HEBEREO 10
10
1Na Ramata iata na Siu ka na nununi ma, se na mamarugani ma na marâ, ga monari. Ngaira ka pe katogi, ke rongo mataha na marâ, ga koro, ga page arâ me. Igê na ara ni harisi, ki bê ki arâ, ka tagarenigi na vogasiha, ga tagenani ma. Manga i he renigi na vogasiha ngegana na Ramata ka girara, ga katora na enoni, ga rahesia God, ka korokoro teha? 2Manga vi na enoni, ga rahesia God, ma ka matarotaro ngavê tenigi na tasi, ngaira ki asa iata, ge takusia, vi na tasi ki gâga mênga i pasita i murina na vogasiha, i hagetage togo ma. Tahema na ara ni vogasiha ka hatohato. 3Bâ, na vogasiha ka na marâ tanga ga hagatakusira na enoni renigi na tasi iata, i na ara ni harisi, ki bê ki arâ. 4Na gaputa na puruka ma na goti ki asa ngavê, vi ge tananigi râ na tasi.
5Tahema, matena o Kirisito ki sugia ma, vi ge arâ me i maveta, ngaia ki vi tanga God, ki vi:
“Igo ko pe obanigi na vogasiha ma na votovoto,
ma ko hagarêa hete na apeku.
6Igo ko pe vagevage renigi na vogasiha ni puruka,
ga sungigi hagenani igê na bea ni vogasiha.
Igo ko pe vagevage renigi na vogasiha
renigi na ani mavê na marâ,
ga tagarenigi tanga na bonoteniha ni tasi.
7Tahema inê kê vi, ‘God, inê ikê,
hanana gê katoa na obaniha iamu,
manga ga bani sege reniê igê na Buka ni Ramata.’”
8Hagenago ngaia ki vi: “Igo ko pe obanigi, ma ko pe vagevage renigi na vogasiha ma na votovoto, se na vogasiha ni puruka, ga sungigi igê na bea ni vogasiha, ma na vogasiha renigi na ani mavê na marâ, ga tagarenigi tanga na bonoteniha ni tasi.” Ngaia ki tamasi vikana, henaka vi na enoni ka tagarenigi na vogasiha hato ngegana suria na Ramata igê na Buka Apuna. 9Ma hemuri ngaia ki vi: “God, inê ikê, hanana gê katoa na obaniha iamu.” Tahema God ki hatungigi vê na ara ni bani vogasiha, ma ki urusigi renia na vogasiha iana o Kirisito. 10Renia o Jesu Kirisito ki katoa na obaniha iana God, tahema igia hato ka matarotaro ngavê tenigi na tasi, suria ngaia ki vogasi renia na apena ngaia so marena manga na vogasiha hagetage togo ma. 11Na ara ni mane ni vogasiha iata na Siu ki rêra haraga, matena i katogi na tagaraha iana i na ara ni tangiani, ma ki tagarenigi na vogasiha, ga hetagenani ma, hagarako, ma na vogasiha ngegana ki asa hagetage, vi ge tananigi râ na tasi. 12Bâ, o Kirisito ki tagarenia na vogasiha gi tage togo ma tanga na bonoteniha ni tasi. Na vogasiha ngekana ki korokoro tare, ki bê ki arâ. Ma hemuri ngaia ki gâga so henia God igê na atohana na Araha. 13I ngekana ngaia ki gâga karia na matena, God i page katora igê na merongana, ka voravora re na êguga iana. 14Hoi, renia na vogasiha gi tage togo ma ngaia ki bani katora na enoni, ga matarotaro tenigi na tasi, ka koro teha ngavê tare ma tarema.
15Ma na Higona Apu ki tamasi mataha tangagia nikâ. Hagenago ngaia ki vi:
16“Hoi, na Araha ki vi,
‘Na suruheri,
gê page naka henira i na matena i muri me,
ki manga ikê:
Inê be nakagi na ramata iaku igê na aitangihata,
ma be segegi i obata.’”
17Ma hemuri ngaia ki vi, “Inê be bonotenigi na tasi iata ma na parongata era.” 18Manga ngekê, manga vi na tasi, ma ka hatohato, na vogasiha tanga na bonoteniha ni tasi ki hatohato nikâ.
