RANGANIHA 20

Na rehagaro na harisi

1Ma hemuri inê kê bâsia na angelo, i so me tenia i pasina God, i têa i rimana na raburina na kokoro, i so ngavê, ma na seni, i higa. 2Ngaia ki ranguia na hua raha, na bani ma, i vi, vi na atana Ataro Era, se Satana, ma ki rakua, ki oga surigi na rehagaro na harisi. 3Na angelo ki kasia so igê na kokoro, i so ngavê, ma ki raburia, ma ki puruia, hanana vi siana ngaia ki hagaparura nikâ na enoni i maveta, mataro me ka hatohato na rehagaro na harisi. I murina ngekana ka page rupasia, ki gâga nga suria ta na kere matena.

4Ma hemuri inê kê bâsigi na âgâga raha, ma kê bâsira na ani, ga oga so igê. Ga vatera na ramoha, hanana ga surira na enoni. Ma nikâ inê kê bâsira na atarota na enoni, ga bani nahuira ka me, suria ngaira ka tarohenigi na hagesuringa iana o Jesu ma na tamasinga iana God. Ngaira ka pe rahesia na marâ vasiga, se vi na nununa, ma nikâ ngaira ka pe nahunia i raeta, se vi i rimata, na segesegeha iana na marâ vasiga. Ngaira ka mauri, ma ka araha henia o Kirisito suria na rehagaro na harisi. 5(Na ani getera, ga me, ka pe mauri aporo, tariha me ki hatohato igê na rehagaro na harisi.) Ngaira ki na nagona na mauriha aporo. 6Ga babarisi, ma ka koro ngavê na enoni, ga mauri aporo igê na nagona na mêriha aporo ngekana. Na ruata na mera ki asa, vi ge marungira. Ngaira ka page vora re na enoni ni vogasiha iaterua God mo Kirisito. Ngaira ka page araha henia o Kirisito suria na rehagaro na harisi.

Satana ki so hagetage na ramoha iana

7Bevoana ki hatohato igê na rehagaro na harisi, ka page rupasia Satana tenia na ruma ni hagaitangiha. 8Ma ngaia ki page arâ vê, ki hagabekasira na enoni hato i maveta hagenani. Ngaira ka na Gâka ma Magâka. Satana ki page hagahakura ngaira hato tanga na hearihatana. Ngaira ka rako teha vê mangagi na one i one. 9Ngaira ka aruru me tenigi na ara ni agua, ma ka rihuia na hinua iata na kariana God, na hinua i takuia. Ma na gi ki soso me tenia i vavearo, ma ngaira ka makaka renia. 10Ma hemuri Satana, i hagabekasira, ka kasia igê na agua raha ni gi ni karekare ni sivi. Ga bani kasirerua igê na marâ vasiga, ma na poropete hagaparu. Ma ngaira ka page mamasiaga ngavê, igê na tangiani ma na bungiani, tare ki bê ki arâ.

Na suriha raha

11Ma hemuri inê kê rigia na atohana raha siki, ma na ani, i oga so igê. Na maveta ma na vavearo karu gavagava tenia, ma karu arâ su. 12Ma inê kê bâsira na enoni, ga me, ani raha ma na ani purua. Ngaira ka ura i maana na atohana raha. Ka gaigi na buka. Ma hemuri ka gaia nikâ ta na buka, na buka na mauriha. God ki surira na ani, ga me, surigi na parongata, ga bani segegi igê na buka. 13Na asi ki tagarenira me na enoni, ga bani me igê. Na mera ma na hinua iata na ani, ga bani me, karu tagarenira me nogaterua na enoni, ga bani me. Ma God ki surira ngaira hato surigi na parongata. 14Ma hemuri ka kasirerua so na mera ma na hinua iata na ani, ga me, igê na agua raha ni gi. (Na agua ni gi ngekê ki na ruata na mera.) 15Na ara ni enoni, i mareha na atana igê na buka ni mêriha, ka kasia so igê na agua raha ni gi ngekana.

Currently Selected:

RANGANIHA 20: KCB

Highlight

Copy

Compare