BUKA NI TAKOHA 10
10
1Na ani gi tage na rango i bani me ki girara i hagamapua na marâ i sigini koro. Na kere bekabekaganiha ki girara i hatungia na takoha mataha, henaka i raharaha teha.
2Na tauhana na enoni ni takoha mataha ki katogi na tarani ga koro, ma na tauhana na enoni ni bekabekaganiha ki katogi na tarani ga era. 3Na enoni mahuara ga mehetarahu i tara, ngaira ka girara ototo râ nga vi ngaia ki bekabekaga. Na enoni hato ka vivi: E, ngaia ki bekabekaga!
Ge takotako hagenago na osumu
4Manga na maneraha iamu ma ki mangariaga tangago, siana ko vi, vigo hatohato. Go haritagi ma, i era ma ka akê me na tarani ga erataga ngavê.
5Inê kê bâsigi nikâ i maveta ikê tani na tarani i pe oto. Na maneraha kaniga katogi na tarani i pe oto ngegana. 6Ngaira ka gurura akê na enoni ga bonobonoga igê na tagaraha raha, ma ka gurura so na enoni ni giraraha. 7Inê kê bâsira na enoni rakuraku ga tagirira na hosi manga vi ngaira ka na maneraha, ma na maneraha ka hatare surira, manga vi ngaira ka na kare rakuraku.
8Manga go sutasuta hekarigi, vari go suta karigo maremu. Manga go hogea na para, vari na ma ki gagarego. 9Manga go papapa hê, vari na hê ki takego. Manga go sitasita ario, vari ki hagamamarigo. 10Manga na akesi iamu ma ki pangupangu raga ma ko pe ratea, ngaia ki hagame apemu. Tahema ge takotako hagenago na osumu. 11Ata ni vi ma: Igo ko girara vigo hagamanata na ma, hanana siana ki garagara. Manga i garego hato ma ko kahu hagamanata, ki râ hagâbo ma. 12Na enoni ka hagahigasia na enoni ni takoha mataha renigi na tamasinga iana, ma na enoni bekabekaga ki erasia marena renigi na tamasinga iana. 13Matena i haganega ki tamasi, ngaia ki tamasi bekabekaga sisite ma. Ki arârâ ma ngaia ki kahu tamasi bekabekaga ngavê. 14Na enoni bonobonoga ki mani tavaragi. I mareha rârâ ta na enoni ge girara, vi na ta kani page akê me nikâ. I mareha rârâ ta na enoni, vige hagarongogia renia vi na ta kani page akê me i murina ga meme.
15Takusia na enoni i bekabekaga ngavê ma ki pe girara vige aporo i pasina, ngaia ki tagara bâraha rârâ hagaborâ ma, suria i pe nahuni takoha.
Tani na takoha
16Na bagabevoana ka tarahua na agua, manga vi na maneraha ki na kere mane haoru ma, ma na gavumane iana ka magoto tare i na ara ni tangiani ma na ara ni bungiani. 17Ma na agua i babarisi, manga vi ngaia ma ki nahunia na maneraha i nahuni takoha ma ki koro na tauhana ma na gavumane iana ka ngêngê igê ma na mateni tange ma ka hagatogo surira mareta, vi siana ki ruguhira na tonoha.
18Manga na mane ma ki marusi vige surungia na gerina na ruma iana, na ruma ki aharihari tare ma ki page kakaga ki ahoge.
19Na magotoha ki katogo ko vagevage ma na vaini ki hagakoro obamu. I monari, ma na haga ma kani tamasi.
20Siana ko visia na maneraha, henaka vi igê na aitangihamu. Siana ko visia na enoni ruruguha, henaka vi pinihi igê na kiboru ni mêruha iamu. Na manu ka hegagahasi, i era ma ka hagarongora renigi na tamasinga iamu. Na tamasinga ka na roga!
Currently Selected:
BUKA NI TAKOHA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
