HEBEREO 11

Na enoni ga nganganihaga igê na tongesuriha

1Manga vi igia, ma ka tongesuri, igia ka takotako togo renigi na marâ, ga naasigi. Igia ka takotako togo renigi na marâ, ga pe bâsigi. 2Na mane, ga oga i nago kere vê noga, God ki visira koro, suria ngaira ka nganganihaga igê na tongesuriha.

3Renia igia ka tongesuri, tahema igia ka girara, vi God ki hagavorara na ara ni marâ hato renia na tamasinga iana. Manga ngekê na marâ, ga girara ga bâsigi, ka voravora me henigi na marâ ga pe girara, vi ge bâsigi.

4Renia o Abele ki tongesuria God, tahema ngaia ki girara, vi tagarenia tanga God na vogasiha, i koro teharia na vogasiha iana o Kaine. Suria ngaia ki tongesuria God, God ki visia, vi ngaia ki na mane, i koro ma ki oto i maana, renia God ki aganarigi na votovoto iana. Suria na tongesuriha iana o Abele ki tamasi mênga, henaka vi ngaia ki bani me.

5Renia o Enoke ki tongesuria God, tahema i pe me. Ma God ki torea hete i pasina, ma ki asa ta na enoni, vi ge tarahua, suria God ki bani torea vê. Na Buka Apuna ki vi, o Enoke ki bani hagakoro obana God, ma God ki kahu torea vê. 6Manga vi na enoni, ma ki pe tongesuria God, ngaia ki asa hagetage, vi ge hagakoro obana God. Suria manga vi na enoni, ma ki arâ tanga God, ngaia ki tuguhia, i tongesuria, vi God ki gâga, ma ki mahata tangara na enoni, ga uhungia, vi ga têtê viteana God.

7Renia o Noa ki tongesuria God, tahema i rongogirara na haganunuana iana God renigi na marâ, ga page voravora me, henaka vi pe bâsigi. Ngaia ki tê viteana God, ma ki tagarahia na haka, ngaia marena ma na ahemata iana ka tahi igê. Igê na tarana ngekê ngaia ki hagabângenia, vi na enoni getera i maveta ka era, ma God ki katoa, ki koro ma ki oto i maana renia na tongesuriha iana.

8Renia o Abaramo ki tongesuria God, tahema ngaia ki tê viteana God, matena God i unia, ma ngaia ki râ tanga na agua, God i bani surua tanga, vi vatea renia. Ngaia ki aharaga pania i pasina, henaka vi ngaia ki pe girara, vi i he kani arâ igê. 9Renia ngaia ki tongesuria God, tahema ngaia ki oga mamahuara igê na agua God i bani surua tanga. Ngaia ki oga igê na ruma na gahu, mo Isako mo Jakobo nikâ, suria na suruha iana God ki tangarerua nogaterua. 10Renia o Abaramo ki naasia na hinua raha, i gâga tare, na ani God i bani sege nununa ma ki bani tagarahia.

11Renia o Abaramo ki tongesuria God, tahema ngaia ki girara, i apara kare, henaka vi ngaia ki merahaga ngavê, ma ka Sara nogana ki gomara. Ngaia ki hagêguritogo renia God, ma ki tako togo renia na suruha iana. 12Henaka vi ngaia ki merahaga ngavê, ma ki bâ manga vi meme noga, tenia ngaia ma na mane ngekê ka vora me na raraha, ga rako teha mangagi na higu i vavearo, ma mangagi na one i one, i bara vi ge tomanigi.

13Na enoni hato ngegana ka me, matena ga nganganihaga igê na tongesuriha. Ngaira ka pe têgi na marâ, God i bani surugi, ma ka bani bâsigi hagatê râ hete, ma ka vagevage renigi. Ngaira ka visia mataha, vi ngaira ka na mahuara, ma ka oga hagatora i maveta. 14Na enoni, ga tamasi vikana, ngaira ka visia mataha, vi ngaira ka garia na hinua iata, se i pasita monari. 15Ngaira ka pe angisia na agua, ga bani pania. Manga viga manga ngekana, ngaira ka girara ga aporo. Ma ki mareha. 16Ngaira ka tangasia hete na agua i koro teha: i pasina God. Tahema ngaira ka pe hagamakia God, suria ngaira ka hêtana vi God iata, renia ngaia ki bani tagarahia na hinua raha tangara.

17Suria o Abaramo ki tongesuria God, tahema ngaia ki vogasi renia o Isako, o karena, matena God i uhungia o Abaramo. O Abaramo nga ki na ani, God i bani suru tanga, ma ke bâ, ngaia ki agana, hanana vi vogasi renia o karena i tage togo. 18God ki bani vi tanga, ki vi, “Tenia o Isako na raraha iamu ka page voravora me.” 19O Abaramo ki takusia, vi God ki girara i hagamêria aporo o Isako tenia na mera. Manga ngekê, igia ka girara, ga vivi ki taua aporo o Isako tenia na mera.

20Suria o Isako ki tongesuria God, tahema ngaia ki nungia God, ki korokoro tangarerua o Jakobo mo Esau i na bevoana i muri me.

