BUKA NI TAKOHA 9
9
Na tarana gi tagena ki tarahura na enoni hato
1Na tarani hato ngegana inê kê bani tako arihu me renigi. Inê kê tarahua, vi God ki marungigi na tauhata hato na enoni ni takoha mataha ga hagakoro obana God, henaka vi ngaira ka hagabângenia na hetakuiha se na kiteniha. I asa ta na enoni vige girara, na ta kani page tarahua i hemuri me. 2Ma ki henaka. Na tarana gi tagena ma ki tarahura na ara ni enoni hato: na ani ga hagakoro obana God ma na ani i mareha; na ani ga koro ma na ani ga era, na ani ga rotu ma na ani i mareha, na ani ga vogasia God ma na ani i mareha, na ani ga pe tasi ma na ani ga tasitasi, na ani ga magu vige surusuru ma na ani ga gasuga ni surusuru. 3Na tarana gi tage ma kani tarahura na ara ni enoni hato. Na tarana ngekê ma na ara ni marâ ga voravora me i maveta ikê, ngaigi ki pe oto.
Surigi na ogaha hagenani iata na enoni ka takusigi tare ma na eraha ma na tarani ga râ bekabekaga. Ma ke bâ, ki parama ma ka meme. 4Ma na enoni ki girara i hagêguritogo suria na mêriha iana ikê i maveta. Manga na enoni ma ka visigo vi igo ka na o i magu, matena go tahitahi mênga, ngaia ki vi koro teharia vige visigo vi na laione ramo i murina go meme. 5Bâ, na enoni ga tahitahi mêngara ka girara, vi ngaira ka page meme, ma na ani ga bani me ka pe girara rârâ ta na marâ. Ngaira ki mareha rârâ ta na marâ hanana vige naasia. I asa ta na enoni vige takusira. 6Ngaira ka migime na hetakuiha iata, na kiteniha iata ma na teniha iata. Ngaira ki hato iata vige banu igê ta na marâ i voravora me ikê i maveta.
7Tahema, go ngêngê ma ko vagevage, ko totono na vaini ma ko obâbakoro. God ki obania nga vikana. 8Go hagesuru bâkoro ma ko bâbâ mamêriga. 9Go vagevagesia na ogaha iamu henia na gete go takuia, suria na ogaha hagâbo iamu, God i bani haganahunigo renia i maveta ikê, ngaia getea ma ka na mena na tagaraha bâraha hato iamu. 10Go tagara bâraha tare, naka ma na ta, suria igo ko togo tanga na agua iata na enoni ga bani me. Ma i ngekana igo ki asa vigu tagara, se vigu takotako, se vigu girara ta na marâ, se vigu tako mataha.
11Ma ta na marâ nikâ inê kê bâsia i maveta ikê. Na ani i tangotango rêrê ngavê, ki mareha vige tehateha tare, ma na mane ni me ramo ngavê ki mareha vige tehateha tare igê na hearihatana. Na enoni ni takoha mataha ki pe akê me tare tangara, hanana vige nahunigi na ngêra ge ararira, se na enoni ni aitangisiha vige ruruguha, se vige vatera na enoni na tagaraha ga manisingenigi. I tâ ma igê vi hagagara koro se mareha. 12Igo ko pe girara na matena i arâ me igê na matena iamu. Mangara na manu igê na basu, mangara na siara igê na hugo, igia nogaka ka tutu igê na matena i hagagara era. Na mera ki hagagasuganigia.
Na takoha renigi na takoha mataha ma na bekabekaganiha
13Inê kê bâsia ta na marâ nikâ renia na takoha mataha. Ngaia ki na tarana i takeê. 14I manga ikê: Ta na kere hinua ma ka pe rako igê na enoni. Ta na maneraha ramo ki taharia. Ngaia ma na me iana ka ura rihia ma ka uhungia viga tahataha kurugi na para ni hinua. 15Ta na mane matareha ki oga i hinua ngekana. Ngaia ki na mane ni takoha mataha ma ki girara i hagatahia na hinua. Ma ki mareha rârâ ge takusia ma vige hagatea, suria ngaia ki matareha. 16Inê kê tako kê vi: Na takoha mataha ki koro teharia na ramoha. Ma na enoni ki mareha rârâ, vige visia na enoni matareha ngekana vi ngaia ki na enoni ni takoha mataha se vige têtê ringena. 17Na karingagiana na tamasinga manâhi iana na mane ni takoha mataha ki teharia na karingagiana na ngerengereha iana na maneraha i merahekarigi na mane ni hagaotonga iana ga bonobonoga. 18Na takoha mataha ki hagarakonigi na marâ koro teharigi na tangaruha, ma na tasi gi tage ki girara i erasigi rako na marâ koro.
Currently Selected:
BUKA NI TAKOHA 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
