NA MARAMARÊRAVA 11
11
1Na Araha ki kitenira na ani ga hagahagaparu
renigi na higahigani na marâ
tangagi na vuriha ma na hagavuringa,
ma ki vagevagesigi hete na higahigani oto.
2Na paroparoha ki hagaratena na makiha.
Na haritagiha ki hagabângenia na takoha mataha.
3Na monariha ki bêngenira na enoni ga koro
ma na hagaparunga ki hagaerasira ngavê
na enoni ga hagahagaparu.
4Igê na tangiana ni suriha
na ruruguha iamu ki asa vige hagatahigo,
nga noga ma na otoha ki girara i hagatahigo.
5Manga igo ma ko korokoro ma ko ototo
i mataku ma tanga na ogaha iamu vi arâ ototo.
Ma ki manga igo ma ko era,
igo ko hagaratemu maremu renia na eraha.
6Na paronga koro ma oto ki page hagatahia na enoni,
ma na ani i hagahagaparu suria ma na vanasiha iana
ngaia ki page hagaratena marena renia.
7Matena na enoni era ki meme
ngaia ki migime na naasiha iana.
Manga go hagêguritogo renigi na ruruguha,
igo ko hagêguritogo hagaborâ ma.
8Na enoni koro ki asitatara tenigi na bagabevoani
ma na enoni era ki hatamigi ngaia hete.
9Na tamasinga iata na ani ga rumakaka renia God
ngaigi ki girara ga hagaerasigo.
Ma na takoha mataha iata na ani ga toto suria God
ngaigi ka girara ga hagatahigo.
10Manga vi na marâ ma ka tavoraha bâkoro
tangara na enoni koro,
na hinua hagenani ki vagevage,
ma ki ngerengere vagevage matena ga meme na enoni era.
11Na enoni koro ka katoa na hinua ki tavoraha bâkoro
ma na tamasinga iata na enoni era ki hagaerasia na hinua.
12Na enoni i tamasi ruhira na enoni
ngaia ki bekabekaga.
Na ani i tako mataha ki munimuni ma.
13Na ani i tabotabohara ki tamasi tararu.
Ma na enoni i asa vige tamasi tararu
ko girara go hagarongoa
renia na marâ go obania vi pinihi.
14Manga na enoni ma ka pe nahunira
na enoni vige bêngenira koro,
na haku iata ki page magahuru.
Manga ga gâga rako na enoni koro ni hagaotonga,
hoi, na enoni ka gâga suri parongata.
15Manga go hurahura pusia na hagaba iana na mahuara
igo ko page hagahunu.
I ararigo hete vigo bani naka vê.
16Ga hagahigasia na gete i toto suria o vaniana
ma na êrâ ki katoa na makiha.
Na ani i babaga ki marehasia tare na haga.
Ma na ani ga ramoramo tangagi na haga
ngaira ka page ruruguha.
17Na enoni i korokoro tanga na ani getea,
ngaia ki korokoro so tanga marena.
Manga go hagamamasiaga na ani getea,
igo ko hagamamasiagago so maremu.
18Na tagaraha iata na enoni era
ka hagavoregi ma na eratani.
Ma na enoni i paronga koro ma oto
ngaia ki page nahunia na mena koro.
19Na enoni i togeaga ki paronga koro,
ngaia ki page mauri,
ma na ani i togeaga ki bagaparonga,
ngaia ki page meme.
20Na Araha ki kitenira na ani ga bagatauhata tare
ma ki takuira na ani ga paronga koro.
21Na hagaitangiha ki asa vige tihira na enoni era
ma na enoni koro ki mareha rârâ.
22Na bâkorohana na gete i pe nahuni takoha
ki manga na eburungi na golo i barisuna na bo.
23Na marâ na enoni koro ga obanigi
ka hagavoregi na marâ koro,
ma na marâ na enoni era ka tenigi
ka hagamangarira na enoni getera.
24Tani na enoni ka mahatangenigi na haga iata.
Henaka ma ngaira ka ama ni ruruguha nga.
Tani ka maongo renigi na haga iata.
Henaka, ma ngaira ka ama ni matareha nga.
25Gu mahata
ma hanana go page nahunia na ramana.
Gu tamanira na enoni getera
ma hanana go page tarahua na hetamaniha bê aporo.
26Na enoni ka visia bera na ani
i pe obania vige hagavuri ngêra,
suria i naasia na matena
i raharaha igê na meni na ngêra.
Ma na enoni ka visia koro na ani
i hagavuri ototo râ.
27Manga go tabea na koroha,
God ki page korokoro tangago.
Ma manga go tabea na eraha,
na eraha ki page tarahugo.
28Na enoni ga hagêgurigi ma na ruruguha iata
ka mangagi na ahani na apinige ga turituri.
Ma na ani ga hagêguria God ka page mauri
mangagi na ahani na apinige ga surusuru tare.
29Na mane i pe botage renigi na ahemata ma na nahuninga iana
ngaia ki page nahunia na roga purua ma.
Na mane bekabekaga ngekana ki page vora re
na kare rakuraku iana na enoni i nahuni takoha.
30Na enoni i tototo suria God
ngaia ki hagavorea na mauriha,
ma na ani i gâga sutaga ki hagamesia na mêriha.
31Na enoni ga tê viteana God
ka nahunigi na meta i maveta ikê.
Ma ki tagenana ma tangara na ani
ga erataga ma ka murisigea God.
Na meta ka na hagaitangiha hete.
Currently Selected:
NA MARAMARÊRAVA 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
