RANGANIHA 19

Na ki iata na kariana God

1Ma hemuri inê kê rongoa ta na marâ, i manga ga rako era vê na enoni i pasina God. Ngaira ka ngere, ka vi:

“Ge visia raha God!

Ge kasia akê na God iaka,

i raramohaga hunia ma ki teha!

2Na suriha iana ka koro ma ka oto.

Renia ngaia ki bani suria ki hagaitangia na êrâ,

i rongo raha na atana,

ma ki erasia na maveta

renigi na parongana era.

God ki hagaitangia,

suria ngaia ki nahuira ka me na kariana.”

3Ngaira ka ngere nikâ, ka vi:

“Ge visia raha God!

Na hinua raha ga sungia,

ma na robona ki akê

tare ki bê ki arâ!”

4Na meraha tangahuru gi rua matara ke he, ma na marâ mamauri ge he ka bêtuhia ma ka rahesia God, i oga igê na atohana raha, ma ka vi: “Monari! Ge visia raha God!”

Na vagevageha i pasina God

5Ma tenia na atohana raha ki râ me ta na ringena, i vi:

“Mu visia raha God iaka,

igamu hato na kariana,

ma igamu hato na enoni,

na enoni raha ma na enoni purua,

igamu na ani mu hanetasia!”

6Ma hemuri inê kê rongoa ta na marâ, i rongo manga ga rako teha na enoni, i ao raha manga na apena bagabêrugu raha, mangagi na akurua raha. Inê kê rongora, ga vi:

“Ge visia raha God!

Suria God raramohaga hunia,

na Araha iaka, ki ramata!

7Ge vagevage ma ke ageage!

Ge visia raha na arahanga iana.

Suria i ngekê ki na matena

tanga ga hagatakurerua

na Karena Sipi ma kaniana,

i bani hagarênia marena tanga.

8Ga bani hagamarumungenia,

hanana vi tuguni renigi na gahu siki,

ga matarotaro ma ka togatoga.”

(Na girarani na gahu siki ngegê ki vi na ogaha koro iata na kariana God.)

9Ma hemuri na angelo ki vi tangê, ki vi: “Gu sege so vikê: Ga babarisi na enoni, ga bani guhira tanga na ngêra na hagatakuna na Karena Sipi.” Ma na angelo ki vi nikâ: “Na tamasinga monari iana God ngegê.”

10Inê kê susure i maana, ma kê rahesia, ma ngaia ki vi tangê, ki vi: “Siana! Inê nogaku ki na kariana God. Inê ki na tamamu, ma nikâ inê ki na tamata na goamu igê na tongesuriha, ma na ani hato, ga têa gatagata na hagesuringa iana o Jesu. Gu rahesia God ma!”

Renia na hagesuringa iana o Jesu ki angarira na poropete, hanana ga hagabângenia.

Na ani i tagiria na hosi siki

11Ma hemuri i pasina God ki tahataha, ma inê kê rigia, i vora me na hosi siki. Na ani, i tagiria, ka hêtana vi na “Monariha”, ga hagêguritogo renia. Na suriha iana ka oto, ma ngaia ki oto igê na hearihatana iana. 12Na maana ka mangagi na vavatana na gi. Ma ki buhingenigi i bêna rako na tarepuri, ga bani segea na atana igê, ma ki mareha rârâ ta na enoni, vi ge girara, nga noga ma ngaia getea ma. 13Na tuguni iana ki managahu renia na gapu. Ngaira ka hêtana renia vi “Na Tamasinga iana God”. 14Na mane ni me i pasina God ka takua. Ngaira ka tagirira nogata na hosi siki, ma ka tuguni renigi na gahu siki matarotaro. 15Ma i harana ki hura me igê na tatapa borahu, i masi, hanana vi ngaia ki page nahuira re na ara ni enoni hato, ga pe tongesuri. Ngaia ki page marungira renigi na hagaitangiha, ma ngaia ki page piringigi na vaini igê na rusi ni magariaganiha iana God raramohaga hunia. 16Igê na tuguni iana igê na tangana ka bani segea igê na ata, i vi: “Araha raha teha ngavê, i marungira na araha hato ma na maneraha hato.”

17Ma hemuri inê kê bâsia ta na angelo, i ura igê na arito. Ngaia ki ngirira na manu hato, ga gagaha i bevoa, ki vi: “Râ me, ma kamu hakuhaku me tanga na ngêra raha iana God. 18Râ me, ma kamu ngêgi na hasigota na maneraha ma na araha raha iata na mane ni me, ma na mane ni me, ma na hasigota na hosi, ma na ani ga tagirira, ma na hasigota na enoni hato, na kare vurivuri, ma na ani ga mareha, na enoni raha ma na enoni purua!”

19Ma hemuri inê kê bâsira na marâ vasiga, ma na maneraha ni maveta, ma na mane ni me iata, ga bani haku, hanana vi ga meraheariha na ani, i tagiria na hosi, ma na mane ni me iana. 20Ngaira ka rakurerua na marâ vasiga ma na poropete hagaparu, i bani katogi na mena i maana. (Renigi nga na mena ngegana ngaia ki bani hagaparura na ani, ga nahunia na segesegeha iana na marâ vasiga, ma na ani, ga bani rahesia na nununa na marâ vasiga.) Ngaira ka kasirerua so mamauri igê na agua raha ni gi, i vavata, suria i karekare ni sivi. 21Na mane ni me iaterua ka me renia na tatapa borahu, i hura me tenia na harana na ani, i tagiria na hosi. Ma na manu hato ka masu aharêngira renigi na hasigota.

Currently Selected:

RANGANIHA 19: KCB

Highlight

Copy

Compare