NA MARAMARÊRAVA 12
12
1Na enoni i obania na giraraha,
ngaia ki obanira na enoni viga hagaotoa,
matena i pe arâ bâkoro.
Ma na ani i usitenia na hagaotonga
ngaia ki bekabekaga.
2Na Araha ki vagevagesira na enoni koro
ma ki hagaitangira na ani ga hagavoregi ma na eraha.
3Na enoni era ka page vota
ma na enoni koro ka page rêra nganganihaga
manga na apinige ga so na vagani.
4Na gete koro ki manga na tarepuri iana o vaniana,
ma na gete i hagamakia o vaniana,
ngaia ki manga na bagamaeha raha
i ngaua na apena o vaniana.
5Na enoni koro ka katogo maninga
ma na enoni era ka obania ma viga hagahagaparugo.
6Na tamasinga iata na enoni era
ka hagamesira na enoni,
ma na anita na enoni koro ka hagatahira hete.
7Ga page hagamagahurura na enoni era tenia na maveta
ma na ruma iata na enoni koro ka page gâga hagahu.
8Manga igo ka na enoni ni takoha koro, na enoni ka kasigo akê.
Manga igo ma ko bekabekaga, na enoni ka ruhigo.
9Manga igo ka na enoni purua ma
ma ko tagara ko nahuni ngêra ga arari,
igo ko teharia na ani i hagabângenia vi ruruguha
ma hete i marehasia na ngauha.
10Na enoni koro ka marupera maninga na togoha iata
ma na enoni era ka hagamamasiaga apeta ma na anita.
11Na enoni i tagara ramo i mu iana
ngaia ki nahunigi rako na ngêra,
ma na ani i gagaha na bêna
ki pe nahuni takoha koro.
12Na enoni era ka vanasigi ma na tarani ga pe koro,
ma na enoni koro ka akê me
manga na apinige i hungu bâkoro.
13Na enoni i hagaparu ki tutu igê na hagaparunga iana marena
ma na enoni ni monariha ki mareha.
14Na memu ka ararigi na tauhamu ma na tamasinga iamu.
Na marâ go atea ngaia noga.
15Na enoni bekabekaga ki takusia
vi ngaia ki ototo tare,
ma na enoni ni takoha ki aganarigi na hagaotonga.
16Na enoni i bekabekaga ki mangariaga rêrê,
matena i pe obania ta na marâ.
Ma na enoni i nahuni takoha, ki munia so ma.
17Matena go tamasi igê na monariha
igo ko katoa na otoha.
Ma na hagaparunga ka hagavoregi ma na tarani ga pe oto.
18Na bagatamasinga ka mangagi na tatapa borahu
ga kumukumu i apeta na enoni.
Ma na tamasinga takotako ka girara
ga hagamavogi na maara.
19Na monariha ki asa vige page hato.
Ma na hagaparunga ki hatohato matena i rangaranga.
20Na hagaparunga ki gâga igê na aitangihana na enoni era,
ma na enoni i tangasia na marapeha
ngaia ki tarahua na vagevageha.
21Na bagabevoana ki asa vige tarahua na enoni koro
ma ki aharêsia hete na enoni era.
22Na Araha ki kitenira na enoni ni hagaparunga
ma ki obakoro renira hete na ani
ga hagamonarigi na tamasinga iata.
23Na enoni ni takoha ka munigi so noga na giraraha iata,
ma na ani ga pe nahuni takoha ka hagabângenigi na bekaniha iata.
24Na tagaraha ramo ki page vatego re na ramoha
ma ki manga go babaga
igo ko page vora re na kare rakuraku.
25Na anumanumaha ki hagamamasiagago
ma na tamasinga ni haganakuha ki hagakoro obamu aporo.
26Na enoni koro ki bêngenia na tamana suria na tara oto,
ma na enoni era ki katoa na tamana
ki hagatasia na tara oto.
27Na enoni i babaga ki asa
vige tarahua na bo i hagavasi tanga
ma ki manga go tagara ramo
igo ko page nahunigi rako na marâ.
28Na otoha ma na koroha ka na tara tanga na mauriha
ma na eraha ki na tara tanga na mera.
Currently Selected:
NA MARAMARÊRAVA 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
