HEBEREO 12

God Vaemaka ki hagaotogia

1Hoi, ma igia ka hega? Igia ka oga i guputa rako na enoni ngegana, ga nganganihaga igê na tongesuriha. I tuguhigia, vi ga kasigi râ na ara ni marâ, ga hagabarasigia, na ara ni tasi, ga rugigia, ma ka tangotango hete igê na tara, i tâ tangagia, hanana vi ga tehateha. 2I tuguhigia, vi ga magutenia o Jesu, i haganega na tongesuriha i pasika, ma ki katoa, ki nganganihaga ngavê. Ngaia ki pe rumakaka, matena i tarahua na mamasiaganiha igê na kuruse. Ma ki suria na vagevageha, i naasia, ngaia ki takusia hete, vi na makiha renia na mera igê na kuruse ki na marâ purua ma. Ma i ngekê God ki bani kasia akê, ki araha henia.

3Mu takusigi na mamasiaganiha iana. Na enoni tasi ka kitenia ngavê. Tahema siana kamu hagêrahu, ma siana kamu rumakaka. 4Tariha me i ngekê ka pe nahuigamu rârâ, matena mu meheariha na tasi. 5Mu bani bonotenigi vari na tamasinga, God i bani kanukanugamu renigi, igamu na karena? Ngaia ki vi,

“Kareku, gu karinga na Araha,

matena i hagaitangigo,

ma siana ko rumakaka,

matena i ramunigo.

6Suria na Araha ki hagaitangia na ani,

ngaia i takuia,

ma ki ramusia na ani,

ngaia i katoa renia vi na karena.”

7Mu aganaria na mamasiaganiha, suria God ki hagaotogamu manga na mane, i hagaotoa na karena. Suria na mamasiaganiha, i tarahugamu, ki vi, vi God ki katogamu mangara na karena. Mu takusia vari, vi na kare ki pe tarahua na hagaitangiha tenia o vaemana? 8Manga vi igamu, ma kamu pe hatamia na hagaitangiha mangara na ani getera na karena God, i ngekana ki vi, vi igamu kamu mareha vi na karena monari, ma na kare ni tara hete kani igamu. 9Igê na tarana o vaemaka, ga aparagia, ngaira ka hagaitangigia, ma igia ka hanetasira. Tahema ki tuguhigia ngavê, vi ga têtê viteana God Vaemaka, i hagavoragia. Manga ga katokato vikana, igia ka page nahunia na mauriha mora ma tarema. 10O vaemaka, ga aparagia, ka hagaitangigia suria na kere matena abubu, ma igê na tarana, ngaira ka girara, vi oto. Ma God ki hagaitangigia, ma ki hagaotogia, hanana vi ga korokoro teha ngavê manga ngaia. 11Matena i tarahugia na hagaitangiha, na hagaitangiha, matena i râ me, ki bâ manga na marâ, i hagabono obaka, mareha vi na marâ, ge hagakoro obaka. Ma hemuri na enoni, i bani hagaotora na hagaitangiha, ngaira ka tavoa na mena koro: ngaia ki na marapeha ma na mauriha, i koro ma ki oto i maana God.

Na tarani koro ma na tarani ga pe koro

12Hoi, mu taugi akê na rimami mangusi! Mu hagagatagatanigi na buru ni ugami marumarusiga! 13Mu ama ni arâ nga igê na tara oto, hanana siana ki atasi na êgami, i tavi, ma kamu komaga hete.

14Mu uhungia, hanana mu marape henira na enoni hato. Ma kamu uhungia, kamu mauri koro ma kamu ototo i maana God, suria na enoni, i pe katokato vikana, ki asa iana, vi ge page bâsia na Araha. 15Mu bâbâ, hanana siana ta na enoni ki murisigea na korohana God. Mu bâbâ, hanana siana ta na enoni ki paronga iera, se i takusigi ma na marâ ni maveta manga o Esau. 16Ngaia ki na kare mane hagenago. Tahema ngaia ki page nahunigi rako na marâ tenia o vaemana. Ma ngaia ki urusigi na nahuninga ngegana renia na ani gi tage ma na matena ni ngêra. 17Ma kamu bani girara, vi i hemuri me ngaia ki obania, vi o vaemana ki têtêbuhia, hanana vi nahunigi na nahuninga iana. Ma o vaemana ki bara tanga. O Esau ki asa, vi ge urusia nikâ na marâ, i bani katoa, henaka vi ngaia ki hangunigi, ma ki angisigi bâraha.

18Igamu kamu pe hata mangara na Isiraelita. Igamu kamu pe râ tanga na marâ, mu girara mu hataria. Igamu kamu pe rigia na apena na gi raha igê na hungana i Sinai. Igamu kamu pe râ igê na mengo, igê na vaha, ma igê na roga raha. 19Igamu kamu pe rongogi na ringeni na ahuri, ma na ringena God. Na enoni, ga rongoa na ringena God, ka nungia nga, hanana vi siana ka rongoa nikâ ta na tamasinga. 20Renia ngaira ka pe toto suria na ramata, i vi, “Henaka vi na marâ manga na puruka, se vi na sipi, ma ki hataria na hungana, ki tuguhia, vi ga arihahunia ki meme.” 21Na bâhanani ka hagamagusira bâraha na enoni. Tahema o Moise ki vi, “E, inê kê tata ngavê ma kê magu ngavê.”

22Mareha. Igamu kamu bani râ me hete tanga na hungana i Sione, ma tanga na hinua raha iana God mamauri, na hinua i Jerusaleme iana God, ga goga igê rako na rehagaro na angelo. 23Igamu kamu bani râ me tanga na haku iata na karena obakoro God, ga hagenago, ma ka bani oga na atata i pasina God. Igamu kamu bani râ me tanga God, i surira na enoni hato, ma tangara na atarota na enoni ga oto, God ki bani hagakorora ngavê. 24Igamu kamu bani râ me tanga o Jesu, i merâ me na suruheri haoru, ma tanga nikâ na gapuna o Jesu, ga bani tahusigenia, ma ki tamasigi na marâ, ga teharigi na marâ, na gapuna o Abele i tamasi renigi.

25Hoita, mu takotako, hanana siana kamu usisi, vi gamu karinga na viteana. Na enoni i nago, ga usitenia na taroha, God i hagarongora renia i maveta, ngaira ka pe tahi. Ma igia nga, ki asa iaka, vi ge tahi, manga vi igia, ma ka heriga God, i tamasi tangagia. 26I na matena i nago na ringena God ki ngingia na maveta, ma i ngekê ngaia ki bani suru, ki vi, “Inê be ngingia hagetage nikâ na maveta, ma ki mareha vi ngaia ma na maveta, ma na vavearo nikâ hete.” 27Na tamasinga i vi, vi “hagetage nikâ” ki visia mataha, vi na marâ hato, i hagavoragi God, ka page angingi, ma ka page magahuru, hanana na marâ, ga pe angingi, ka page gâga tare.

28Hoita, ga visia koro God, suria igia ka page gâga igê na haku iana na Araha God, na haku i asa, vi ge angingi, se vi ge page magahuru. Ga visia koro God, ma ka rahesia igê na tarana, ga hagakoro obana igê. Ka hanetasia ma ka magutenia. 29Renia i monari, na God iaka ki manga na gi, i ngingigi na ara ni marâ hato.

Currently Selected:

HEBEREO 12: KCB

Highlight

Copy

Compare