NA MARAMARÊRAVA 23
23
-6-
1Manga go arâ ko ngêngê i pasina na enoni raha, go takusia tare vi ngaia ka na enoni raha. 2Manga vi igo ka na enoni go ngêngê raguragu, go ngêngê takotako. 3Siana ko sirisiriga renigi na ngêra mora i nakagi tangago. Vari ngaia ki uhungigo.
-7-
4Manga go nahuni takoha, siana ko togore apemu vigu ruruguha. 5Na haga iamu ka tare mararatana ni, se manga na ahetaronga i reke ki gaha ki râ ngavê.
-8-
6Siana ko naka na enoni i maongo ki unigo ko ngêngê i pasina. Siana ko sirisiriga renigi na ngêra mora i nakagi tangago. 7Ngaia ki vivi: “Gu ngê. U tono.” Ma ngaia ki hagaparu ma, suria i maongo. 8Igo ko erasigi na visiha koro iamu tanga ma na tauhana ki katogo ko momoa.
-9-
9Siana ko erasigi na tamasinga ni takoha koro tanga na enoni i bekabekaga, suria i asa vige ageagesigi.
-10-
10Siana ko urusigi na bani pereperegani na mako. Siana ko parênigi na mako iata na kare banogo, 11suria na Araha raramohaga hunia ki page naka na siva tangago urusira ma ki page megotamasi igê na tamasinga.
-11-
12Karingagi na hagaotonga koro tangago ma na hagesuringa koro ga vatego renigi.
-12-
13Siana ko hagêrahu vigu hagaitangia na kare. Na kere ramusiha renia na mata ki asa vige hagamesia, 14ma ki hagatahia hete vari na mêrihana.
-13-
15Kareku, manga go nahuni takoha mataha, inê kê page ageagesigo. 16Inê kê page vagevagesigo, matena gê rongogo go tamasigi na takoha mataha.
-14-
17Siana ko hengarira na enoni ga pe botage renia God. Go botage renia hete na hagahigasiana na Araha igê na ogaha iamu. 18Vikana igo ki asa vigu bagahagêguri, ma ko page vagevagesia hete na ogaha iamu.
-15-
19Kareku, gu karingê. Gu tako mataha ma ku uhungia nga ku bêngenia na ogaha iamu suria na tara koro. 20Siana ko hakunira na enoni ga banganira renigi na vaini ma ka botera renigi na ngêra. 21Na enoni ga manga ngegana ka page ragaraga tarata mareta ma ka matareha. Manga go tâ ma ko mauru ma ko ngêngê ma, igo ko page hagesuru kakaga.
-16-
22Go têtê viteaterua na enamu garu aparago. Siana ko makimaki tenirerua matena garu gemêa.
23Gu vurigi na monariha, na takoha mataha, na giraraha ma na aitangisiha, henaka i raha na meni, ma siana ko hagavuringenigi.
24Na enani kare karu ageagesia na kareterua manga vi i nahuni takoha ma ki paronga koro ma ki ototo. 25Go katorerua na enamu karu ageagesigo ma karu vagevagesigo.
-17-
26Kareku, gu karingê maninga, hanana na ogaha iaku ki hagesurigo. 27Na êrâ ma na gete ga gamogamo ka manga na etu go meme igê, se manga na ve karu go vota ko totono igê. 28Ngaira ka mangara na manero ga ahiahi karigo. Ngaira ka katora rako na mane ka gamogamo.
-18-
29Ti ki harahara ape tare? Ti ki hagagege tare? Ti ki varovaro me tare? Ti ki hagamamaria marena tare? Ti ki mamêruga tare na maana? 30Ngaira ka na enoni ga totono papasi tare ma ka torarigi na ani mavê na marâ ni tonoha. 31Siana ko naka na vaini ki hagaokego, henaka i memera se i babaruru igê na kâkâ se i mamaki. 32Hemuri igo ko ape era ngavê, manga i garego na ma se i takego na rorogahua. 33Igo ki asa vigu takotako bâkoro. I bêmu igo ko page bâsigi na ataka mavê na marâ ga hetorariga. Igo ko page tamasi bekabekaga. 34Igo ko page hata manga go oga igê na haka i matavatara, manga go oga igê na geria na ruma na haka i akiki ngavê. Igo ko page momoa. 35Igo ko page tako ko vi: “Ti ki nahuiê? Ti ki rupugiê? Inê kê pe hagare! I arariê vi ve rite. Ma ki tanu hega? Be tono nikâ.”
Currently Selected:
NA MARAMARÊRAVA 23: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
