RANGANIHA 16

Na apira ni hagaitangiha tenia God

1Ma hemuri inê kê rongoa na ringena, i râ me i ruma ni rotu, ma ki tamasi raha tangara na angelo gi pi, ki vi: “Mu râ, ma kamu karangigi i maveta na apira gi pi ni hagaitangiha tenia God!”

2Na ani gi tage na angelo ki râ, ma ki karangia i maveta na apira iana. Na ani, ga nahunia na segesegeha iana na marâ vasiga ma na ani, ga rahesia na nununa, ga tahea, ka hatamia na mamasiaganiha raha, renia ga gahuira na garu.

3Ma hemuri na ruata na angelo ki karangia i asi na anina na apira. Na asi ki vora renia na gapu, na gapuna na gahua, ma na ara ni ega hato ka makama.

4Ma hemuri na oruta na angelo ki karangia i ve ma igê na ve banga na anina na apira. Ma ngaigi nogani ka vora renia na gapu. 5Inê kê rongoa na angelo, i bâsurigi na ve, i vi:

“God raramohaga hunigo,

go gâga i ngekê,

ma ko bani oga me i nago.

Na hagaitangiha, go vatera, ka oto!

6Ga nahuira ka me na kariamu ma na poropete iamu,

tahema igo ko hagatunumira renia na gapu.

Ngaia ki ararira!”

7Ma hemuri, tenia na bea ni vogasiha, inê kê rongoa, i râ me ta na ringena ki vi,

“Araha, God raramohaga hunigo!

Na suriha iamu ka koro teha ngavê,

ma ka oto ngavê!”

8Ma hemuri na heta na angelo ki karangia igê na arito na anina na apira, hanana na arito ki girara i singira na enoni renia na babahana raha. 9Na enoni ka noro renia na babahana raha, ma ka tamasi erasia na atana God, i araha tangagi na mamasiaganiha ngegana. Ngaira ka usi, vi ge urisi parongata tenigi na tasi, ma ka usi, vi ge visia raha na Araha.

10Ma hemuri na rimata na angelo ki karangia igê na atohana na marâ vasiga na anina na apira. Na roto hono ki buhia na agua, na marâ vasiga ki araha tanga, ma na enoni ka makuka, ma ka ngasigi na meata. 11Ngaira ka tamasi erasia God, i marungia na vavearo, renigi na mamasiaganiha iata ma na garuta. Ma ka pe urisi parongata era.

12Ma hemuri na onota na angelo ki karangia igê na ve raha i Uparatesi na anina na apira, ma na ve ki mamata rârâ vê hanana vi na maneraha tenia kerekê ka tarê igê. 13Ma hemuri inê kê bâsira na ataro era gi oru, ga bâ mangara na sibara. Tani ki hura me tenia na harana na hua raha, tani ki hura me tenia na harana na marâ vasiga, ma tani ki hura me tenia na harana na poropete hagaparu. 14Ngaira ka na nunuta na ataro, ga katogi na mena. Na ataro gi oru ngegana ka arâ tangara na ara ni maneraha hato i maveta hagenani, hanana vi ga hagahakura me, ka meheariha God raramohaga hunia igê na tangiana raha iana.

15“Mu rongo! Inê kê arâ me manga na mane hanago! I babarisi na enoni, i hinaru, ma ki anumasigi na gahu iana, hanana siana ki arârâ rupaturi, ma ki maki i maata na enoni!”

16Ma hemuri na ataro ka hagahakura me na maneraha igê na agua, na Siu ka hêtana vi Aramagetoni.

17Ma hemuri na pita na angelo ki karangia igê na bevoa tatahe na anina na apira. Ta na ringena tenia na atohana raha i ruma ni rotu ki tamasi raha, ki vi: “I hato nga!” 18Ga vora me na marangea, na gugusuhia, ma na akurua, ma na apena na baganunu raha. Haganega tenia i nago kere vê noga, na enoni ka pe hatamia noga na nunu raha manga na ani ngekana. Na nunu ngekê ki era teha ngavê! 19Na hinua raha ki avaga, ki vora ki oru, ma na nunu ki erasigi ngavê na hinua hato i maveta hagenani. God ki takusia aporo i Babilone, ma ki hagatonomia renia na vaini igê na kâkâ iana, na vaini ni mangariaganiha iana. 20Na marê hato ka magahuru, ma na ara ni barani hato ka magahuru nogani. 21Na êsusuna na rangi ka mangagi na apeni na bagahê raha, ma ka higa ngavê, vari na 50 kilo. Ngaira ka rangisira na enoni. Ma na enoni ka tamasi erasia God suria na hagaitangiha renigi na êsusu, ga mangagi na hê ngegê, suria ga hagamamasiagara bâraha.

Currently Selected:

RANGANIHA 16: KCB

Highlight

Copy

Compare