21Suria o Jakobo ki tongesuria God, tahema ngaia ki nungia God, ki korokoro tangarerua o karena o Josepo, i nago tarana i me. Ngaia ki kaviria na vato iana, ma ki rahesia God.

22Suria o Josepo ki tongesuria God, tahema, matena i sugia ma, vi ge meme, ngaia ki tamasi renia na râha iata na Isiraelita tenia Esipito, ma ki hagarongora renia vi na surina ka page he nakagi.

23Suria na enana o Moise karu tongesuria God, tahema, matena i vora me o Moise, ngairerua karu pinihia o Moise surigi na hageha ge ono. Ngairerua karu bâsia, i bâkoro era ngavê, ma karu pe magu, henaka vigaru pe râ suria na ramata iana na maneraha.

24Suria o Moise ki tongesuria God, tahema, matena i raha me noga, ngaia ki pe obanira na enoni, vi ge visia, vi ngaia ki no karena ka karena o Parao, na maneraha. 25Ngaia ki usi, vi ge vagevagesigi na tasi, henaka vi igê na kere matena abubu, ga tarahua na heuhungiha. Ma ngaia ki obania hete, vi mamasiaga henira na kariana God. 26Ngaia ki takusia, vi na mamasiaganiha, i tarahua, matena na enoni ka guharia, suria vi ngaia ki tongesuria na Mesaia, ki koro teharigi na ruruguha hatohato iata na Ai ni Esipito, suria ngaia ki hahutugigi na marâ koro, i page nahunigi i na matena i muri me.

27Suria o Moise ki tongesuria God, tahema ngaia ki pania i Esipito, ma ki pe magutenia na mangariaganiha iana na maneraha. Ngaia ki ama ni togeaga nga, manga na mane i bâsia God, ga pe girara, vi ge bâsia igia. 28Suria ngaia ki tongesuria God, tahema ngaia ki hagavora na Paseka, ma ki bonasira na Siu, ka kamusigi na maa ni ruma renigi na gapu, hanana vi siana na angelo ni Mera ki nanahuira bêbê ni kare mane iata ngaira na Isiraelita.

29Suria na Isiraelita ka tongesuria God, tahema ngaira ka tarêhia na Asi Memera, manga vi ga râ igê na agua, i mamata. Ma na matena na Ai ni Esipito ka uhungia nogata, ngaira ka tono ka me.

30Suria na Isiraelita ka tongesuria God, tahema na para, i rihuia na hinua i Jeriko, ki guguru igê na pita na tangiana, ga rihuia igê. 31Suria ka Ragaba, na êrâ, ki tongesuria God, tahema ngaia ki pe me henira na enoni, ga guguruga tanga God, suria ngaia ki unira banu na mane, ga nanago banu, ka bâ i hinua.

32I hega, gê tamasi nga, ki arâ, se i arari noga? Na matena tangê ki pe borahu, hanana vi ve tamasi renira o Giteone, o Baraka, o Samosone, o Japeta, o Tavite, o Samuele, ma na poropete. 33Suria ngaira ka tongesuria God, tahema ngaira ka meraheariha na agua getigi, ma ka teharigi. Ngaira ka katogi na tarani, ga oto, ma ka têgi na marâ, God i bani surugi. Ngaira ka here mumura na laione. 34Ngaira ka hunigi na anguruni na gi. Ngaira ka gavatenigi na tatapa borahu iata na merongata. Henaka viga makumakusiga, ma ngaira ka ramo ngavê, ma ka teharira na merongata, ngaira ka na enoni mahuara. 35Suria na hehene ka tongesuria God, tahema ngaira ka torera aporo na mane iata, ga mêri aporo tenia na mera.

Tani ka usi, vi ge huhura tenia na ruma ni hagaitangiha, ma ka me, suria ga hagamamasiagara bâraha, hanana vi God ki hagamêrira aporo tanga na mêriha koro teha. 36Na enoni ka meramarabe tani, ma ka ramusira. Ma na enoni ka rakura tani, ma ka kasira i ruma ni hagaitangiha. 37Na enoni ka arihahunira tani, ka reterete vurusira tani renigi na soa, ma ka reterete ngurira tani renigi na tatapa borahu. Tani ki asa, vi ge oga tonge, ka hagesuru ma renigi na gavota na sipi, se na goti; ka matareha; na enoni ka tarigenira, ma ka katora bera. 38Ngaira ki pe marisita na maveta. Ngaira ka arârâ ma igê na bagamasusu raha igê na hungani, mangara na mahuara. Ngaira ka gâga ma igê na vaba, ma igê na tahu.

39Ga rongo raha na atata na mane ngegana, suria ngaira ka nganganihaga igê na tongesuriha. Henaka i manga ngekana, ma ngaira ka pe têgi na marâ, God i bani surugi. 40Suria God ki takusia na katoha, na ani i koro tangagia. Na takotako iana ki manga ikê: ngaia ki katora, ka koro teha haku henigia ma.

Currently Selected:

HEBEREO 11: KCB

Highlight

Copy

Compare