RANGANIHA 15

Na ki iata na kariana God

1Ma hemuri inê kê bâsia nikâ ta na girarana raha ni hagakoneha: na angelo gi pi henigi na mamasiaganiha gi pi. Ngaigi ki na hatongini na mamasiaganiha, suria ngaigi ka na ani, ga hagahatongia na mangariaganiha iana God.

2Ma hemuri inê kê bâsia ta na marâ, i bâ manga na asi, i togatoga manga na kilasi ma na gi. Ma nikâ inê kê bâsira na ani, ga bani teharira na marâ vasiga, ma na nununa, ma na ani, na atana ki na namba. Ngaira ka ura i na akerena na asi, i togatoga manga na kilasi. Ngaira ka têgi na kita, God i bani vatera renigi. 3Ngaira ka kiria na ki iana o Moise, na kariana God, ma na ki iana na Karena Sipi, ka vi:

“Araha, God raramohaga hunigo,

na tagaraha iamu ka raha,

ma ka hagakonegami ngavê.

Igo ki na Araha,

go marungira na enoni hato i maveta.

Na tarihamu ka oto teha,

ma ka monari ngavê.

4Araha, o ti ki pe hanetasigo vari?

O ti ki usi vari, vi ge visigo raha?

Suria vi igo getego ma ko koro hunigo.

Na enoni hato i maveta ka page arâ me,

ka bêtuhigo ma ka rahesigo,

renia ngaira hato ka bâsigi

na tarihamu oto.”

Na angelo gi pi henigi na mamasiaganiha gi pi

5Ma hemuri inê kê rigia, i tahataha na ruma ni rotu i pasina God, ma i rarona inê kê bâsia igê na kiboru apuna, God ki gâga igê. 6Na angelo gi pi, ga migirâ me na mamasiaganiha gi pi, na hatongini na mamasiaganiha, ngaira ka hura me tenia na ruma ni rotu. Ngaira ka tuguni renigi na tuguni siki matarotaro, ma ka susube renigi na golo. 7Me muri ta na hitangita na marâ mamauri ge he ki tonganira na angelo gi pi renigi na apira na golo gi pi, ga vunu renigi na hagaitangiha tenia God, i mauri tare ma tare ma. 8Na arahanga iana God ma na raramohana karu soso i ruma ni rotu, ma ki bara ngavê ta na enoni, vi ge banu i ruma ni rotu mataro me igê na matena, ga hatohato igê na mamasiaganiha gi pi, ga migirâ me na angelo gi pi.

Currently Selected:

RANGANIHA 15: KCB

Highlight

Copy

Compare