RANGANIHA 18
18
I bani vota i Babilone
1Ma hemuri inê kê bâsia ta na angelo, i so me tenia i pasina God. Ngaia ki nahunia na arahanga raha, ma na togatogana ki mavesia na maveta hagenani. 2Ngaia ki ngere raha, ki vi:
“I bani vota i Babilone!
I bani vota i Babilone, na hinua raha!
Babilone raha ki mameaga ngavê!
I ngekê na higona ma na ataro era ka nahunia,
ma na ataka mavê na manu era, ga bera, ka ogasia.
3Suria ngaia ki hagatonomira
na ara ni enoni hato i maveta
renigi na vaini iana.
Na vaini ramo ni teniha era iana ki ruguhira.
Ngaia ki manga na êrâ.
Na maneraha i maveta ka tanu era henia,
ma na enoni i maveta, ga hagavuri, ka ruruguha,
renia ngaia ki tenigi tare na ani ma vê na marâ,
ma ki kasikasi haga tare renigi.”
4Ma hemuri inê kê rongoa ta na ringena tenia i pasina God, ki vi:
“Kariaku, mu hura me!
Mu hura me tenia!
Siana kamu têtê henia igê na tasi iana.
Siana kamu memamasiaga
renigi na hagaitangiha, ga tarahua.
5Suria na tasi iana ka haripage,
ka mataro i vavearo.
Ma God ki pe bonotenigi na parongana era.
6Mu katoa nga manga hanana ngaia i katogamu.
Mu hagamamasiaga teharia ngaia i hagamamasiagagamu.
Mu hagavunusia na kâkâ iana renia na hagaitangiha,
i raharaha teharia na hagaitangiha,
ngaia i vategamu renigi.
7Mu hagamamasiaga apena,
ma kamu hagabono obana,
tagenana ma manga ngaia i paroparo,
ma ki aharêsia na nahuninga iana.
Suria ngaia ki ama ni takotako nga i obana, ki vivi:
‘Inê kê oga igê na atohaku, kê araha!
Inê ki mareha vi na nâ.
I asa hagetage vi ve angi maramara!’
8Tahema, igê na tangiana gi tage
na hagaitangiha hato ka page tarahua:
na mera, na angiha maramara, ma na magêha
ma ki page makaka renia na gi.
Suria na Araha God, i suria,
ki raramohaga hunia.”
9Na maneraha i maveta, ga tanu era henia, ma ka hakunia igê na nahuninga, i aharêsia, ngaira ka page angisia na hinua raha, ma ka page angiangi maramara renia, matena ga bâsia na robona na gi i makaka renia. 10Ngaira ka page ura hagatê ngavê, suria ga magutenia na mamasiaganiha iana, ma ka vivi:
“I era ngavê!
I era ngavê tangago,
Babilone, hinua raha!
I rongo raha na atamu!
I tarahugo na hagaitangiha,
ma ko makaka ototo râ nga!”
11Na mane i maveta, ga hagavuri, ngaira nikâ ka angisia, ma ka angiangi maramara renia, suria i mareha rârâ ta na enoni, vi ge gâga mênga, hanana vi ge vurivuri na marâ iata tenira. 12I mareha rârâ ta na enoni, vi ge vurivuri na golo iata, na siliva iata, na hê ahe iata, ma na maani na egugu iata, ma na gahu siki iata, ma na ani memera, ma na ani mahui, ma na ani rotorotoago memera, ma na ani mavê na apinige sigini koro iata, ma na ani mavê na marâ, ga parugi renigi na reoreo, ma ka tagarahigi renigi na bagorani na apinige, renia na kapa i higa, ma renia na aiani, ma renia na hê; 13ma na marâ, ga katogi re na ngêra, ki ngê koro, ma na marâ ga sigini koro mangagi na ago ma na tavoni na apinige tanga ga sungigi; na vaini ma na oile, na koni ma na raisi, na puruka ma na sipi, na hosi ma na bea na kati, na enoni rakuraku, ma na enoni tagara. 14Na mane, ga hagavuri, ka vi tanga, ka vi:
“Na ara ni marâ koro,
go vanasigi vi go nahunigi,
ka bani magahuru.
Ma ka bani magahuru,
na ruruguha iamu ma na bâbâhamu,
ma ki asa, vi gu page tarahugi aporo.”
15Na mane, ga hagavuri ma ka ruruguha, suria ngaira ka hagavuri i hinua raha ngekana, ngaira ka page rêra hagatê ngavê, suria ga magutenia na mamasiaganiha iana. Ngaira ka page angisia, ma ka page angi maramara renia, 16ka vivi:
“I era ngavê!
I era ngavê tanga na hinua raha!
Ngaia ki tuguni tare renigi na tuguni siki,
ma renigi na gahu rotorotoaga memera ma ka memera,
ma ki rêni renigi na rêni na golo,
ma renigi na hê ahe,
ma renigi na maani na egugu.
17Ngaia ki têtara ototo râ nga
renigi na ara ni ruruguha hato ngegana!”
Na ara ni mane, ga bâsurigi na haka, ma na enoni, ga tagetage igê na haka, ma na mane, ga tagara igê na haka, ma na enoni hato getera, ga kavikavi renigi na marâ ni asi, ngaira ka rêra hagatê ngavê. 18Ngaira ka ngerengere, matena ga bâsia na robona na gi i makaka renia, ka vivi: “Mareha vê ta na hinua raha, vi ge raha ngavê manga na hinua raha ngekê!” 19Ngaira ka kuhuigi na bêta renigi na mako, ma ka angisia, ma ka angi maramara renia, ka vi:
“I era ngavê!
I era ngavê tanga na hinua raha!
Ngaia ki na hinua raha
na avanuni haka, ga tagetage, ka arâ igê,
ma ka ruruguha renigi na nahuninga rako iana.
Ma ngaia ki têtara ototo râ nga
renigi na ara ni marâ hato.”
20Ma inê kê rongoa ta na ki getea nikâ:
“Mu vagevage, igamu mu oga i pasina God,
suria i Babilone ki aruhu.
Mu vagevage, igamu na kariana God,
ma na aposotolo ma na poropete!
Renia God ki bani hagaitangia,
suria ngaia ki erasigamu.”
21Ma hemuri na angelo raramohaga hunia ki tavoa na hê, na apena na bagahê raha ngavê, ma ki arihatenia i asi, ki vi:
“Nga hanana ge sivotagenia
Babilone, na hinua raha,
ma ke râ su ngavê ngekê.
22I asa, vi ge kahu rongogi nikâ i pasimu
na kita ma na ukulele,
na êhihi ma na ahuri.
Na enoni tagara ki asa,
vi ge kahu oga nikâ i pasimu.
I asa, vi ge kahu rongora nikâ na enoni,
vi ge taketake i pasimu. 23Ma ki asa nikâ, vi ge kahu rigia igê
na togatogana na laiti i pasimu.
Ma i pasimu ki asa, vi ge kahu rongoa nikâ igê
na ringeterua na arua, vi garu auragi haoru.
Na mane i pasimu, ga hagavuri,
ka teharira na ani getera hato i maveta,
ma igo ko kuasira na ara ni enoni hato i maveta,
hanana vi go hagaparura.”
24Babilone ka hagaitangia, suria ga tarahugi igê na gaputa na poropete ma na kariana God; na gaputa na ani hato, ga bani nahuira ka me i maveta.
Currently Selected:
RANGANIHA 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
