RANGANIHA 17
17
Na êrâ i rongo raha na atana
1Ma hemuri na hitangita na angelo gi pi, ga nahunigi na apira gi pi, ki râ me tangê, ma ki vi: “Râ me, be hagabâsigo, renia vi manga i he kaniga page hagaitangia na êrâ, i rongo raha na atana. Ngaia ki na hinua raha, ga bani tagarahia hagarangigi rako na ve raha. 2Na maneraha i maveta ka râ henia na êrâ, i rongo raha na atana, ma na enoni i maveta ki ruguhira na vaini ni gamogamoha.”
3Na Higona Apu ki angariê, ma na angelo ki meêrâ i na bagamasusu raha. Ma i ngekana inê kê bâsia igê ta na gete, i oga so igê na gerina na marâ vasiga memera, ma na segesegeha, ga erasia God, ka gahuia. Na marâ vasiga ki tonga renigi na bêna gi pi ma na hona tangahuru. 4Na gete ki tuguni renia na tuguni rotorotoaga memera ma ki memera, ma ki rêni renigi na rêni na golo, ma renigi na hê ahe, ma na maani na egugu. Ngaia ki têa na golo na kâkâ, i vunu renigi na marâ ga era ma ka bera, na meni na gamogamoha, i tanugi. 5I raena ka bani segea na atana, i nahunia na girarana pinihi, i vi: “Babilone raha, na kenata na êrâ hato ma na eraha hato i maveta.” 6Ma inê kê bâsia na gete, i ruguhia na gaputa na kariana God, ma na gaputa na enoni, ga bani nahuira ka me, suria ngaira ka toto suria o Jesu.
Matena gê bâsia, inê kê kone ngavê. 7Na angelo ki hagateê, ki vi: “Tanu hega go kone? Be visia tangago na giraraterua pinihi na gete ma na marâ vasiga, i torea, ma ki tonga renigi na bêna gi pi ma na hona tangahuru. 8Na marâ vasiga, go bâsia, i nago ngaia ki mauri, ma i ngekê ngaia ki bani me. Ngaia ki sugia ma, vi ge akê me tenia na kokoro, i so ngavê, hanana vi ga hagamagahurua ngavê. Na enoni i maveta, ga pe segegi so na atata igê na buka na mauriha, matena na maveta ki mamênga, ngaira hato ka page konekone, matena ga bâsia igê na marâ vasiga. Suria i nago ngaia ki mauri, ma i ngekê ngaia ki bani me, ma ngaia ki page voravora me nikâ.
9“Go takotako mataha, ma ko giraragi na marâ igê. Na bêna gi pi ka na hungani gi pi, na gete i oga so igê. Ngaira nikâ ka na maneraha gi pi. 10Na vere rima na hitangita ka bani me. Na ani gi tage na hitangita ki araha mênga, ma tani ki mênga, vi ge arâ me. Matena i arâ me, ngaia ki page gâga sisite ma. 11Ma na marâ vasiga, i mauri i nago, ma i ngekê ki bani me, ngaia ki na varuta na maneraha. Ngaia ki na tamata na ani gi pi, ma ngaia nogana ka page hagamagahurua.
12“Na hona tangahuru, go bâsigi, ngaira ka na maneraha tangahuru, ga mamêngara, vi ge araha, ma ka page vatera na arahanga, hanana ga ramata mangara na maneraha henia na marâ vasiga suria na kere matena abubu. 13Na tangahuru ngegana ngaira hato ka takusia na marâ gi tage ma, hanana ga tagarenigi na raramohata ma na arahanga iata tanga na marâ vasiga. 14Ngaira ka page meheariha na Karena Sipi. Ma na Karena Sipi ma na kariana koro, i bani unira ma ki bani atera, ka page teha renira, suria ngaia ki na Araha raha teha ngavê, i marungira na araha hato ma na maneraha hato.”
15Nikâ na angelo ki visia tangê, ki vi: “Na ve, go bâsigi, na gete ki oga igê, ngaira ka na enoni tenigi na ara ni agua hato i maveta, ma tenigi na ara ni raraha, ma tenigi na ara ni tamasinga hehegitigi, ma tenira na ara ni enoni, ga bâ hehegitigi. 16Na hona tangahuru, go bâsigi, ma na marâ vasiga ka page ruhia na êrâ. Ngaira ka page toregi vê pania na ara ni nahuninga iana, ma ka naka vê ki rupaturi. Ngaira ka page ngaua na hasigona, ma ka page sungigi na surina. 17Renia God ki bani naka igê na aitangihata na obaniha, hanana vi ga tanua na katoha iana, i vi, vi ga tagara haku, ma ka vatea na marâ vasiga na raramohata, hanana i araha, mataro me ka voravora me mave na tamasinga iana God.
18“Na gete, go bâsia, ngaia ki na hinua raha, i marungira na maneraha i maveta.
Currently Selected:
RANGANIHA 17: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
