NA MARAMARÊRAVA 10
10
Na maramarêrava iana o Solomone
1Igê nga ka na maramarêrava iana o Solomone:
Na kare mane i tako mataha,
ngaia ki katorerua na enana karu vagevage,
ma na ani i bekabekaga ki hagamamasiagarerua.
2Na ruruguha go nahunigi, suria go hagahagabeka,
ki asa hagetage vige tamanigo.
Na monariha ki girara i hagatahigo.
3Na Araha ki pe nakara na ani ga tê viteana,
ke mesi magêha,
ma ki nakara na ani ga era ma ka mâmângoga
ki marehasira na marâ ga obanigi.
4Na babaganiha ki page katogo ko matareha.
Na tagaraha ramo ki page katogo ko ruruguha.
5Na ani i nahuni takoha,
ngaia ki totora na ngêra matena ga mariri.
Na ani i tâ ma ki mauru matena ga mariri,
ki araria viga hagamakia.
6Tanga na ani i koro,
na marâ koro ka page tarahua.
Ma na ani i era ki hagaratena marena.
7Ga takusira na enoni ga koro renigi na korohata
ma ka hitenira rêrê na enoni era.
8Na enoni ga nahuni takoha mataha
ka aganarigi na hagaotonga koro.
Ma na enoni ni bekabekaniha
ka ararami bê aporo ma ka hagarateta mareta.
9Na enoni i oto na ogaha iata
ka asitatara ma ka oga purunguni.
Ma na ani ga hagahagabeka
ka page tahetara renira.
10Na enoni ga tokorenigi na hagaparunga
ka hagamamasiagara na enoni getera
ma ka hagarateta mareta.
11Na tamasinga iana na enoni koro
ka manga na ve banga ni mêriha,
ma na tamasinga iana na enoni era
ka hagamamasiagara na enoni.
12Na hekiteniha ki hagavorea na hekorekoreana
ma na hetakuiha ki hagamanagi na ara ni eraha.
13Na enoni i nahuni takoha ki tamasi takotako
ma na ani ga bekabekaga ki arari ga ramusira.
14Na enoni ni takoha mataha ki nakagi so
na giraraha iana tanga na matena i araria vi tamasi.
Ma na ani i bekabekaga ki asa vige muni na harana
ma ka akê me ma na eraha.
15Na enoni i ruruguha ki nahuni ramoha
ma na enoni i matareha ki mareha rârâ.
16Na koroha ki apara na koroha
ma na eraha ki apara na eraha.
17Na enoni ga aganarigi na hagaotonga
ngaira ka râ suria na tara ni mêriha.
Ma na ani ga usitenigi na hagaotonga
ngaira ka hagatasia na tara.
18Na ani i kitenia na tamana ma ki pinihia,
ngaia ki bagasusuka.
Na ani i toratora tamasinga, ki bekabekaga.
19Na enoni i manitavaragi
ki pe asa tanga vige tasi rêrê.
Ma na ani i tako mataha, ki pe tamasi bâraha.
20Na tamasinga iana na enoni koro
ka mangagi na siliva taranini.
Ma na takoha iana na enoni era
ka na rogaroga purua.
21Na tamasinga iana na enoni koro
ka tamanira rako na enoni.
Na ani ga bekabekaga ka mesi bekabekaniha.
22Na korohana na Araha ki katogo ko ruruguha
mareha vi na tagaraha ramo.
23Na ani i bekabekaga ki vagevagesigi na bagatauhana.
Na ani i nahuni takoha ki vagevagesia na takoha mataha.
24Ki page tarahua na enoni era
na marâ i magutenia,
ma na enoni i tê viteana God
ki page nahunia na marâ i barigia.
25Na roga raha ki rogatenira vê na enoni era
ma na enoni koro ka tahi tare.
26Siana ko naka na enoni i babaga
ki tagara tangago.
Ngaia ki manga na marâ i mangurigo
se i rubuhigi na maamu.
27Na enoni i hagahigasia na Araha
ngaia ki page mauri arihu.
Ma na enoni era ka meme buta.
28Na vagevageha ka na marâ
na enoni koro ka girara ga naasia.
Ma na enoni era ki asa ge girara
vige naasia ta na marâ.
29Na Araha ki anumasira na ani ga totosuria,
ma ki hagamagahurura na ani ga erataga.
30Na enoni koro ka page gâga suri parongata tare
ma na enoni era ka page magahuru.
31Na enoni koro ka tamasi igê na takoha mataha
ma na meata na enoni era ka page retegi râ.
32Na enoni koro ka tamasigi na tamasinga koro
ma na enoni era ka tamasigi na hagahagaparunga.
Currently Selected:
NA MARAMARÊRAVA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
