NA MARAMARÊRAVA 21
21
1Na Araha ki taregi na takoha iana na maneraha
manga na enoni i tarea na ve tanga na agua i obania.
2Igo ko takusia vari, vi na parongamu ki oto
ma na Araha ki hagakitakita hete na aitangihamu.
3Na tauhamu koro ma oto ka hagakoro obana na Araha
teharigi na vogasiha go tagarenigi tanga.
4Na paroparoha ma na heruruhiana
karu angarira na enoni era.
Vikana ngaira ka tasi.
5Manga go tagara ramo ma ko takotako maninga
igo ko page nahunigi rako na marâ.
Manga go hagasua, ngaigi ka page abubu tenigo.
6Manga go ruruguha suria vigo hagahagaparu,
igo ko uhungia vigo taua na roga.
Vikana na mera ki unumigo.
7Na enoni era ga oga sutaga
ka hagarateta mareta renia na mera,
suria ga usi vige paronga koro.
8Na enoni ni hagaparunga ka arâ
surigi na tarani ga ahiohio
ma na enoni ni monariha
ka arâ surigi na tarani ga oto.
9Na ogaha igê na gerina na ruma
ki koro teharia na ogaha i rarona na ruma
henia na gete i ama ni varovaro me nga.
10Na enoni era ka magêsigi tare na eraha.
Ngaira ki asa vige takia henaka vi o ti.
11Manga go hagaitangia na enoni paroparo
igo ko hagaotoa vari.
Manga go hagaotoa na enoni ni takoha,
ngaia ki aganarigi na hagaotonga iamu tanga.
12Na Araha i koro ma ki oto teha ngavê
ki hahutugira na enoni era i ruma iata
ma ki page hagamagahurura.
13Manga go pe aganarigi
na avarasiha iata na enoni ga matareha
igo ko page avaravara hagaborâ ma nogamu.
14Manga ta na enoni ma ki mangariaga tangago
ma igo ko vatea pinihi ta na marâ se na haga,
na mangariganiha iana ki vatovato.
15Manga na suriha ma ki oto
na enoni koro ka vagevage
ma na enoni era ka bubununuga ngavê.
16Na enoni i pe arâ surigi na takoha koro
hanana vige hagaotoa na ogaha iana,
ngaia ki page tarahua na mera.
17Manga vi na mareamu ka na magotoha tare,
igo ko page matareha tare.
Manga go kasikasi haga tare renigi,
igo ki asa vigu nahunia ta na marâ.
18Na enoni era ga uhungia
viga hagamamasiagara na enoni koro,
ngaira ka hagarateta renigi na mamasiaganiha.
Ngaira ka page mamasiaga urusira na enoni koro.
19Manga go gâga getego igê na bagamasusu raha,
ki koro teharia go gâga henia na gete
i mangariaga ma ki varovaro me tare.
20Na enoni ni takoha ka vagevagesigi
na ngêra koro ma na mani marâ koro getigi.
Ma na enoni i bekabekaga
ki kasikasi purua ototo râ nga na haga iana.
21Manga go korokoro tangara na enoni
ma ko pe hagahagaparura,
igo ko page mauri arihu
ma na enoni ka page hagahigasigo
ma ka page korokoro tangago bê aporo.
22Na mane ni takoha ki girara i henahuraua na hinua
henaka ga rakorako na mane ni me ramo igê.
Ngaia ki girara i hogegi na para ni hinua
ga hagêgurigi.
23Go tamasi takotako,
i era ma ki takego ta na tarana.
24Na enoni i paroparo ma ki heruruhi
ki meramarabe na enoni getera.
Ngaia ki purugenia marena
igê na tagaraha i hitenia.
25Na obaniha iana na enoni i babaga
ki nahuia so marena,
suria i usi vige tagara.
26Rako na enoni ka hagatage marâ
ma na enoni koro ka votovoto ma ka mahata.
27Na Araha ki kitenigi na vogasiha iata na enoni era
ma ki kitenira ngavê
manga viga takusira mareta ma igê.
28Siana ko aganarigi
na tamasinga iana na enoni ni hagaparunga
ma ko aganarigi hete na tamasinga iana na ani
i tamasigi ma na marâ i giraragi.
29Na enoni era ka hagabângenia ma,
vi ngaira ka koro.
Ma na enoni koro ki mareha.
Ngaira ka koro monari.
30Na takoha mataha, na giraraha ma na aitangisiha
ki asa vige tamania na enoni
manga vi God ma ki pe tamania.
31Igo ko hagarêra na mane ni me igê na hosi
tanga na hearihatana
ma na Araha hete kani katogo ko tehateha.
Currently Selected:
NA MARAMARÊRAVA 21: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