Ga guruguru hagarangia God
19Hoi, goaku igê na tongesuriha, renia na mera iana o Jesu igia ka asitatara ngavê, hanana vi ga bêbanu igê na Agua Apuna Ngavê. 20Ngaia ki tangahia tangagia na tara haoru tanga na mauriha, suria ngaia ki banu igê na gahu i ruma ni rotu, i vivi igê na apena. 21Na mane ni vogasiha iaka, i bâsuria na ruma iana God, ngaia ki raha teha. 22Hoi, ga guruguru hagarangia God, matena ga nganganihaga igê na monariha ma na tongesuriha, ma ka matarotaro tenigi na tasi, ga bani tananigi râ, ma ka bani mamanu igê na ve marava. 23Ga taugi gatagata na marâ, ga naasigi, ma ka tongesurigi, suria igia ka girara, ga hagêguritogo renia God, i hagamonaria tare na suruha iana. 24Ga heanumasige heri, ka hetamaniheri, hanana ga hagabângenigi na hetakuiha ma na tagaraha koro. 25Igia, siana ka naka vê na tarana, ga hakuhaku igê, mangara tani na enoni. Ga kanukanugia heri, tare, igê na matena i ngekê nga hete, matena mu bâsia, i hagarangi me noga na Tangiana iana na Araha.
26Manga vi igia, ma ke bani girara na monariha renia God, ma ke ama ni tasitasi nga, ma ke girara, vi igia ke tasi, ki mareha ngavê vi ta na vogasiha, hanana vi ge girara, ge tananigi râ na tasi. 27I gâga ma hete na maguha renia na marâ, i page voravora me: na Suriha Raha ma na anguruna na gi, ga page erasira ngavê na enoni, ga urapusia God! 28Na enoni, i aharê igê na Ramata iana o Moise, ka nahuia ki meme, manga vi na vererua, se vi na vera oru, ma ka hagatanga monari renia, ma ki asa hagetage, vi ge takia. 29Hoi, ma ki tanu hega na mane, i ruhia o Karena God, kani pe hagahigasia na gapu na suruheri, God i tanania ki matarotaro renia, i tamasi erasia na Higona Apu, i votoa na koroha? Mu takotako maninga: na hagaitangiha, i araria, ki era ngavê. 30Renia igia ka bani girara na ani, i vi,
“Inê kê page naka na siva.
Inê kê page barua.”
Ma ngaia ki vi nikâ, ki vi,
“Na Araha God ki page surira
ma ki page hagaitangira na kariana.”
31E, i ama ni era ngavê tangago, manga vi God mamauri, ma ki hagaitangigo!
32Mu takusia aporo na bevoana i nago, matena God i mavesigi moramora igê na aitangihami ma kamu hatamigi bâraha na mamasiaganiha. Ma ki henaka i manga ngekana, ma igamu kamu pe koke. 33Tani na mateni ka guharigamu i maata na enoni, ma ka katogamu bera. Ma tani na mateni mu takira na tamami, ga katora bera igê na tarana ngekana. 34Igamu kamu mamasiaga henira na tamami, ga oga i ruma ni hagaitangiha, ma na matena ga tavogi râ hato tenigamu na nahuninga iami, igamu kamu obâbakoro ma renigi, suria mu bani girara, vi igamu kamu nahunia mênga ta na marâ tangagamu maremi, i koro teha ngavê, ma ki gâga tare ma tare ma. 35Siana kamu makumakusiga, suria na mena, i tâ tangagamu, ki raha teha. 36I tuguhigamu, vi gamu piringiape, hanana mu katoa na obaniha iana God, ma kamu taugi na marâ, i surugi. 37Renia na Buka Apuna ki vi:
“Na kere matena abubu ki gâga mênga,
ma na ani, ga naasia, ki page arâ me.
Ngaia ki asa, vi ge hagarihu.
38Na kariaku, ga koro ma ka oto i maaku,
ngaira ka page mauri,
manga vi ga hagêguritogo reniê.
Ma ki manga ta na hitangita,
ma ki murisigeê,
ngaia ki asa, vi ge hagakoro obaku.”
39Igia ka pe mangara na tamata na enoni, ga aharo getera ma ka pe tahi. Ma igia hete ka na tamata na enoni, ga tongesuri ma ki tahi.
Currently Selected:
HEBEREO 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
