua ta‘itasi ma fa‘apei o lona a‘oa‘o o ē ‘ua ‘ato‘atoa ‘ona a‘oa‘oina. Se a le mea ‘e te va‘ai atu ai i si fāsi la‘au i le mata o lou uso, ‘ae lē iloa e oe le utupoto i lou lava mata? Pe mafai fa‘apefea ‘ona e fai atu i lou uso, ‘Lo‘u uso e, ‘inā tu‘u mai ia so‘u ‘eu ‘ese le fasi la‘au i lou mata,’ ‘ae lē iloa e oe le utupoto i lou lava mata? O oe na lē fa‘afiaamiotonu, ‘ia e mua‘i tia‘i le utupoto i lou mata, ‘ona e iloa lelei ai lea e ‘eu ‘ese le fasi la‘au i le mata o lou uso. “E leai fo‘i se la‘au lelei e fua mai i fua leaga; e leai fo‘i se la‘au leaga e fua mai i fua lelei. Auā o la‘au ta‘itasi ma lona lava fua e iloa ai; auā e lē tau e tagata fua o le mati i la‘au tuitui, latou te lē tau fo‘i se fuifui vine i le la‘au talatala. ‘Ua ‘aumai mea lelei e le tagata amio lelei i mea lelei ‘ua teu i lona loto; o le tagata amio leaga fo‘i ‘ua ‘aumai e ia mea leaga i mea leaga ‘ua teu i lona loto; auā o le tele o mea i le loto e tautala mai ai lona gutu. “Se a ‘ea le mea e ta‘ua ai a‘u e ‘outou, ‘Le Ali‘i e, le Ali‘i e,’ ‘ae tou te lē faia mea ‘ou te fai atu ai? O sē sau ‘iā te a‘u ma fa‘alogo i a‘u ‘upu, ma faia e ia, ‘ou te fa‘ailoa atu ‘iā te ‘outou lē ‘ua tusa i ai o ia. E tusa ia ma le tagata ‘ua fai lona fale, ‘ua ia ‘eli maulalo, ‘ua tu‘u le fa‘avae i luga o le papa; ‘ona sau ai lea o le tafe, ‘ua fafati mai le vaitafe i lea fale, ‘ua lē magaoioi ai lava; auā ‘ua fausia lelei. A o lē fa‘alogo, ‘ae lē faia, e tusa o ia ma le tagata ‘ua fai lona fale i luga o le ‘ele‘ele, e leai sona fa‘avae; ‘ua fafati mai i ai le vaitafe, ‘ona pa‘ū loa lea, ‘ona matuā nutipalaina lea o lea fale.”