NA MARAMARÊRAVA 22
22
1Na enoni i rongo koro na atana
ki teharigi na ruruguha, na golo ma na siliva.
2Na enoni ruruguha ma na ani i matareha
karu tagenaterua ma igê ta na tarana:
na Araha ki hagavorarerua.
3Na enoni ni takoha ki bâbâ tarana
ma ki rukuruku tenigi.
Na enoni i pe nahuni takoha
ki tari oto râ tangagi
ma ki kahu tangahuria.
4Na enoni i hagahigasia na Araha
ma ki tê viteana
ngaia ki page ruruguha ma ki page mauri arihu
ma na enoni ka page hagahigasia.
5Na tara na enoni era ki arâ suria
ki vunu renigi na tone ma na etu.
Ma ki manga go tako renia na mêrihamu
siana ko arâ igê.
6Matena i sisite mênga na kare, go hagesuria
manga i he ko hanana na ogaha iana.
Ngaia ki page arâ suria igê na ogaha iana hagenani.
7Na enoni matareha ki oga i ruguhana na ani i ruruguha.
Ma ki manga go kaoni na haga tenia ta na enoni
igo ko oga i ruguhana ngaia.
8Manga go hasihasi na tarani ga pe oto,
na bagabevoani ka page vakavaka tangago
ma ko hatohato vigu hagamamasiagara na enoni.
9Manga go mahata ko hagangêra na enoni matareha
igo ko page akê me bâkoro.
10Tarigenia hura na enoni
i hagavoregi tare na hekorekoreani
ma hanana ga hatohato na hekorekoreani,
na hemangariha ma na guhata.
11Manga na ogaha iamu ki korokoro
ma na tamasinga iamu ka manâhi tare,
na maneraha ki manatangenigo.
12Na Araha ki katoa na monariha ki tehateha,
suria i katoa ki vagavaga mave na hagaparunga.
13Na enoni i babaga, ki vivi:
“I pe arariê vi ve huhura.
Na laione i metara, i era ma ki ngauê.”
14Na harana na êrâ ki manga na suta,
go votavota igê, manga God ma ki mangariaga tangago.
15Na kere kare ka tanugi na tarani ga arâ bekabekaga.
Ramusira ma ngaira ka aitangi.
16Manga go hagamamasiagara na enoni ga matareha
ma ko mahata tangara na ani ga ruruguha,
igo ko page hagaratemu maremu.
Na 30 na tamasinga ni takoha mataha
17Gu karingê. Inê be hagesurigo renigi na tamasinga iata na enoni ni takoha mataha. Go hagesuringenigi. 18Manga go pe bonotenigi ma ko girara go tamasigi, igo ko page obakoro. 19Igo nga kani ve hagesurigo renigi, hanana go hagêguritogo renia na Araha. 20Inê kê bani segegi so na tangahuru gi oru na tamasinga ni takoha mataha. 21Ngaigi ka na hagaotonga koro tangago ma ka hagagirarago renia na morana na monariha. Vikana igo ko girara go aramira igê na monariha na enoni ga hagatego.
-1-
22Siana ko hagaerasia na enoni i matareha, suria vi igo ko nahuni ramoha ma ngaia ki mareha. I tagenana ma manga ngaia i gâga igê na tamasinga. 23Na Araha ki panepane henia ma ki page tavoa râ na mêrihana na ani mavê na enoni i tavoa râ tenia na enoni matareha na marâ i oto tanga.
-2-
24Siana ko manatangenia na enoni i bagamangamangariaga, 25i era ma ka tarêhigo na bagatauhana ma ka angarigo.
-3-
26Siana ko surusuru vigo barua na hagaba iana ta na enoni. 27Manga i bara tangago vigu barua, vikana ka page rurugu tenigo.
-4-
28Siana ko gurua rârâ na girarana na pereperegana na mako na êvarimu ga bani naka.
-5-
29Na enoni i manisingenia na tagaraha iana ngaia ki marisina i tagara tanga na maneraha, mareha vi tagara na enoni ga pe araria.
Currently Selected:
NA MARAMARÊRAVA 22: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
